Read Kernewek 1 Samuel 17 Bible Online

1 Samuel 17 - Kernewek bible

1 Samuel 17

¹Lemmyn an Filistysi a guntellas aga luyow war-barth dhe vatalyas; i a veu omguntellys war-barth yn Soko, a bew Yuda, hag i a gampyas yntra Soko hag Azeka, yn Efes-dammim.

²Sowl ha gwer Ysrael a omguntellas, ha kampya ryb nans Ela, hag araya aga honan rag kas erbynn an Filistysi.

³An Filistysi a sevis war venydh a'n eyl tu, hag Ysrael a sevis war venydh a'n tu arall, hag yth esa nans yntredha.

⁴Hag y teuth yn-mes a gamp an Filistysi kampyer, ha'y hanow Goliath a Gath, neb o hwegh kevelin ha dornva yn ughelder.

⁵Yth esa basnett a vrons war y benn, ha ev o ervys gans kaspows; ha poes an bows o pymp mil shekel a vrons.

⁶Yth esa dhodho arvow a vrons war y dhiwarr ha guw a vrons ynter y dhiwskoedh.

⁷Sheft y wuw o kepar ha gwelenn gwiader, ha poes penn y wuw o hwegh kans shekel a horn; ha'y skoeswas eth a-dheragdho.

⁸Ev a sevis ha garma dhe luyow Ysrael, ha leverel dhedha, ‘Prag y teuvewgh yn-mes dhe araya agas honan rag kas? A nyns ov vy Filistyas, hag a nyns owgh hwi gwesyon Sowl? Dewisiwgh gour ragowgh agas honan, ha gesiwgh ev dhe dhos yn-nans dhymm.

⁹Mar kyll ev omladh genes, ha'm ladha, ena ni a vydh agas kethwesyon; mes mar kwarthevyav er y bynn ha'y ladha, ena hwi a vydh agan kethwesyon ha hwi a'gan serv.’

¹⁰Hag yn-medh an Filistyas, ‘Hedhyw my a dhefi luyow Ysrael; rewgh dhymm gour, may hyllyn omladh war-barth.’

¹¹Pan leveris Sowl hag oll Ysrael geryow an Filistyas ma, sowdhenys ha dyegrys ens.

¹²Lemmyn Davydh o mab an Efrathyas a Bethlehem yn Yuda, ha'y hanow Yesse, hag yth esa dhodho eth mab. Yn dydhyow Sowl an gour o seulabrys koth, gyllys y'n blydhynyow.

¹³An tri hottha mebyon a Yesse eth ha holya Sowl dhe'n vatel; henwyn y dri mab neb eth dhe'n vatel o Eliab an kynsa-genys, ha'n nessa dhodho Abinadab, ha'n tressa Shamma.

¹⁴Davydh o an yowynka; ha'n tri hottha a holyas Sowl,

¹⁵mes Davydh a wre mos ha dehweles a Sowl dhe vaga deves y das yn Bethlehem.

¹⁶Rag dew-ugens dydh an Filistyas a dho yn-rag ha sevel a-dheragdha myttin ha gorthugher.

¹⁷Lemmyn Yesse a leveris dh'y vab Davydh, ‘Kemmer rag dha vreder efa a'n ys rostys ma, ha'n deg torth-vara ma, ha poen dhe'n gamp dhe'th vreder;

¹⁸ha kemmer an deg rann ma a geus dhe bennhembrenkyas aga mil. Ha gwel fatell yw gans dha vreder, ha dri neb tokyn anedha.’

¹⁹Lemmyn yth esa Sowl, hag i, hag oll gwer Ysrael, yn nans Ela, ow patalyas orth an Filistysi.

²⁰Davydh a sevis myttin a-varr, ha gasa an deves gans gwithyas, ha kemmeres an sosten, ha mos kepar dell wrussa Yesse erghi dhodho. Ev a dheuth dhe'n kamp yn kettermyn dell esa an lu ow mos yn-rag dhe'n vatel, ow karma rag an vatel.

²¹Ysrael ha'n Filistysi a arayas aga honan rag kas, lu a-dal lu.

²²Davydh a asas y daklow yn dorn gwithyas an fardellow, ha poenya a-ji dhe'n lu ha salusi y vreder.

