Read Kernewek 1 Samuel 23 Bible Online

1 Samuel 23 - Kernewek bible

1 Samuel 23

¹Lemmyn i a dherivas dhe Davydh, ow leverel, ‘Otta, yma an Filistysi ow patalyas orth Keila, hag yth esons ow pylla an leuryow-drushya.’

²Davydh a wovynnas orth an ARLOEDH, ‘A wrav vy mos ha gweskel an Filistysi ma?’ Ha'n ARLOEDH a leveris dhe Davydh, ‘Ke ha gwask an Filistysi, ha saw Keila.’

³Mes gwer Davydh a leveris dhodho, ‘Otta, ni a berth own omma yn Yuda; pygemmys moy ytho mars ellen dhe Keila erbynn luyow an Filistysi?’

⁴Ena Davydh a wovynnas orth an ARLOEDH arta. Ha'n ARLOEDH a worthybis dhodho ha leverel, ‘Sav, Ke yn-nans dhe Keila; rag my a re an Filistysi a-berth y'th leuv.’

⁵Yndella Davydh ha'y wer eth dhe Keila, hag omladh erbynn an Filistysi, ha ledya dhe-ves aga chatel. Ev as gweskis gans ladhva veur. Ha Davydh a sawyas trigoryon Keila.

⁶Pan fias Abiathar mab Ahimelek dhe Davydh yn Keila, ev a dheuth yn-nans gans Efod yn y dhorn.

⁷Y feu derivys dhe Sowl Davydh dhe dhos dhe Keila. Yn-medh Sowl, ‘Duw re'n delivras a-berth y'm leuv; rag ev re dhegeas y honan a-bervedh, owth entra yn sita a's teves porthow ha barrys.’

⁸Ha Sowl a elwis oll an wer war-barth rag bresel, dhe vones yn-nans dhe Keila, dhe omsettya a-dro dhe Davydh ha'y wer.

⁹Davydh a wodhya Sowl dhe vrasa drog er y bynn, hag ev a leveris dhe Abiathar an oferyas, ‘Dro omma an Efod.’

¹⁰Ena yn-medh Davydh, ‘A ARLOEDH, Duw Ysrael, dha was re glewas Sowl dhe hwilas dos dhe Keila, dhe dhistrui an sita a'm govis.

¹¹A wra Sowl dos yn-nans, dell glewas dha was? A ARLOEDH, Duw Ysrael, my a'th pys lavar dhe'th was.’ An ARLOEDH a leveris, ‘Ev a wra dos yn-nans.’

¹²Ena yn-medh Davydh, ‘A wra trigoryon Keila ow delivra my ha'm gwer yn-bann a-berth yn leuv Sowl?’ Hag yn-medh an ARLOEDH, ‘I a'th telirv yn-bann.’

¹³Ena Davydh ha'y wer, neb o a-dro dhe hwegh kans, a sevis ha diberth dhiworth Keila; i eth plepynag y hallens dos. Pan veu derivys dhe Sowl Davydh dhe dhiank dhiworth Keila, ev a astelas mos yn-rag.

¹⁴Yth esa Davydh trigys y'n gwylvos yn skonsow, yn bro venydhyek gwylvos Zif. Ha Sowl a'n hwilas pub dydh, mes ny wrug an ARLOEDH y dhelivra a-berth yn y leuv.

¹⁵Yth esa Davydh yn gwylvos Zif yn Horesh pan glewas ev Sowl dhe dhos yn-rag dhe hwilas y vewnans.

¹⁶Yonathan mab Sowl a sevis, ha mos dhe Davydh yn Horesh, hag ev a grevhas y leuv yn Duw.

¹⁷Yn-medh ev dhodho, ‘Na borth own; rag ny wra leuv ow thas Sowl dha gavoes; ha ty a vydh myghtern war Ysrael, ha my a vydh nessa dhis; ow thas Sowl ynwedh a woer y fydh yndella.’

¹⁸Ena aga dew a wrug ambos a-dherag an ARLOEDH; hag yth esa Davydh trigys yn Horesh, ha Yonathan eth dh'y dre.

¹⁹Ena an Zifysi a dheuth yn-bann dhe Sowl yn Gibea ow leverel, ‘A nyns usi Davydh owth omgudha genes yn skonsow Horesh, war venydh Hakila, usi a'n dhyghowbarth dhe Yeshimon?

²⁰Lemmyn, A vyghtern, peskweyth may fynni dos yn-nans, gwra yndella; hag y fydh ragon ni dh'y dhelivra a-berth yn leuv an myghtern.’

²¹Hag yn-medh Sowl, ‘Bennigys re bowgh gans an ARLOEDH; rag hwi re dhiskwedhas truedh troha my.

²²Kewgh, my a'gas pys, ombareusiwgh hwath moy; godhvydhewgh ha gwelewgh an tyller mayth yma ev ow taromres, ha piw re'n gwelas ena; rag derivys yw dhymm ev dhe vos pur fel.

²³Gwelewgh ha godhvydhewgh oll an kudhvaow mayth usi owth omgudha, ha dehwelewgh arta dhymm gans derivadow sur. Ena yth av genowgh; ha mars usi ev y'n vro, my a'n hwila yn-mes yn oll an kordhow a Yuda.’

²⁴Ytho i a sevis, ha mos dhe Zif kyns Sowl. Mes yth esa Davydh ha'y wer yn gwylvos Maon, y'n Araba a'n dhyghowbarth dhe Yeshimon.

²⁵Sowl ha'y wer eth dh'y hwilas. Pan veu derivys dhe Davydh, ev eth yn-nans dhe'n garrek ha triga yn gwylvos Maon. Ha pan glewas Sowl anodho, ev a helghyas Davydh a-ji dhe wylvos Maon

²⁶Sowl eth an tu ma a'n menydh, ha Davydh ha'y wer a'n tu arall a'n menydh. Yth esa Davydh ow fistena dhe vos dhe-ves dhiworth Sowl, ha Sowl ha'y wer a omsettyas a-dro dhe Davydh ha'y wer dh'aga hemmeres.

²⁷Ena kannas a dheuth dhe Sowl, ow leverel, ‘Fisten ha deus; rag an Filistysi re wrug omsettyans erbynn an tir.’

²⁸Ytho Sowl a dreylyas dhe-ves dhiworth helghya Davydh, ha mos erbynn an Filistysi; rakhenna an bobel a elwis an tyller Sela-hammahlekoth.[14]

²⁹Ena Davydh eth yn-bann alena, hag yth esa trigys yn skonsow En-gedi.[15]