Read Kernewek 1 Samuel 26 Bible Online

1 Samuel 26 - Kernewek bible

1 Samuel 26

¹Ena an Zifysi a dheuth dhe Sowl yn Gibea ha leverel, ‘A ny omgudh Davydh war venydh Hakila, usi a-dal Yeshimon?’

²Ena Sowl a sevis ha mos yn-nans dhe wylvos Zif dhe hwilas Davydh, hag yth esa tri mil wour dhewisys a Ysrael ganso yn gwylvos Zif.

³Sowl a gampyas war venydh Hakila, usi a-dal Yeshimon ryb an fordh. Mes yth esa Davydh trigys y'n gwylvos. Pan welas ev Sowl dhe dhos war y lergh y'n gwylvos,

⁴Davydh a dhannvonas yn-mes aspioryon, hag ev a wodhya bos Sowl yn tevri devedhys.

⁵Ena Davydh a sevis ha dos dhe'n tyller may kampsa Sowl; ha Davydh a welas an tyller mayth esa Sowl ow krowedha, gans Abner mab Ner, pennhembrenkyas y lu. Yth esa Sowl ow krowedha a-ji dhe'n kamp, hag yth esa an bobel ow kampya a-dro dhodho.

⁶Ena Davydh a leveris dhe Ahimelek an Hittyas, ha dhe Abishay mab Seruya, broder Yoab, ‘Piw a vynn mones yn-nans genev a-ji dhe'n kamp dhe Sowl?’ Hag Abishay a worthybis, ‘My a vynn mones genes.’

⁷Ytho Davydh hag Abishay eth dhe'n lu y'n nos; hag otta, yth esa Sowl ow krowedha yn kosk a-ji dhe'n kamp, gans y wuw gweskys y'n dor orth y benn; hag yth esa Abner ha'n lu ow krowedha a-dro dhodho.

⁸Ena Abishay a leveris dhe Davydh, ‘Duw re dhelivras dha eskar a-berth y'th leuv y'n jydh hedhyw; lemmyn rakhenna gas vy dh'y weskel dhe'n dor, my a'th pys, gans unn pych a'n guw; ny'n gwaskav diwweyth.’

⁹Mes yn-medh Davydh dhe Abishay, ‘Na wra y dhistrui, rag piw a yll ystynn y leuv erbynn untys an ARLOEDH, ha bos heb kessydhyans?’

¹⁰Hag yn-medh Davydh ynwedh, ‘Dell vew an ARLOEDH, an ARLOEDH a'n gwysk dhe'n dor; po y jydh a dheu dhe verwel; po ev a wra mos yn-nans yn batel ha merwel.

¹¹An ARLOEDH difenn, my dhe ystynn ow leuv yn-rag erbynn untys an ARLOEDH; mes, my a'th pys, kemmer lemmyn an guw usi orth y benn, ha'n seth-dowr, ha deun.’

¹²Ytho Davydh a gemmeras an guw ha'n seth-dowr, hag i a omdennas. Ny'n gwelas denvyth, na'y wodhvos, na ny dhifunas denvyth; rag yth esens oll yn kosk, drefenn kosk down dhe goedha dhiworth an ARLOEDH warnedha.

¹³Ena Davydh eth a-dreus dhe'n tu arall, ha sevel war benn bre yn pellder, gans spas meur yntredha.

¹⁴Davydh a elwis dhe'n bobel, ha dhe Abner mab Ner, ha leverel. ‘Abner, a ny worthybydh?’ Ena Abner a worthybis, ‘Piw osta neb a elow dhe'n myghtern?’

¹⁵Ha Davydh a leveris dhe Abner, ‘A nyns osta gour? Piw yw kepar ha ty yn Ysrael? Prag na withsys war dha arloedh an myghtern. Rag onan a'n bobel a dheuth a-ji dhe dhistrui dha arloedh an myghtern.

¹⁶An dra ma re wrussys, nyns yw da. Dell vew an ARLOEDH, hwi a dhervynn an mernans, drefenn na withsowgh war agas arloedh, untys an ARLOEDH. Mir lemmyn, ple'ma guw an myghtern; po an seth-dowr esa orth y benn?’

¹⁷Ha Sowl a aswonnis lev Davydh, ha leverel, ‘Yw hemma dha lev, ow mab Davydh?’ Hag yn-medh Davydh, ‘Yth yw ow lev, ow arloedh, A vyghtern.’

¹⁸Hag yn-medh ev ynwedh, ‘Prag yth helgh ow arloedh war-lergh y was? Pandr'a wrug vy? Py pegh usi y'm leuv?

¹⁹Lemmyn ytho, my a'th pys, klewes ow arloedh an myghtern geryow y was. Mars yw an ARLOEDH neb re ynnias warnas er ow fynn, re vlasso offrynn; mes mars yw mebyon den, bedhens mollethys dherag an ARLOEDH, rag i re'm chasyas yn-mes y'n jydh hedhyw ma na gaffen ow rann yn eretons an ARLOEDH, ow leverel, “Ke, serv duwow erell.”

²⁰Lemmyn rakhenna, na wres ow goes koedha dhe'n dor dhe-ves a lok an ARLOEDH; rag myghtern Ysrael re dheuth yn-mes dhe hwilas hwannenn, kepar dell helghir grugyar y'n menydhyow.’

²¹Ena Sowl a leveris, ‘My re beghas; dehwel, ow mab Davydh, rag ny wrav drog dhis arta, drefenn bos ow bewnans drudh y'th wolok y'n jydh hedhyw. Otta, my re beu foll, ha my re erryas dres eghenn.’

²²Ha Davydh a worthybis ha leverel, ‘Otta an guw, A vyghtern! Gas onan a'n wer yowynk dhe dreusi omma ha'y gemmeres.

²³An ARLOEDH a attal dhe bub gour rag y ewnder ha'y lelder; rag an ARLOEDH a'th telivras a-berth y'm leuv hedhyw, mes ny vynnis ystynn ow leuv erbynn untys an ARLOEDH.

²⁴Hag, otta, kepar dell veu dha vewnans drudh y'm golok y'n jydh hedhyw, yndella re bo ow bewnans drudh yn golok an ARLOEDH, ha re'm deliffro yn-mes a oll anken.’

²⁵Ena Sowl a leveris dhe Davydh, ‘Bennigys re bi, ow mab Davydh! Ty a wra traow meur, hag ynwedh ty a siwen ynna.’ Ytho Davydh eth war y fordh, ha Sowl a dhehwelis dh'y dyller.