Read Kernewek Ruth 4 Bible Online

Ruth 4 - Kernewek bible

Ruth 4

¹Boaz eth yn-bann dhe'n yet hag esedha ena, hag otta, yth esa an neskar ow tremena, may hwrussa Boaz kewsel anodho, hag yn-medh Boaz, ‘Deus omma hag esedh omma, ty gothman’, hag ev a dreylyas a-denewen hag esedha.

²Ena Boaz a elwis deg gwer a henavogyon an sita ha leverel, ‘Gwrewgh esedha omma’, hag i a esedhas.

³Hag yn-medh Boaz dhe'n neskar, ‘Naomi, neb yw dehwelys dhiworth tiredh Moab, a vynn gwertha rann an tir esa dh'agan kar Elimelek.

⁴Ytho, yn-medhav, my a wra derivas dhis, ow leverel, gwra y brena a-rag an dus usi owth esedha omma hag a-rag henavogyon ow fobel. Mar mynnydh y dhasprena, yndella re bo, ha mar ny vynn'ta y wul, deriv e dhymm, may hwodhviv. Ty yw an kynsa a yll y dhasprena, ha my yw an nessa wosa ty.’ Ev a worthybis, ‘Y dhasprena a wrav.’

⁵Ena yn-medh Boaz, ‘Pan brenydh an tir dhiworth Naomi, res vydh dhis ynwedh kavoes Ruth an venyn a Moab, gwreg agan kar marow, dhe dhrehevel hanow an den marow war y eretons.’

⁶Yn-medh an neskar, ‘Ny allav vy y dhasprena ragov vy ow honan, ma na dhistruiv ow eretons vy. Gwra y dhasprena dha honan, drefenn na allav vy y dhasprena.’

⁷Ha hemm o an us yn Ysrael y'n termyn eus passyes, rag kowlwul oll an negys a dhasprena neppyth po y geschanjya; y hwre gour diwiska y sandal ha'y ri dhe'n den arall. Henn o an fordh dhe fastya bargen yn Ysrael.

⁸Ytho an neskar a leveris dhe Boaz, ‘Gwra y brena ragos jy dha honan’, hag ev a dhiwiskas y sandal.

⁹Ena yn-medh Boaz dhe'n henavogyon hag oll dhe'n bobel, ‘Dustunioryon owgh hwi hedhyw my dhe brena dhiworth Naomi pup-tra a bewo Elimelek, Kilyon ha Mahlon,

¹⁰hag ynwedh my a gemmeras Ruth an Moabyades, gwreg Mahlon, yn gwreg dhymm, rag drehevel hanow an den marow war y eretons, ha ma na vo hanow an den marow kellys yn mysk y vreder nag a yet y dyller ev. Hwi yw dustunioryon hedhyw.’

¹¹Hag oll an bobel esa y'n yet, ha'n henavogyon, a worthybis, ‘Dustunioryon on ni. Re wrello an ARLOEDH dhe'n venyn usi ow tos a-berth y'th chi bos kepar ha Raghel ha Lea, neb aga diw a dhrehevis chi Ysrael, ha re siwenni yn Efratha ha dos ha bos den a vri yn Bethlehem.

¹²Re dheffo ha bos dha ji kepar ha chi Peres, a wrug Tamar dineythi dhe Yuda, der an has a wra Duw ri dhiso dhiworth an voren ma.’

¹³Ha Boaz a gemmeras Ruth, ha hi a dheuth ha bos y wreg, hag ev a dheuth dhedhi, ha Duw a wrug dhedhi omdhoen, ha hi a dhineythis mab.

¹⁴Hag yn-medh an benynes dhe Naomi, ‘Bennigys re bo an ARLOEDH, na wrug dha asa heb neskar hedhyw. Re bo aswonnys[7] y hanow yn Ysrael.

¹⁵Ev a wra dhe'th enev dasvewa, ha dha sostena y'th kothni, drefenn dha wohydh neb a'th kar dhe wul y dhineythi. Gwell yw hi ragos ages seyth mab.’

¹⁶Ha Naomi a gemmeras an mab ha'y worra yn hy barrlenn, ha dos ha bos y vagores.

¹⁷An kentrevogesow a'n henwis, ow leverel, ‘Mab a veu genys dhe Naomi’, hag i a'n henwis Obed. Ev a dheuth ha bos tas Yesse, o tas Davydh.

¹⁸Ha hemm yw linyeth Peres: Peres a dhineythis Hesron,

¹⁹ha Hesron a dhineythis Ram,[8] hag Ram a dhineythis Amminadab,

²⁰hag Amminadab a dhineythis Nahshon, ha Nahshon a dhineythis Salmon,

²¹ha Salmon a dhineythis Boaz, ha Boaz a dhineythis Obed,

²²hag Obed a dhineythis Yesse, ha Yesse a dhineythis Davydh.