Read Kernewek 1 Samuel 19 Bible Online

1 Samuel 19 - Kernewek bible

1 Samuel 19

¹Sowl a gewsis orth y vab Yonathan ha gans oll y wesyon a-dro dhe ladha Davydh. Mes Yonathan mab Sowl a gemmeras delit meur yn Davydh.

²Yonathan a dherivas orth Davydh, ‘Ow thas Sowl a vynn dha ladha; rakhenna bydh war ternos vyttin; gorta yn tyller kevrinek hag omgudh.

³My a wra mos yn-mes ha sevel ryb ow thas y'n gwel mayth esos, ha my a gews gans ow thas a-dro dhis; ha'n pyth a welav my a dheriv dhis.’

⁴Ha Yonathan a gewsis da a-dro dhe Davydh dhe Sowl y das, ha leverel dhodho, ‘Na wres an myghtern pegha erbynn y was Davydh, rag ny beghas er dha bynn, ha'y weythresow ragos re beu pur dha;

⁵rag ev a worras y vewnans yn y leuv ha ladha an Filistyas, ha'n ARLOEDH a dhros trygh meur rag oll Ysrael. Ty a'n gwelas ha lowenhe; prag y fynnydh pegha erbynn goes gwiryon, dhe ladha Davydh heb ken?’

⁶Ha Sowl a woslowas orth lev Yonathan; ha Sowl a dos, ‘Dell vew an ARLOEDH, ny vydh ev gorrys dhe'n mernans.’

⁷Ha Yonathan a elwis Davydh ha derivas oll an traow ma dhodho. Ha Yonathan a dhros Davydh dhe Sowl, hag yth esa ev yn y lok, kepar ha kyns.

⁸Yth esa bresel arta, ha Davydh eth yn-mes dhe vatalyas orth an Filistysi. Ev a's ladhas gans ladhva veur, hag i a fias a-ragdho.

⁹Ena tebel spyrys dhiworth an ARLOEDH a dheuth war Sowl, hag ev owth esedha yn y ji gans y wuw yn y dhorn, ha Davydh ow telynnya gans y leuv.

¹⁰Sowl a assayas dhe gentra Davydh dhe'n paros der an guw; mes ev a wohelas Sowl, may hweskis ev an guw y'n fos. Davydh a fias ha diank an nos na.

¹¹Sowl a dhannvonas kannasow dhe ji Davydh dhe aspia orto ha dh'y ladha myttinweyth. Ha Mikal gwreg Davydh a dherivas orto, ‘Mar ny sawydh dha vewnans haneth, a-vorow ty a vydh ledhys.’

¹²Ytho Mikal a iselhas Davydh yn-nans der an fenester: hag ev eth ha fia ha diank.

¹³Mikal a gemmeras idol ha'y worra war an gweli; hi a worras kolghes a vlew gever war y benn, ha'y gwetha gans dillas.

¹⁴Pan dhannvonas Sowl kannasow dhe gemmeres Davydh, yn-medh hi, ‘Ev yw klav.’

¹⁵Ha Sowl a dhannvonas an kannasow arta dhe weles Davydh ragdha aga honan, ow leverel, ‘Drewgh ev yn-bann dhymm y'n gweli, may hallav y ladha.’

¹⁶Ha pan dheuth an kannasow a-ji, yth esa an idol y'n gweli, gans kolghes a vlew gever orth y benn.

¹⁷Yn-medh Sowl dhe Mikal, ‘Prag y hwruss'ta ow thoella yndellma, ha gasa ow eskar dhe vones, may tienkas?’ Ha Mikal a worthybis Sowl, ‘Ev a leveris dhymm, “Gas vy dhe vones, poken my a'th ladh.” ’

¹⁸Lemmyn Davydh a fias ha diank; ev a dheuth dhe Samuel yn Rama, ha derivas dhodho oll re wrussa Sowl dhodho. Ev ha Samuel eth ha triga yn Nayoth.

¹⁹Y feu derivys dhe Sowl, ‘Ottomma Davydh yn Nayoth yn Rama.’

²⁰Ena Sowl a dhannvonas kannasow dhe gemmeres Davydh. Pan welsons kowethas an brofoesi ow profoesa, gans Samuel ow sevel avel penn warnedha, spyrys Duw a dheuth war gannasow Sowl, hag i ynwedh a brofoesas.

²¹Ha pan veu hemma derivys dhe Sowl, ev a dhannvonas kannasow arta tressa gweyth, hag i ynwedh a brofoesas.

²²Ena ev y honan eth dhe Rama. Ev a dheuth dhe'n puth bras usi yn Seku. Ev a wovynnas, ‘Ple'ma Samuel ha Davydh?’ Ha nebonan a worthybis ‘Ymons i yn Nayoth yn Rama.’

²³Ytho ev eth di, dhe Nayoth yn Rama; ha spyrys Duw a dheuth warnodho. Yth esa ow mos yn-rag ow brofoesa, bys pan dheuth dhe Nayoth yn Rama.

²⁴Hag ev ynwedh a removas y dhillas, ha profoesa a-dherag Samuel yn kepar maner. Ev a wrowedhas noeth oll an jydh na hag oll an nos na. Rakhenna leverys yw, ‘Usi Sowl ynwedh yn mysk an brofoesi?’