Read Kernewek 1 Samuel 1 Bible Online

1 Samuel 1 - Kernewek bible

1 Samuel 1

¹Yth esa neb unn gour, a Ramathaym-sofim, a venydh Efraym, ha'y hanow Elkana mab Yeroham mab Elihu mab Tohu mab Suf, Efrathyas.

²Hag yth esa dhodho diw wreg, hanow an eyl Hanna, ha hanow hy ben Peninna. Yth esa dhe Peninna fleghes, mes nyns esa fleghes dhe Hanna.

³Ha'n gour ma a wre mos yn-bann mes a'y sita blydhen wosa blydhen dhe wordhya ha sakrifia dhe ARLOEDH an luyow yn Shilo, le mayth esa an dhew vab a Eli, Hofni ha Finehas, oferysi an ARLOEDH.

⁴Y'n jydh mayth offrynna Elkana, ev a ri rannow dhe Peninna y wreg ha dhe oll hy mebyon ha'y vyrgh;

⁵mes dhe Hanna ev a ri rann dhewblek, rag ev a gara Hanna, kyn hwrussa an ARLOEDH degea hy thorr.

⁶Ha'n nessa wreg a's grevyas yn feur, dh'y serri, drefenn an ARLOEDH dhe dhegea hy thorr.

⁷Ev a wre mos yndella blydhen wosa blydhen; peskweyth may hwre hi mos yn-bann dhe chi an ARLOEDH, hi a's grevya. Rakhenna Hanna a oela, ha ny dhybri.

⁸Hy gour Elkana a leveris dhedhi, ‘Prag yth oelydh? Ha prag na dhybrydh? Ha prag yth yw dha golonn trist? A nyns ov vy moy dhis ages deg mab?’

⁹Ytho Hanna a sevis yn-bann wosa i dhe dhybri hag eva yn Shilo. Hag yth esa Eli an oferyas owth esedha war an gador ryb post-daras tempel an ARLOEDH.

¹⁰Ha hi o grevys yn town hag a bysis war an ARLOEDH, hag oela yn hwerow.

¹¹Ha hi a ambosas ambos ha leverel, ‘A ARLOEDH an luyow, mar mirydh dhe wir war alar dha vaghteth, ha perthi kov ahanav, ha ny ankevydh dha vaghteth, mes ri dhe'th vaghteth mab, ena my a'n re dhe'n ARLOEDH oll dydhyow y vewnans, ha ny wra altenn vyth tochya y benn.’

¹²Yth esa hi prest ow pysi a-dherag an ARLOEDH, hag Eli a verkyas hy ganow.

¹³Yth esa Hanna ow kewsel yn hy holonn; nyns esa saw hy diwweus ow kwaya, mes nyns o hy lev klewys; rakhenna Eli a dhybis hi dhe vos medhow.

¹⁴Ytho Eli a leveris dhedhi, ‘Pes termyn y fydhydh medhow? Gorr dhe-ves dha win a-dhiworthis.’

¹⁵Mes Hanna a worthybis ha leverel, ‘Nansi, ow arloedh, benyn gans spyrys ahwerek ov; ny evis vy na gwin na korev, mes my re beu ow tiveri ow enev yn-mes a-dherag an ARLOEDH.

¹⁶Na gemmer dha vaghteth rag myrgh Belial, rag my re beu ow leverel yn-mes a'm preder meur ha'm poenvos oll an termyn ma.’

¹⁷Ena Eli a worthybis ha leverel, ‘Ke yn kres; ha re wrontyo Duw Ysrael dhis dha bysadow a wovynnsys orto.’

¹⁸Ha hi a leveris, ‘Gwres dha vaghteth kavoes gras y'th wolok.’ Ena an venyn eth war hy fordh ha dybri, ha nyns o hy fas trist na fella.

¹⁹Myttin a-varr i a sevis ha gordhya a-dherag an ARLOEDH, hag ena i a dhehwelis dh'aga chi dhe Rama. Hag Elkana a aswonnis y wreg, ha'n ARLOEDH a borthas kov anedhi.

²⁰Y'n termyn gwiw, Hanna a omdhuk ha dineythi mab, ha hi a'n henwis Samuel, rag hi a leveris, ‘My re'n govynnas orth an ARLOEDH.’

²¹An gour Elkana hag oll y vayni eth yn-bann dhe offrynna dhe'n ARLOEDH an sakrifis blydhenyek, ha dhe gewera y ambos.

²²Mes nyns eth Hanna yn-bann, rag hi a leveris dh'y gour, ‘Ny wrav vy mos yn-bann erna vo an maw didhenys, hag ena my a'n dre, may hyll ev omdhiskwedhes a-dherag an ARLOEDH, ha triga ena bys vykken.’

²³Hag Elkana hy gour a leveris dhedhi, ‘Gwra an pyth a hevel da dhis, gorta bys pan y'n didhensys; re gollanwo an ARLOEDH y er.’ Ytho an venyn a drigas ha meythrin hy mab bys pan y'n didhensa.

²⁴Ha wosa hi dh'y dhidhena, hi a'n kemmeras yn-bann gensi, gans lodhen tri bloedh,[1] hag unn efa a vleus, ha seth a win. Hi a'n dros dhe ji an ARLOEDH yn Shilo; ha'n maw o yowynk.

²⁵I a ladhas an lodhen, ha dri an maw dhe Eli.

²⁶Hag yn-medh hi, ‘Ow arloedh, kepar dell vewydh, ow arloedh, yth ov vy an venyn esa sevys rybos omma, ow pysi war an ARLOEDH.

²⁷Rag an maw ma y pysis; ha'n ARLOEDH re wrontyas dhymm ow fysadow a wovynnis orto.

²⁸Rakhenna my re'n prestas dhe'n ARLOEDH, hedre vewo, ev a vydh prestys dhe'n ARLOEDH.’ Hag i a wordhyas an ARLOEDH ena.