Read Kernewek 1 Samuel 24 Bible Online

1 Samuel 24 - Kernewek bible

1 Samuel 24

¹Pan dhehwelis Sowl dhiworth helghya an Filistysi, y feu derivys dhodho, ‘Awotta, yma Davydh yn gwylvos En-gedi.’[16]

²Ena Sowl a gemmeras tri mil wour dewisys mes a oll Ysrael, ha mos dhe hwilas Davydh ha'y wer war garregi an gever gwyls.

³Ev a dheuth dhe gorlannow an deves ryb an fordh, mayth esa kav; ha Sowl eth a-bervedh dhe gudha y dhewdroes. Lemmyn yth esa Davydh ha'y wer owth esedha a-ji dhe dhowna rannow an kav.

⁴Gwer Davydh a leveris dhodho, ‘Otta an jydh may leveris an ARLOEDH dhis anodho, “My a dhelirv dha eskar a-berth y'th leuv, ha ty a wra dhodho kepar dell hevel da dhis.” ’ Ena Davydh eth ha treghi dhe-ves lostenn mantell Sowl yn-dann gel.

⁵Wosa henna Davydh a veu gweskys dhe'n golonn, drefenn ev dhe dreghi dhe-ves lostenn mantell Sowl.

⁶YN-medh ev dh'y wer, ‘An ARLOEDH difenn my dhe wul hemma dhe'm arloedh, untys an ARLOEDH, owth ystynn ow leuv er y bynn; rag ev yw untys an ARLOEDH.’

⁷Ytho Davydh a geredhis y wer gans an geryow ma, ha ny's gasas dhe sevel erbynn Sowl. Ena Sowl a sevis ha gasa an kav, ha mos war y fordh.

⁸Ena Davydh a sevis ha mos yn-mes a'n kav ha gelwel war-lergh Sowl, ow leverel, ‘Ow arloedh an myghtern.’ Ha pan dreylyas Sowl war-dhelergh, Davydh a blegyas gans y fas troha'n leur, ha plegya dhe'n dor.

⁹Yn-medh Davydh dhe Sowl, ‘Prag y hwoslowydh orth geryow an re a lever, “Otta Davydh a hwila gul drog dhis?”

¹⁰Y'n jydh hedhyw dha dhewlagas re welas fatell y'th ros an ARLOEDH a-berth y'm leuv a-ji dhe'n kav; ha leverys veu dhymm dhe'th ladha; mes my a'th sparyas. Yn-medhav “Ny vynnav ystynn ow leuv erbynn ow arloedh; rag ev yw untys an ARLOEDH.”

¹¹Mir, ow thas, mir orth lostenn dha vantell y'm leuv; rag drefenn my dhe dreghi dhe-ves lostenn dha vantell, ha ny'th ledhis, ty a woer ha gweles yn sur nag eus na drog na trayturi y'm leuv. Ny beghis er dha bynn, kynth esos orth ow helghya dhe gemmeres ow bewnans.

¹²Re vreusso an ARLOEDH yntra my ha ty. Re dallo an ARLOEDH dial ragov warnas; mes ny vydh ow leuv er dha bynn.

¹³Kepar dell lever henlavar an dus koth, “Dhiworth tebelwesyon a dheuth yn-rag sherewynsi”; mes ny vydh ow leuv er dha bynn.

¹⁴War-lergh piw a dheuva myghtern Ysrael yn-mes? War-lergh piw esos ow helghya? War-lergh ki marow? War-lergh hwannenn?

¹⁵Rakhenna re bo an ARLOEDH breusyas, ha breusi yntra my ha ty, ha gweles, ha pledya ow hen, ha'm delivra mes a'th leuv.’

¹⁶Wosa Davydh dhe worfenna kewsel an geryow ma orth Sowl, Sowl a leveris, ‘Yw hemma dha lev, ow mab Davydh?’ Ha Sowl a dhrehevis y lev hag oela.

¹⁷Yn-medh ev dhe Davydh, ‘Ty yw moy gwiryon agesov; rag ty re'm dyghtyas yn ta, mes my re'th tyghtyas yn trog.

¹⁸Y'n jydh hedhyw ty re dhiskwedhas fatell dhyghtsys genev yn ta; rag ny'm ledhsys pan y'm delivras an ARLOEDH a-berth y'th leuv.

¹⁹Rag piw re gavas eskar, ha dannvon an eskar dhe-ves yn saw? Ytho re'th tallo an ARLOEDH gans dader rag an pyth re wrussys dhymm y'n jydh hedhyw.

²⁰Lemmyn my a woer yn ta ty dhe vos yn sur myghtern war Ysrael, hag y fydh gwlaskor Ysrael fastys y'th leuv.

²¹To lemmyn dhymm re'n ARLOEDH, na dreghydh dhe-ves ow has war ow lergh, na distrui ow hanow mes a ji ow thas.’

²²Ytho Davydh a dos dhe Sowl. Ena Sowl eth dh'y dre; mes Davydh ha'y wer eth yn-bann dhe'n skons.