Read Kernewek 1 Samuel 29 Bible Online

1 Samuel 29 - Kernewek bible

1 Samuel 29

¹Lemmyn an Filistysi a guntellas oll aga luyow war-barth yn Afek, hag Ysrael a gampyas ryb an fenten usi yn Yezreel.

²Pan esa gwahalyethow an Filistysi ow mos yn-rag gans bagasow a gansow ha milyow, yth esa Davydh ha'y wer ow tremena a-dhelergh gans Akish.

³Yn-medh kaslewydhyon an Filistysi, ‘Pyth usi an Ebrowyon ma ow kul omma?’ Akish a worthybis dhe gaslewydhyon an Filistysi, ‘A nyns yw hemma Davydh, gwas Sowl myghtern Ysrael, neb re beu genev lemmyn an dydhyow ma ha'n blydhynyow ma? Ny gevis fowt vyth ynno a-ban gilfias dhymm bys y'n jydh hedhyw.’

⁴Mes kaslewydhyon an Filistysi o serrys ganso; hag yn-medh dhodho kaslewydhyon an Filistysi, ‘Gwra dhe'n gour dehweles, may hallo dehweles dhe'n tyller re beu apoyntys ragdho. Na wres ev mones yn-bann genen dhe'n vatel, rag own ev dhe dhos ha bos eskar dhyn y'n vatel. Rag fatell allsa an gwas ma gwaynya favour y arloedh marnas y fo gans pennow an wer ma?

⁵A nyns yw hemma Davydh, an gour may kanens anodho an eyl dh'y gila yn donsyow, ha leverel, “Sowl re ladhas y vilyow, ha Davydh y dhegow a vilyow”?’

⁶Ena Akish a elwis Davydh ha leverel dhodho, ‘Dell vew an ARLOEDH, ty re beu ewnhynsek, hag y'm golok yth hevel ewn dhymm ty dhe vones yn-mes ha dones a-ji genev y'n lu; rag ny gevis drog vyth ynnos a-dhia'n jydh may teuthys dhymm bys y'n jydh hedhyw. Byttegyns nyns osta da yn dewlagas an wahalyethow.

⁷Ytho dehwel lemmyn; ha ke yn kres; na wra travyth dhe displesya gwahalyethow an Filistysi.’

⁸Davydh a leveris dhe Akish, ‘Mes pandr'a wrug vy? Pandr'a gevsys y'th was a-dhia'n jydh may teuth vy dhis bys y'n jydh hedhyw, ma na allav mos ha batalyas orth eskerens ow arloedh an myghtern?’

⁹Akish a worthybis dhe Davydh ha leverel, ‘My a woer dha vos divlam y'm golok, kepar hag el Duw; byttegyns, kaslewydhyon an Filistysi re leveris, “Ny wra ev mones yn-bann genen dhe'n vatel.”

¹⁰Lemmyn ytho sav myttin a-varr, ty ha gwesyon dha arloedh neb a dheuth genes, ha ke dhe'n tyller a wrug vy y apoyntya ragos. A-dro dhe'n drog dherivas, na'n kemmer y'th kolonn, rag ty re wrug yn ta a-dheragov.[18] Dallethewgh myttin a-varr, ha diberthewgh kettell a'gas eus golow.’

¹¹Ytho Davydh ha'y wer a sevis myttin a-varr dhe dhehweles dhe bow an Filistysi. Mes an Filistysi eth yn-bann dhe Yezreel.