Read Kernewek 1 Samuel 15 Bible Online

1 Samuel 15 - Kernewek bible

1 Samuel 15

¹Samuel a leveris dhe Sowl, ‘An ARLOEDH a'm dannvonas dhe'th untya dhe vos myghtern war y bobel Ysrael; lemmyn rakhenna goslow orth geryow an ARLOEDH.

²Yndellma y lever ARLOEDH an luyow, “My a gessydh an Amalekysi rag an pyth a wrussons ow settya erbynn mebyon Ysrael pan dheuthons yn-bann yn-mes a Ejyp.

³Lemmyn, ke ha gwask Amalek, ha distru glan pup-tra a's teves, ha na wra aga sparya; mes ladh gour ha benyn, flogh ha fleghik, ojyon ha davas, kowrvargh hag asen.” ’

⁴Ytho Sowl a guntellas an bobel war-barth, ha'ga nivera yn Telaim, dew kans mil droesek, ha deg mil wour a Yuda.

⁵Sowl a dheuth dhe sita Amalek, ha kontrewaytya y'n nans.

⁶Yn-medh Sowl dhe'n Kenysi, ‘Kewgh! Gesiwgh! Omdennewgh yn-mes a'n Amalekysi, po my a'gas distru gansa; rag hwi a dhiskwedhas tregeredh dhe oll mebyon Ysrael, pan dheuthons yn-bann mes a Ejyp.’ Yndella an Kenysi a omdennas dhiworth an Amalekysi.

⁷Sowl a weskis an Amalekysi, a-dhiworth Havila bys Shur, usi a-dal Ejyp.

⁸Hag ev a gemmeras Agag myghtern an Amalekysi yn few, ha distrui glan oll an bobel dre vin an kledha.

⁹Mes Sowl ha'n bobel a sparyas Agag, ha'n gwella a'n deves hag a'n oghen hag a'n enyvales peskys, ha'n eyn, ha pup-tra a veu da, ha ny vynnens aga distrui glan; mes pup-tra dispresys ha koeg i a dhistruis glan.

¹⁰Ena y teuth ger an ARLOEDH dhe Samuel:

¹¹‘Edrek a'm beus my dhe settya yn-bann Sowl dhe vos myghtern, rag ev re dreylyas dhe-ves dhiworthiv, ha ny gollenwis ow gorhemmynnow.’ Samuel o serrys; hag ev a grias war an ARLOEDH dres nos.

¹²Samuel a sevis myttin a-varr dhe vetya Sowl, hag y feu derivys dhe Samuel, ‘Sowl eth dhe Karmel, le may trehevis men-kov ragdho y honan, hag ev a dreylyas a-dro alena ha tremena yn-nans dhe Gilgal.’

¹³Pan dheuth Samuel dhe Sowl, Sowl a leveris dhodho, ‘Bennigys re bi gans an ARLOEDH; my re gollenwis gorhemmynn an ARLOEDH.’

¹⁴Mes Samuel a worthybis, ‘Pandr'a styr an son ma a dheves y'm diwskovarn, ha son an gwarthek esov vy ow klewes?’

¹⁵Ha Sowl a leveris, ‘I re's dros dhiworth an Amalekysi; rag an bobel a sparyas an gwella a'n deves ha'n gwarthek, dhe sakrifia dhe'n ARLOEDH dha Dhuw; ha'n remenant ni re dhistruis glan.’

¹⁶Ena Samuel a leveris dhe Sowl, ‘Taw! My a dheriv orthis an pyth a leveris an ARLOEDH dhymm nyhewer.’ Hag ev a worthybis, ‘Kows.’

¹⁷Yn-medh Samuel, ‘Kynth es distyr y'th lagas dha honan, a ny veus gwrys penn loethow Ysrael? An ARLOEDH a'th untyas myghtern war Ysrael.

¹⁸Ha'n ARLOEDH a'th tannvonas war an fordh, ha leverel, “Ke, distru glan an beghadoryon, an Amalekysi, batel er aga fynn erna vons diswrys.”

¹⁹Ytho prag na obaysys lev an ARLOEDH? Prag y koedhsys war an preydh, ha gul drog yn golok an ARLOEDH?’

²⁰Sowl a leveris dhe Samuel, ‘My re obayas lev an ARLOEDH, my res eth war an vyaj a wrug an ARLOEDH ow dannvon warnodho, ha my re dhros Agag myghtern Amalek, ha my re dhistruis glan an Amalekysi.

²¹Mes dhiworth an preydh an bobel a gemmeras deves ha gwarthek, an gwella a'n taklow sakrys rag distruyans, dh'aga sakrifia dhe'n ARLOEDH dha Dhuw yn Gilgal.’

²²Hag yn-medh Samuel, ‘A gyv an ARLOEDH plesour meurra yn offrynnow leskys ha sakrifisow, ages yn obayans lev an ARLOEDH? Yn sur, obaya yw gwell ages sakrifia, ha goslowes ages blonek hordhes.

²³Rag rebellyans yw avel pegh dewinieth, ha gorthter yw kepar ha kammweyth ha gordhyans idolys. Drefenn ty dhe skonya ger an ARLOEDH, ev ynwedh re'th skonyas a vones myghtern.’

²⁴Ha Sowl a leveris dhe Samuel, ‘My re beghas; my a gammdremenas erbynn gorhemmynn an ARLOEDH ha'th eryow, drefenn my dhe berthi own a'n bobel hag obaya aga lev.

²⁵Ha lemmyn, my a'th pys, gav ow fegh, ha dehwel genev, may hallav gordhya an ARLOEDH.’

²⁶Samuel a leveris dhe Sowl, ‘Ny vynnav dehweles genes; drefenn ty dhe skonya ger an ARLOEDH, ha'n ARLOEDH re'th skonyas a vones myghtern war Ysrael.’

²⁷Ha pan dreylyas Samuel dhe vones dhe-ves, Sowl a settyas dalghenn yn lostenn y vantell, ha'y skwardya.

²⁸Ha Samuel a leveris dhodho, ‘An ARLOEDH re skwardyas gwlaskor Ysrael dhiworthis y'n jydh hedhyw, ha'y ri dhe gentrevek ahanas, neb yw gwell agesos.

²⁹Hag ynwedh, ny wra Splannder Ysrael naneyl toella na treylya y vrys.’

³⁰Ena Sowl a leveris, ‘My re beghas; hwath enor dhymm lemmyn a-dherag henavogyon ow fobel hag a-dherag Ysrael, ha dehwel genev, may hallav gordhya dha Dhuw.’

³¹Yndella Samuel a dreylyas arta war-lergh Sowl; ha Sowl a wordhyas an ARLOEDH.

³²Ena Samuel a leveris, ‘Dro Agag myghtern Amalek omma dhymm.’ Hag y teuth Agag dhodho yn kargharow.[12] Agag a leveris, ‘Yn sur hwerowder mernans yw tremenys.’

³³Mes Samuel a leveris, ‘Kepar dell wrug dha gledha benynes dhe vos anvap, yndella y fydh dha vamm anvap yn mysk benynes.’ Ha Samuel a hakkyas Agag dhe demmyn a-dherag an ARLOEDH yn Gilgal.

³⁴Ena Samuel eth dhe Rama; ha Sowl eth yn-bann dh'y ji yn Gibea a Sowl.

³⁵Ny dheuth Samuel namoy dhe weles Sowl bys yn dydh y vernans, mes grevya a wrug Samuel drefenn Sowl. Ha'n ARLOEDH a'n jevo edrek drefenn ev dhe wul Sowl myghtern war Ysrael.