Read Kernewek 1 Samuel 2 Bible Online

1 Samuel 2 - Kernewek bible

1 Samuel 2

¹Ena Hanna a bysis ha leverel, ‘Ow holonn a lowenha y'n ARLOEDH; ow horn yw ughelhes y'n ARLOEDH. Ow ganow yw moghhes dres ow eskerens, drefenn my dhe lowenhe y'th selwyans.

²‘Nyns eus Sans kepar ha'n ARLOEDH, nyns eus nagonan marnas ty; nyns eus karrek kepar ha'gan Duw.

³Na gewsiwgh prest namoy mar brout, na wres balghder dos a-dhiworth agas ganow; rag an ARLOEDH yw Duw a skians, ha ganso gwriansow yw poesys.

⁴Gwaregow gwer alloesek yw terrys, ha'n re a drebuch yw grogysys gans nerth.

⁵An re leun re werthas aga lavur rag bara, mes an re nownek ny's teves nown namoy. An anvap re dhineythis seyth, mes hi neb a's teves lies flogh a wedher.

⁶An ARLOEDH a ladh ha bewhe; ev a dhre dhe ifarn ha drehevel yn-bann.

⁷An ARLOEDH a wra boghosek ha gul rych; ev a iselha, hag ev a ughelha.

⁸Ev a dhrehav an den gwann yn-mes a'n doust; ev a dhrehav an boghosek yn-mes a'n lusuek, dh'aga settya gans pennsevigyon, ha gul dhedha erita tron a enor. Rag yma selyow an norvys dhe'n ARLOEDH, hag ev re settyas an norvys warnedha.

⁹‘Ev a with treys y dus lel, mes an debeles a vydh tawesek yn tewlder; rag dre alloes ny wra denvyth gwarthevya.

¹⁰Eskerens an ARLOEDH a vydh brewys; ev a darenn er aga fynn a-dhiworth nev. An ARLOEDH a vreus pennow an nor; ev a re galloes dh'y vyghtern, hag ughelhe korn y untys.’

¹¹Ena Elkana eth dhe Rama dh'y ji, hag yth esa an maw ow servya a-dherag an ARLOEDH y'n lok Eli.

¹²Lemmyn mebyon Eli o mebyon Belial; ny aswonnens an ARLOEDH.

¹³Us an oferysi gans an bobel o, pan offrynna neb gour sakrifis, gwas an oferyas a dho yn kettermyn dell esa an kig ow pryjyon, gans kigver a dri dans yn y dhorn,

¹⁴hag ev a'n pokya y'n pott, po y'n kowdarn, po y'n pott, ha pup-tra a wre an kigver y dhri yn-bann an oferyas a gemmeri ragdho y honan. Yndella i a wre yn Shilo dhe oll tus Ysrael hag a dho di.

¹⁵Ynwedh, kyns i dhe leski an blonek, gwas an oferyas a dho ha leverel dhe'n gour esa ow sakrifia, ‘Ro dhymm kig rag an oferyas dh'y rostya; rag ny vynn ev kavoes kig bryjys a-dhiworthis, mes kriv.’

¹⁶Ha mar leveri an gour dhodho, ‘Gas i dhe leski an blonek kynsa, hag ena kemmer kekemmys a vynnydh’, ev a worthybi, ‘Nansi, mes ro e dhymm lemmyn, poken my a'n kemmer gans fors.’

¹⁷Yndella peghosow an wer yowynk o pur vras yn golok an ARLOEDH; rag an wer a dhyghtya gans bismer offrynn an ARLOEDH.

¹⁸Mes yth esa Samuel ow servya a-dherag an ARLOEDH, maw dell o, grogysys gans efod a lien.

¹⁹Y vamm a wre ragdho goen byghan ha'y dri dhodho pub blydhen, pan e hi yn-bann gans hy gour dhe offrynna an sakrifis blydhenyek.

