Read Kernewek 1 Samuel 13 Bible Online

1 Samuel 13 - Kernewek bible

1 Samuel 13

¹Sowl o deg bloedh warn ugens[7] pan dhallathas reynya; hag ev a reynyas dewgens blydhen ha diw[8] war Ysrael.

²Sowl a dhewisas ragdho y honan tri mil dhen a Ysrael; yth esa dew vil gans Sowl yn Mikmash hag yn menydh Bethel, hag yth esa mil gans Yonathan yn Gibea a Benyamin; hag ev a dhannvonas remenant an bobel dhe-ves dh'aga thyldow.

³Yonathan a fethas savla-gwithysi an Filistysi esa yn Geba, ha'n Filistysi a glewas anodho. Ha Sowl a hwythas an hirgorn der oll an tir, ow leverel, ‘Gwres an Filistysi klewes!’

⁴Pan glewas oll Ysrael Sowl dhe fetha savla-gwithysi an Filistysi, hag ynwedh Ysrael dhe dhos ha bos kasadow dhe'n Filistysi, an bobel a veu gelwys yn-mes dhe junya gans Sowl yn Gilgal.

⁵An Filistysi a omguntellas war-barth dhe vatalyas orth Ysrael, tri mil jarett, ha hwegh mil varghek, ha pobel kepar ha'n tewes usi war an morrep yn niver; hag i a dheuth yn-bann ha kampya yn Mikmash, a'n est dhe Beth-aven.

⁶Pan welas gwer Ysrael aga bos yn ahwer (rag an lu o gweskys kales), ena an bobel a omgudhas aga honan yn kavow hag yn tell hag yn karregi hag yn bedhow hag yn dowrarghow.

⁷Re a'n Ebrowyon a dreusis an Yordan dhe bow Gad ha Gilead. Yth esa Sowl hwath yn Gilgal, hag oll an bobel a'n holyas ow krena.

⁸Ev a wortas seyth dydh, herwydh an termyn re bia apoyntys gans Samuel; mes ny dheuth Samuel dhe Gilgal; ha'n bobel a dhallathas skattra dhiworth Sowl.

⁹Sowl a leveris, ‘Drewgh an offrynn leskys omma dhymm, hag offrynnow kres.’ Hag ev a offrynnas an offrynn leskys.

¹⁰Kettell worfennsa offrynna an offrynn leskys, Samuel a dheuth; ha Sowl eth yn-mes dhe vetya ganso ha'y salusi.

¹¹Samuel a leveris, ‘Pandr'a wruss'ta?’ Ha Sowl a worthybis, ‘My a welas bos an bobel skattrys a-les ahanav, ha na dheuthys a-ji dhe'n dydhyow apoyntys, ha'n Filistysi dhe omguntell war-barth yn Mikmash,

¹²my a leveris, “Lemmyn an Filistysi a dheu yn-nans warnav yn Gilgal, ha ny bysis favour an ARLOEDH”; ytho konstrynys veuv dhe offrynna an offrynn leskys.’

¹³Samuel a leveris dhe Sowl, ‘Ty re wrug yn foll; ny withsys arghadow an ARLOEDH dha Dhuw, a erghis dhis. An ARLOEDH a wrussa fastya dha wlaskor war Ysrael bynitha,

¹⁴mes lemmyn ny wra dha wlaskor durya; an ARLOEDH re hwilas ragdho gour war-lergh y golonn y honan, ha'n ARLOEDH re'n apoyntyas dhe vos rewler war y bobel, drefenn na withsys an pyth a erghis an ARLOEDH dhis.’

¹⁵Ena Samuel eth yn-bann a-dhiworth Gilgal dhe Gibea a Benyamin. Ha Sowl a niveras an bobel esa ena ganso, a-dro dhe hwegh kans gour.

¹⁶Sowl, ha Yonathan y vab, ha'n bobel esa ena gansa a drigas yn Gibea a Benyamin; mes an Filistysi a gampyas yn Mikmash.

¹⁷Bagasow a ravnoryon a dheuth yn-mes a gamp an Filistysi yn tri bagas. Unn bagas a dreylyas trohag Ofra, dhe bow Shual,

¹⁸bagas arall a dreylyas troha Beth-horon, ha bagas arall a dreylyas troha'n menydh a vir war-woeles war nans Seboim troha'n gwylvos.

¹⁹Lemmyn nyns esa gov dhe vos kevys dre oll pow Ysrael; rag an Filistysi a leveris, ‘Rag na wrello an Ebrowyon kledhedhyow po guwow ragdha aga honan’.

²⁰Ytho oll mebyon Ysrael eth yn-nans dhe'n Filistysi, dhe lymma pub gour y sogh, ha'y golter, ha'y voel, ha'y bigell.

²¹Ha'n kost o diw rann a shekel rag an soghyow ha rag an koltrow, hag unn rann a shekel rag lymma an fergh ha'n boelyow ha rag settya an brosow.

²²Ytho yn dydh an vatel, nag esa na kledha na guw kevys yn dorn denvyth a'n bobel esa gans Sowl ha Yonathan; mes yth ens i kevys gans Sowl ha'y vab Yonathan.

²³Ytho an Filistysi eth yn-mes dhe volgh Mikmash.