Read Kernewek 1 Samuel 22 Bible Online

1 Samuel 22 - Kernewek bible

1 Samuel 22

¹Davydh eth alena ha diank dhe gav Adullam; ha pan glewas y vreder hag oll chi y das a-dro dhodho, i eth yn-nans bys di dhodho.

²Ha pub gour esa yn ahwer, ha pub gour esa yn kendon ha pub gour a'n jevo hwerowder yn y enev, a omguntellas dhodho; hag ev a dheuth ha bos kapten warnedha. Hag yth esa ganso a-dro dhe beswar kans gour.

³Davydh eth alena dhe Mispa a Moab. Ev a leveris dhe vyghtern Moab, ‘My a'th pys, gas ow thas ha'm mamm dhe dhos dhis, erna wodhviv pandr'a wra Duw ragov.’

⁴Ytho ev a's dros a-dherag myghtern Moab, hag yth esens trigys ganso dres oll an termyn mayth esa Davydh a-ji dhe'n skons.

⁵Ena an profoes Gad a leveris dhe Davydh, ‘Na wra triga y'n skons; dibarth, ha ke dhe bow Yuda.’ Ytho Davydh a dhibarthas, ha mos dhe goeswik Hareth.

⁶Lemmyn Sowl a glewas Davydh ha'n wer esa ganso dhe vos diskudhys. Yth esa Sowl owth esedha yn Gibea, yn-dann an damariskenn war an vre, ha'y wuw yn y dhorn, hag yth esa oll y wesyon ow sevel yn y gyrghynn.

⁷Sowl a leveris dh'y wesyon esa ow sevel a-dro dhodho, ‘Goslowewgh lemmyn, hwi Benyaminysi; a vynn mab Yesse ri dhywgh hwi oll parkow ha gwinlannow, a vynn ev agas gul hwi oll kaptenyon a vilyow ha kaptenyon a gansow?

⁸Hwi oll re vrasas er ow fynn, ha nyns eus nagonan neb a dhiskwa dhymm ow mab dhe wul keffrysyans gans mab Yesse, ha nyns eus nagonan ahanowgh a berth ahwer ahanav, na diskwedhes dhymm ow mab dhe ynnia ow gwas er ow fynn, dhe'm kontrewaytya, kepar dell wra y'n jydh hedhyw.’

⁹Ena Doeg an Edomyas, neb o settys dres wesyon Sowl, a worthybis, ‘My a welas mab Yesse ow tos dhe Nob, dhe Ahimelek mab Ahitub;

¹⁰ev a wovynnas orth an ARLOEDH ragdho, ha ri dhodho boes, ha ri dhodho kledha Goliath an Filistyas.’

¹¹Ena an myghtern a dhannvonas war-lergh an oferyas Ahimelek mab Ahitub, hag oll chi y das, an oferysi esa yn Nob; hag i oll a dheuth dhe'n myghtern.

¹²Yn-medh Sowl, ‘Goslow lemmyn, ty vab Ahitub.’ Hag ev a worthybis, ‘Ottavy, ow arloedh.’

¹³Yn-medh Sowl dhodho, ‘Prag y hwruss'ta brasa er ow fynn, ty ha mab Yesse, pan resys dhodho bara, ha kledha, ha ty a wovynnas orth Duw ragdho, may saffo er ow fynn, dhe'm kontrewaytya, kepar dell wra y'n jydh hedhyw?’

¹⁴Ena Ahimelek a worthybis dhe'n myghtern, ha leverel, ‘Piw eus yn mysk oll dha wesyon mar lel avel Davydh? Mab dre lagha an myghtern yw ev, ha kapten dha gorfwithysi, hag enorys yw y'th chi.

¹⁵Yw hedhyw an kynsa gweyth my dhe wovynn orth Duw ragdho? Pell bedhes dhiworthiv! Na wres an myghtern askrifa travyth dh'y was, na dhe oll chi ow thas; rag ny wodhya dha was travyth a hemma, na byghan na bras.’

¹⁶Mes an myghtern a leveris, ‘Ty a verow yn sur, Ahimelek, ty hag oll chi dha das.’

¹⁷Ha'n myghtern a leveris dhe'n gorfwithysi esa ow sevel a-dro dhodho, ‘Treylyewgh, ha ledhewgh oferysi an ARLOEDH, drefenn bos aga leuv ynwedh gans Davydh; ha drefenn i dhe wodhvos ev dhe fia, ha ny'n derivsons dhymm.’ Mes ny vynna gwesyon an myghtern ystynn aga dorn dhe goedha war oferysi an ARLOEDH.

¹⁸Ena an myghtern a leveris dhe Doeg, ‘Ty, Doeg, treyl ha koedh war an oferysi.’ Ytho Doeg an Edomyas a dreylyas ha koedha war an oferysi, ha ladha y'n jydh na pymp gour ha peswar-ugens neb a wiska efod a lien.

¹⁹Ha Nob, sita an oferysi, ev a weskis gans min an kledha, gwer ha benynes, fleghes ha fleghigow, hag oghen, hag asenes, ha deves, gans min an kledha.

²⁰Mes onan a vebyon Ahimelek mab Ahitub, Abiathar y hanow, a dhienkas fia dhe holya Davydh.

²¹Abiathar a dherivas orth Davydh Sowl dhe ladha oferysi an ARLOEDH.

²²Yn-medh Davydh dhe Abiathar, ‘My a wodhya y'n jydh na, pan esa Doeg an Edomyas ena, ev dhe vynnes yn sur derivas dhe Sowl. My re beu an kaws a vernans oll chi dha das.

²³Trig genev, ha na borth own; rag ev neb a hwila ow bewnans vy a hwila dha vewnans jy; ty a vydh saw genev.’