²⁰Ena Eli a benniga Elkana ha'y wreg, ha leverel, ‘Re rollo an ARLOEDH dhis fleghes dre an venyn ma yn le an brestenn a wrug hi dhe'n ARLOEDH’; hag ena i a dhehweli dhe dre.

²¹Ha'n ARLOEDH a vysytyas Hanna; hi a omdhuk ha dineythi tri mab ha diw vyrgh. Ha'n maw Samuel a devis yn lok an ARLOEDH.

²²Lemmyn pur goth o Eli. Ev a glewas pup-tra mayth esa y vab orth y wul dhe Ysrael oll, ha fatell wrowedhens gans an benynes neb a servya orth daras tylda an kuntelles.

²³Hag ev a leveris dhedha, ‘Prag y hwrewgh hwi traow a'n par na? Rag my a glew a-dro dh'agas drogoberow a-dhiworth oll an dus ma.

²⁴Nansi, ow mebyon; rag nyns yw derivas da a glewav ow lesa yn mysk pobel an ARLOEDH.

²⁵Mar pegh unn gour erbynn gour arall, Duw a vreus yntredha; mes mar pegh gour erbynn an ARLOEDH, piw a vydh an pledyas ragdho?’ Mes ny woslowsons orth lev aga thas; drefenn bos bodh an ARLOEDH aga ladha.

²⁶Ha'n maw Samuel a besyas tevi yn ughelder hag yn favour gans an ARLOEDH hag ynwedh gans tus.

²⁷Lemmyn gour Duw a dheuth dhe Eli ha leverel dhodho, ‘Yndellma y lever an ARLOEDH, “A ny dhiskwedhis vy ow honan yn kler dhe ji dha das pan esens yn Ejyp yn chi Faro?

²⁸My a'n dewisas mes a oll loethow Ysrael dhe vos ow oferyas, dhe vones yn-bann dhe'm alter, dhe wul sakrifisow, dhe wiska efod a-dheragov; ha my a ros dhe ji dha das oll an offrynnow gwrys gans tan gans tus Ysrael.

²⁹Prag y potyowgh orth ow sakrifis hag orth ow offrynn re worhemmynnis vy dhywgh rag ow thrigva, hag enora dha vebyon moy agesov, ow tewhe agas honan war an gwella rannow a bub offrynn a'm pobel Ysrael?”

³⁰Rakhenna an ARLOEDH, Duw Ysrael a dhiskler: “My a leveris yn hwir dha ji ha chi dha das dhe gerdhes a-dheragov bys vykken”; mes lemmyn an ARLOEDH a dhiskler: “Pell bedhes dhiworthiv; rag an re neb a'm enor my a enor, ha'n re neb a'm dispres a vydh dyghtys gans bismer.

³¹Otta, yma dydhyow ow tos may troghav dhe-ves dha nerth ha nerth chi dha das, rag ny vydh den koth y'th chi.

³²Hag ena ty a wel ahwer y'm trigva. Spit dhe oll an siwenyans a dheu dhe Ysrael, ny vydh nevra den koth y'th chi bys vykken.

³³Ha'n gour ahanas na droghav dhe-ves a-dhiworth ow alter my a spar, dhe wul dhe'th tewlagas fyllel, ha grevya dha golonn; hag oll an re yw genys dhe'th teylu a verow avel gwer yn flour aga gourses.

³⁴Hemma a vydh arwoedh dhis, a dheu war dha dhew vab, Hofni ha Finehas: aga dew a verow war an keth jydh.

³⁵Ha my a dhrehav ragov ow honan oferyas lel, neb a wra war-lergh an pyth usi y'm kolonn ha'm brys. My a dhrehav ragdho chi sur, hag ev a gerdh a-dherag ow untys bys vykken.

³⁶Ena peub yw gesys y'th chi a dheu ha plegya dhe'n dor a-ragdho rag tamm a arghans ha torth-vara, ha leverel, Gorr vy, my a'th pys, yn neb soedh oferyasek, rag may hallav dybri tamm a vara.” ’