²³Pan esa ev ow kewsel gansa, an kampyer, an Filistyas a Gath, Goliath y hanow, a dheuth yn-bann mes a linenn vatel an Filistysi, ha kewsel an keth geryow ha kyns. Ha Davydh a'n glewas.

²⁴Oll gwer Ysrael, pan welsons an gour, a fias anodho, ha perthi own bras.

²⁵Ha gwer Ysrael a leveris, ‘A welsowgh an gour ma neb a dheuth yn-bann? Yn sur ev re dheuth yn-bann dhe dhefia Ysrael. An myghtern a wra rych an gour neb a'n ladh, ha ri dhodho y vyrgh ha gul y deylu rydh a doll yn Ysrael.’

²⁶Davydh a leveris dhe'n wer esa sevys rybdho, ‘Pandr'a vydh gwrys rag an gour neb a ladh an Filistyas ma, ha kemmeres dhe-ves an meth dhiworth Ysrael? Rag piw yw an Filistyas antrodreghys ma may hyll ev defia luyow an Duw bew?’

²⁷An bobel a worthybis dhodho war-lergh an vaner ma, ow leverel, ‘Yndella y fydh gwrys rag an gour neb a'n ladh.’

²⁸Eliab y gottha broder a'n klewas pan gewsis ev dhe'n wer; ha sorr Eliab a dhewis erbynn Davydh, hag ev a leveris, ‘Prag y teuthys yn-nans omma? Piw ganso y hwruss'ta gasa an deves boghes na y'n gwylvos? My a woer dha valghder ha sherewynsi dha golonn; rag ty re dheuva yn-nans rag may halles gweles an vatel.’

²⁹Hag yn-medh Davydh, ‘Pandr'a wrug vy lemmyn? A nyns eus gwir dhe gewsel?’

³⁰Hag ev a dreylyas dhe-ves anodho war-tu gour arall, ha kewsel war-lergh an keth vaner; ha'n bobel a'n worthybis arta war-lergh an vaner kyns.

³¹Pan veu klewys an geryow a gewsis Davydh, i a's dasleveris a-dherag Sowl; hag ev a dhannvonas war y lergh.

³²Davydh a leveris dhe Sowl, ‘Na wres kolonn denvyth fyllel a'y wovis ev; dha was a wra mos hag omladh gans an Filistyas ma.’

³³Ha Sowl a leveris dhe Davydh, ‘Ny yllydh mones erbynn an Filistyas ma dhe omladh ganso; rag ty yw marnas maw, hag ev re beu kasor a-dhia y yowynkneth.’

³⁴Mes Davydh a leveris dhe Sowl, ‘Dha was a witha deves rag y das, ha peskweyth may teu lew po ors, ha kemmeres oen mes a'n flokk,

³⁵my eth yn-mes ha'y siwya, ha'y weskel dhe'n leur, ha delivra an oen mes a'y anow; ha mar treylya er ow fynn, my a'n dalghennsa gans y varv, ha'y weskel dhe'n leur, ha'y ladha.

³⁶Dha was re ladhas lewyon hag orses; ha'n Filistyas antrodreghys ma a vydh kepar hag onan anedha, a-ban wrug ev defia luyow an Duw bew.’

³⁷Yn-medh Davydh, ‘An ARLOEDH neb a'm delivras dhiworth paw an lew ha dhiworth paw an ors, ev a'm delirv dhiworth dorn an Filistyas ma.’ Ha Sowl a leveris dhe Davydh, ‘Ke, ha re bo an ARLOEDH genes.’

³⁸Sowl a gwethas Davydh gans y arvow; ev a worras basnett a vrons war y benn ha'y gwetha gans kaspows.

³⁹Davydh a wrogysas y gledha war y arvow, hag yn euver ev a assayas kerdhes, rag nyns o ev usys dhedha. Ha Davydh a leveris dhe Sowl, ‘Ny allav kerdhes gansa; rag nyns ov usys dhedha.’ Ytho Davydh a's removas anodho.

