Read Kernewek 1 Samuel 30 Bible Online

1 Samuel 30 - Kernewek bible

1 Samuel 30

¹Lemmyn pan dheuth Davydh ha'y wer dhe Siklag y'n tressa dydh, an Amalekysi a wrug omsettyans war an Negeb ha war Siklag. I a waskas Siklag, ha'y leski gans tan,

²ha kemmeres yn kethneth an benynes hag oll myns esa ynni, byghan ha bras; ny ladhsens gour vyth, mes aga doen dhe-ves, ha mos war aga fordh.

³Pan dheuth Davydh ha'y wer dhe'n sita, i a welas hy bos leskys gans tan, ha'ga benynes ha'ga mebyon ha'ga myrghes re bia kemmerys yn kethneth.

⁴Ena Davydh hag oll an bobel esa ganso a dhrehevis aga lev hag oela, bys ma nag esa dhedha nerth vyth dhe oela namoy.

⁵Ha diw wreg Davydh ynwedh re bia kemmerys yn kethneth, Ahinoam a Yezreel, hag Abigayl gwreg Nabal a Karmel.

⁶Ha Davydh o grevys yn feur; rag an bobel a gewsis a'y labydha, drefenn bos oll an bobel hwerow y'n enev rag aga mebyon ha myrghes. Mes Davydh a gavas nerth y'n ARLOEDH y Dhuw.

⁷Ena Davydh a leveris dhe'n oferyas Abiathar mab Ahimelek, ‘Ro dhymm an efod.’ Ytho Abiathar a ros an efod dhe Davydh.

⁸Ha Davydh a wovynnas orth an ARLOEDH, ha leverel, ‘A wrav vy helghya an bagas ma? A wrav vy aga hachya?’ Ev a worthybis dhodho, ‘Helgh, rag ty a wra yn sur aga hachya ha heb falladow sawya an brisnoryon.’

⁹Ytho Davydh eth, ev ha'n hwegh kans gour esa ganso. I a dheuth dhe nans Besor, le may hwortas an re a veu gesys dhelergh.

¹⁰Mes Davydh a besyas helghya, ev ha peswar kans gour; dew kans a veu gesys, neb o re skwith dhe dreusi nans Besor.

¹¹I a gevis gour ejyptek y'n gwel ha'y dhri dhe Davydh. I a ros bara dhodho hag ev a dhybris, hag i a ros dhodho dowr dhe eva;

¹²hag i a ros dhodho tamm a desenn a figys ha diw desenn a rappys. Wosa dybri, y spyrys a dheuth arta dhodho; drefenn na dhyb'sa bara vyth nag eva dowr trydydh ha teyr nos.

¹³Ena Davydh a leveris dhodho, ‘Dhe biw osta? A-ble os?’ Ev a worthybis, ‘Gour yowynk a Ejyp ov vy, gwas dhe wour a Amalek. Ow mester a'm gasas, drefenn my dhe vos yn klav nans yw trydydh.

¹⁴Ni a wrug omsettyans war Negeb an Kerethysi ha war an pyth a wra Yuda y bewa ha war Negeb Kaleb; ha ni a loskas Siklag gans tan.’

¹⁵Yn-medh Davydh dhodho, ‘A vynnydh ow hemmeres yn-nans dhe'n bagas ma?’ Ev a worthybis, ‘To dhymm re Dhuw, na wre'ta ow ladha, na'm delivra a-berth yn leuv ow mester, ha my a wra dha dhri yn-nans dhe'n bagas ma.’

¹⁶Pan y'n drosa yn-nans, awotta, yth ens i lesys a-derdro war enep oll an dor, ow tybri hag owth eva, hag ow tonsya, drefenn an myns bras a breydh a gemmersens yn-mes a bow an Filistysi hag yn-mes a bow Yuda.

¹⁷Davydh a's gweskis dhiworth an bora bys gorthugher an nessa dydh. Ny dhienkas nagonan anedha, saw peswar kans gour yowynk, neb a varghogas war gowrvergh ha fia.

¹⁸Davydh a dhaskavas pup-tra re gemmersa an Amalekysi; ha Davydh a sawyas y dhiw wreg.

¹⁹Ny veu travyth kellys, naneyl byghan na bras, naneyl mebyon na myrghes, na travyth a'n preydh re bia kemmerys; Davydh a dhaskavas pup-tra.

²⁰Ha Davydh a gemmeras oll an flokkys ha'n greow, hag i a's ledyas a-dherag an chatel erell, ow leverel, ‘Hemm yw preydh Davydh.’

²¹Ena Davydh a dheuth dhe'n dhew kans gour, neb o mar skwith ma na allsens holya Davydh, an re neb re bia gesys orth nans Besor. I eth yn-mes dhe vetya Davydh ha dhe vetya an bobel esa ganso. Pan nesas Davydh dhe'n bobel, ev a's salusis.

²²Ena oll an debeles, ha gwer Belial yn mysk an wer neb eth gans Davydh a leveris, ‘Drefenn na wrussons mones genen, ny wren ni ri dhedha travyth a'n preydh daskevys genen, saw pub gour a yll kemmeres y wreg ha'y fleghes hag omdenna.’

²³Mes Davydh a leveris, ‘Ny wrewgh yndella, ow breder, gans an pyth re ros an ARLOEDH dhyn; ev re'gan gwithas, hag ev re ros an bagas neb a dheuth er agan pynn a-berth yn agan leuv.

²⁴Piw a vynn goslowes orthowgh y'n mater ma? Rag rann an gour neb a wra mos yn-nans y'n vatel a vydh kepar ha rann an gour neb a worta ryb an fardellow; i a rann kepar.’

²⁵Hag yth o yndella dhiworth an jydh na yn-rag, ev a'n gwrug ordenans ha breus rag Ysrael bys y'n jydh hedhyw.

²⁶Pan dheuth Davydh dhe Siklag, ev a dhannvonas rann a'n preydh dh'y gowetha, henavogyon Yuda, ha leverel, ‘Otta ro ragowgh dhiworth preydh eskerens an ARLOEDH.’

²⁷Yth o rag an re esa yn Bethel, ha dhe'n re esa yn Ramoth an Negeb, ha dhe'n re esa yn Yattir,

²⁸ha dhe'n re esa yn Aroer, ha dhe'n re esa yn Sifmoth, ha dhe'n re esa yn Eshtemoa,

²⁹ha dhe'n re esa yn Rakal, ha dhe'n re esa yn sitys an Yeraghmeelysi, ha dhe'n re esa yn sitys an Kenysi,

³⁰ha dhe'n re esa yn Horma, ha dhe'n re esa yn, ha dhe'n re esa yn Athak,

³¹ha dhe'n re esa yn Hebron, henn yw dhe oll an tylleryow mayth esa Davydh y honan ha'y wer ow kwandra.