Read Kernewek 1 Samuel 27 Bible Online

1 Samuel 27 - Kernewek bible

1 Samuel 27

¹Davydh a brederis yn y golonn, ‘Lemmyn, my a verow unn jydh dre leuv Sowl; nyns eus travyth gwell ragov marnas diank hware dhe bow an Filistysi; ena Sowl a hedh dhe'm hwilas pella a-ji dhe oryon Ysrael, ha my a dhienk mes a'y leuv.’

²Ytho Davydh a sevis ha treusi gans hwegh kans gour esa ganso, dhe vyghtern Akish mab Maok a Gath.

³Yth esa Davydh trigys gans Akish yn Gath, ev ha'y wer, pub gour gans y deylu, ha Davydh gans y dhiw wreg, Ahinoam a Yezreel, hag Abigayl an Karmelyades, gwreg Nabal.

⁴Ha pan veu derivys orth Sowl Davydh dhe fia dhe Gath, ny'n hwilas na fella.

⁵Ena Davydh a leveris dhe Akish, ‘Mar kevis favour y'th wolok, bedhes tyller res dhymm yn neb sita y'n pow, may hallav triga ena; rag prag y tegoedh dhe'th was triga y'n sita ryel genes?’

⁶Ena Akish a ros dhodho Siklag y'n jydh na; rakhenna myghternedh Yuda re bewva Siklag bys y'n jydh hedhyw.

⁷Niver an dydhyow mayth esa Davydh trigys yn pow an Filistysi o blydhen ha peswar mis.

⁸Lemmyn Davydh ha'y wer eth yn-bann, hag i a wrug omsettyansow erbynn an Geshurysi, ha'n Girzysi, ha'n Amalekysi; rag yth o an re ma an trevesigethow dhiworth Telam war an fordh dhe Shur ha bys yn pow Ejyp.

⁹Davydh a weskis an tir, ha ny asas yn few naneyl gour na benyn, hag ev a gemmeras dhe-ves an deves, an oghen, an asenes, an kowrvergh, ha'n dillas, ha dehweles dhe Akish.

¹⁰Pan wovynni Akish, ‘Piw re wrussys omsettyans er y bynn hedhyw?’ Davydh a leveri, ‘Erbynn Negeb Yuda’, po ‘Erbynn Negeb an Yeraghmeelysi’, po, ‘Erbynn Negeb an Kenysi.’

¹¹Ha ny asa Davydh yn few naneyl gour na benyn, dhe dri ger dhe Gath, ow leverel, ‘Ma na dheriffons a-dro dhyn, ha leverel, “Davydh re wrug yndella.” ’ Hemm o y vaner dres oll an termyn mayth esa ev trigys yn pow an Filistysi.

¹²Hag Akish a grysi yn Davydh, ha tybi, ‘Ev re wrug y honan kasadow glan yn mysk y bobel Ysrael; rakhenna ev a vydh ow gwas bys vykken.’