⁴⁰Ena ev a gemmeras y lorgh yn y dhorn, ha dewis ragdho pymp bilienn mes a'n gover, ha'ga gorra yn y sagh bugel deves, y'n skryp, hag yth esa y dowlbrenn yn y dhorn, hag ev a dheuth nes dhe'n Filistyas.

⁴¹An Filistyas a dheuth yn-rag ha dos nes dhe Davydh, gans y skoeswas a-dheragdho.

⁴²Ha pan viras a-dro ha gweles Davydh, ev a'n dispresyas, rag ev o marnas maw, rudhik ha teg y semlans.

⁴³An Filistyas a leveris dhe Davydh, ‘Ov vy ki, may teudh dhymm gans lorghow?’ Ha'n Filistyas a vollethis Davydh dre y dhuwow.

⁴⁴Hag yn-medh an Filistyas dhe Davydh, ‘Deus dhymm, ha my a re dha gig dhe ydhyn an ayr ha dhe vestes an gwel.’

⁴⁵Mes Davydh a worthybis dhe'n Filistyas, ‘Ty a dheu er ow fynn gans kledha ha gans guw ha gans skoes; mes my a dheu er dha bynn yn hanow ARLOEDH an luyow, Duw luyow Ysrael, neb re wruss'ta y dhefia.

⁴⁶Y'n jydh hedhyw an ARLOEDH a wra dha dhelivra y'm leuv, ha my a'th wysk dhe'n leur ha treghi dhe-ves dha benn; ha my a re korfow marow lu an Filistysi y'n jydh hedhyw dhe ydhyn an ayr ha dhe vestes an dor, may hwodhvo oll an norvys bos Duw yn Ysrael,

⁴⁷ha may hwodhvo oll an kuntelles na wra an ARLOEDH sawya dre gledha ha guw; rag yma an vatel dhe'n ARLOEDH hag ev a'th re yn agan leuv.’

⁴⁸Pan dheuth an Filistyas nes dhe dhyerbynna Davydh, Davydh a boenyas yn uskis war-tu an linenn vatel dhe dhyerbynna an Filistyas.

⁴⁹Ha Davydh a worras y leuv yn y sagh, ha kemmeres men yn-mes, ha'y worra yn y dowlbrenn ha'y dewlel ha gweskel an Filistyas war y dal; an men a dhewanas y dal, hag ev a goedhas ha'y fas dhe'n leur.

⁵⁰Ytho Davydh a warthevyas war an Filistyas dre dowlbrenn ha dre ven, ha gweskel dhe'n leur an Filistyas ha'y ladha; mes nyns esa kledha vyth yn dorn Davydh.

⁵¹Rakhenna Davydh a boenyas ha sevel war an Filistyas; ev a dhalghennas y gledha, ha'y denna mes a'y woen, ha'y ladha; ena ev a droghas dhe-ves y benn dredho. Pan welas an Filistysi bos aga hampyer marow, i a fias.

⁵²Ha gwer Ysrael ha Yuda a sevis ha garma ha helghya an Filistysi bys yn Gath ha yetys Ekron may koedhas an Filistysi ledhys war an fordh a-dhiworth Shaaraym bys yn Gath hag Ekron.

⁵³An Ysraelysi a dhehwelis dhiworth helghya an Filistysi, hag i a byllas aga hamp.

⁵⁴Davydh a gemmeras penn an Filistyas ha'y dhri dhe Yerusalem; mes ev a worras y arvow yn y dylda.

⁵⁵Ha pan welas Sowl bos Davydh ow mos yn-rag erbynn an Filistyas, ev a leveris dhe Abner, kaslewydh an lu, ‘Abner, piw yw an gour yowynk ma mab dhodho?’ Hag yn-medh Abner, ‘Dell vew dha enev, A vyghtern, ny wonn.’

⁵⁶Ha'n myghtern a leveris, ‘Govynn piw yw an yonker mab dhodho.’

⁵⁷Pan dhehwelis Davydh dhiworth ladhva an Filistysi, Abner a'n kemmeras ha'y dri a-dherag Sowl, gans penn an Filistyas yn y leuv.

⁵⁸Yn-medh Sowl dhodho, ‘Piw osta mab dhodho, ty wour yowynk?’ Ha Davydh a worthybis, ‘My yw mab dha was Yesse an Bethlehemyas.’