Read Kernewek 1 Samuel 10 Bible Online

1 Samuel 10 - Kernewek bible

1 Samuel 10

¹Ena Samuel a gemmeras kostrel a olew, ha'y dhiveri war y benn, hag amma dhodho, ha leverel, ‘A ny wrug an ARLOEDH dha untya dhe vos rewler war y ertach?

²Pan dhiberthydh a-dhiworthiv hedhyw, ty a gyv dew wour ryb bedh Raghel yn tiredh Benyamin yn Selsagh, hag i a lever dhis, “Trovys yw an asenes mayth ythys dh'aga hwilas. Hag otta, dha das re astelas prederi a-dro dhe'n asenes, mes prederus yw a'gas govis hwi, ow leverel, Pandr'a wrav a-dro dhe'm mab?”

³Ha ty a dremen pella alena, ha ty a dheu dhe dherwenn Tabor, hag ena, tri gour a wra dha dhyerbynna, ow mos yn-bann dhe Dhuw, yn Bethel, onan anedha ow toen tri mynn, hag onan ow toen teyr thorth bara, hag onan ow toen botellas a win.

⁴I a wra dha salusi, ha ri dhis diw dorth bara; ha ty a wra aga resseva dhiworth aga dorn.

⁵Wosa henna ty a dheu dhe Gibeath-elohim le may ma savla-gwithysi an Filistysi. Ena, wosa ty dhe dhos di dhe'n sita, ty a dhyerbynn bagas a brofoesi ow tos yn-nans dhiworth an tyller ughel, hag a-ragdha sowtri, ha tabourik, ha pib, ha telynn, hag i a vydh ow profoesa.

⁶Ha spyrys an ARLOEDH a wra dha dhalghenna, ha profoesa a wredh gansa, ha treylys vydhydh yn gour arall.

⁷Ytho pan dheu an toknys ma warnas, gwra pypynag a wra dha leuv y gavoes; rag yma Duw genes.

⁸Ha ty a wra mos yn-nans a-ragov dhe Gilgal, hag otta, my a dheu yn-nans dhiso jy, dhe offrynna offrynnow leskys, dhe offrynna offrynnow kres. Gorta seyth dydh bys pan dhov dhis, ha my a dhiskwa dhis pandr'a wredh.’

⁹Ytho, pan dreylyas ev y geyn dhe asa Samuel, Duw a ros dhodho kolonn arall, hag oll an toknys ma a hwarva y'n jydh na.

¹⁰Hag i ow mos di dhe Gibea, otta, bagas a brofoesi a'n dyerbynnas; ha Spyrys Duw a'n dalghennas, hag ev a brofoesas yn aga mysk.

¹¹Ytho, pan y'n gwelas oll an re a'n aswonni kyns, hag ev ow profoesa gans an brofoesi, yn-medh an bobel an eyl dh'y gila, ‘Pandr'yw hemma, a hwarva dhe vab Kish? Usi Sowl ynwedh yn mysk an brofoesi?’

¹²Ha gour a'n tyller na a worthybis, ow leverel, ‘Ha piw yw aga thas?’ Yndella, hemma a dheuth ha bos henlavar: ‘Usi Sowl ynwedh yn mysk an brofoesi?’

¹³Ha wosa ev dhe worfenna ow profoesa, ev eth dhe'n tyller ughel.

¹⁴Ewnter Sowl a leveris dhodho ha dh'y was, ‘Py le yth ethewgh?’ Yn-medh ev, ‘Dhe hwilas an asenes; ha pan welsyn na yllys aga throvya, mos a wrussyn dhe Samuel.’

¹⁵Hag yn-medh ewnter Sowl, ‘Deriv dhymm, my a'th pys, pandr'a leveris Sowl dhis?’

¹⁶Hag yn-medh Sowl dh'y ewnter, ‘Ev a ros derivas dhyn, an asenes dhe vos trovys’, mes ny dherivas dhodho a-dro dhe'n myghternses, an pyth a leveris Samuel.

¹⁷Samuel a elwis an bobel war-barth dhe'n ARLOEDH, dhe Mispa,

¹⁸hag yn-medh ev dhe vebyon Ysrael, ‘Yndellma y lever an ARLOEDH, Duw Ysrael: “My a dhros Ysrael yn-bann yn-mes a Ejyp, ha'gas selwel yn-mes a leuv an Ejyptianys, hag yn-mes a leuv oll an gwlaskordhow a wre agas arwaska.”

¹⁹Mes hedhyw, hwi re naghas agas Duw, neb a'gas delivras dhiworth oll agas droglammow ha'gas galarow. Mes hwi a leveris, “Nansi, mes gorr myghtern warnan.” Lemmyn ytho, sevewgh a-rag an ARLOEDH orth agas loethow hag orth agas kordhow.’

²⁰Ena Samuel a dhros oll loethow Ysrael yn ogas, ha'n prenn a goedhas war loeth Benyamin.

²¹Ev a dhros loeth Benyamin yn ogas, orth aga theyluyow, ha'n prenn a goedhas war deylu Matri. Ena an prenn a goedhas war Sowl mab Kish. Mes pan y'n hwilsons, ny'n kavsons.

²²Ytho i a wovynnas orth an ARLOEDH arta, ‘Eus gour hwath dhe dhos omma?’ Hag yn-medh an ARLOEDH, ‘Ottava, kudhys yn mysk an fardellow.’

²³Hag i a boenyas ha'y dhri alena. Ha pan sevis yn mysk an bobel, ughella veu es oll an bobel, a'y diwskoedh hag yn-bann.

²⁴Yn-medh Samuel dhe oll an bobel, ‘A'n gwelowgh, neb a wrug an ARLOEDH y dhewis? Rag nyns eus y bar yn mysk oll an bobel.’ Ha'n bobel oll a grias, ‘Re vewo an myghtern!’

²⁵Samuel a dherivas orth an bobel lagha an myghternses, ha'y skrifa yn lyver, a worras a-rag an ARLOEDH. Ena Samuel a dhannvonas oll an bobel dhe-ves, peub dh'y dre y honan.

²⁶Sowl ynwedh eth tre dhe Gibea, hag yth eth ganso lu an soudoryon, neb a dochyas Duw aga holonn.

²⁷Mes mebyon Belial a leveris, ‘Fatell yll an den ma agan sawya?’ Hag i a'n dispresyas, ha ni dhrosons dhodho ro. Mes tewel a wrug.