Read Kernewek Ruth 2 Bible Online

Ruth 2 - Kernewek bible

Ruth 2

¹Hag yth esa dhe Naomi kar hy gour, den golusek, a deylu Elimelek, Boaz y hanow.

²Hag yn-medh Ruth an venyn a Moab dhe Naomi, ‘Gas vy dhe vos, my a'th pys, a-berth y'n gwel dhe guntell gesigow an ys war-lergh nebonan may kavav gras yn y dhewlagas.’ Ha hi a leveris dhedhi, ‘Ke, ow myrgh.’

³Hag yth eth ha kuntell gesigow y'n gwel war-lergh an vysoryon, ha par happ perghennek an rann na a'n gwel o Boaz, a deylu Elimelek.

⁴Hag otta, y teuth Boaz a-dhiworth Bethlehem, ha leverel dhe'n vysoryon, ‘An ARLOEDH genowgh’, hag yn-medhons i dhodho, ‘Re'th vennikko an ARLOEDH.’

⁵Ha Boaz a wovynnas orth an gwas o settys war an vysoryon, ‘Piw dhodho yth yw an voren ma?’

⁶Ha'n gwas o settys war an vysoryon a worthybis, ‘Benyn yowynk a Moab yw hi, neb re dhehwelis gans Naomi a ranndir Moab,

⁷Ha hi a wovynnas, “Gas vy dhe guntell gesigow, my a'th pys, yn mysk an manalow a-dryv an vysoryon.” Ytho hi a dheuth hag oberi a-dhia'n myttin bys y'n eur ma, marnas hi a esedhas pols y'n chi.’[4]

⁸Hag yn-medh Boaz dhe Ruth, ‘A ny wruss'ta klewes, ow myrgh? Na ge dhe guntell gesigow yn ken gwel, ha na dremen alemma, mes glen ogas orth ow maghtethyon.

⁹Gwra attendya an gwel a wrons i mysi, ha mos war aga lergh. A ny wrugavy gorhemmynna dhe'n wesyon na wrellons dha dochya, ha pan vo syghes dhis, ena ty a yll mos dhe'n lestri hag eva a'n dowr a wra an wesyon tenna.’

¹⁰Ha hi a goedhas war hy fas hag omblegya dhe'n dor, ha leverel dhodho, ‘Prag y kevis vy gras y'th tewlagas, ty dhe'm aswonn, ha my estren?’

¹¹Ha Boaz a worthybis ha leverel dhedhi, ‘Y feu leverys dhymm oll yn tien pup-tra re wruss'ta gul gans dha hweger, wosa mernans dha wour, ha ty a asas dha das ha'th vamm, ha pow dha enesigeth ha dos a-berth yn pobel na aswonnsys kyns.

¹²Re wrello an ARLOEDH attyli dha ober, ha kowal re bo dha bewas dhiworth an ARLOEDH, Duw Ysrael, may hwrussys dos yn-dann y eskelli dhe gavoes skovva.’

¹³Hag yn-medh hi, ‘Gas vy dhe gavoes gras y'th tewlagas, ow arloedh, drefenn ty dhe'm konfortya, ha drefenn ty dhe gewsel orth kolonn dha vaghteth — ha my, nyns ov vy kepar hag onan a'th vaghtethyon.’

¹⁴Hag yn-medh Boaz dhedhi, ‘Dhe brys li, deus omma yn ogas, ha deber a'n bara ha trogh dha rann anodho y'n aysel.’ Ytho hi a esedhas ryb an vysoryon, hag ev a ros dhedhi ys rostys, ha hi a dhybris ha gwalghys o, ha hi a asas an remenant.

¹⁵Ha hi a sevis dhe guntell gesigow ha Boaz a worhemmynnis orth y wesyon, ow leverel, ‘Hwath yn mysk an manalow gesiwgh hi dhe guntell gesigow, ha na wrewgh hy ankombra,

¹⁶Hag ynwedh gesiwgh re a'n dornasow dhe goedha rygdhi, may hallo hi aga huntell, ha na wrewgh hy repreva.’

¹⁷Ha hi a guntellas gesigow y'n gwel bys y'n gorthugher, ha drushya an myns re wrussa hi y guntell, hag y feu a-dro dhe efa heydh.

¹⁸Ha hi a wrug y dhoen dhe'n dre, ha'y hweger a welas kemmys re wrussa hi guntell. Ena Ruth a gemmeris yn-mes hag a ros dhedhi an ys rostys a veu gesys dhedhi, may hwrussa kavoes hy gwalgh anodho.

¹⁹Yn-medh hy hweger dhedhi, ‘Ple hwruss'ta kuntell gesigow hedhyw? Ple hwruss'ta oberi? Re bo bennigys neb a'th attendyas.’ Ha hi a dherivas orth hy hweger hanow an gour a wrug hi oberi ganso, ow leverel, ‘Hanow an gour a wrug vy oberi ganso yw Boaz.’

²⁰Hag yn-medh Naomi dh'y gohydh, ‘Bennigys re bo ev gans an ARLOEDH na forsakyas y dregeredh troha'n re vew ha'n re varow.’ Ha Naomi a leveris dhedhi, ‘An gour ma yw neskar dhyn, onan a'gan dasprenysi ywa.’

²¹Hag yn-medh Ruth, an venyn a Moab, ‘Yn sur ev a leveris dhymm, “Y koedh dhis glena ogas dhe'm gwesyon bys may hwrellons i gorfenna kuntell oll an drevas yw dhymm.” ’

²²Ena yn-medh Naomi dh'y gohydh Ruth, ‘Da yw, ow myrgh, ty dhe vos yn-mes gans y vaghtethyon, yn le bos anniys yn gwel arall.’

²³Ha hi a lenas ogas dhe vaghtethyon Boaz dhe guntell gesigow gansa bys kowlwrians trevas an heydh ha trevas an gwaneth, hag a-wosa yth esa hi trigys gans hy hweger.