Read Kernewek 1 Samuel 6 Bible Online

1 Samuel 6 - Kernewek bible

1 Samuel 6

¹Wosa argh an ARLOEDH dhe vos yn bro an Filistysi seyth mis,

²an Filistysi a elwis an oferysi ha'n goelyogyon ha leverel, ‘Pandr'a wren gans argh an ARLOEDH? Leverewgh dhyn pandr'a dannvenyn gensi dh'y le.’

³Hag i a leveris, ‘Mar tannvenowgh dhe-ves argh Duw Ysrael, na's dannvenewgh gwag, mes res yw dhywgh dannvon dhodho offrynn kammweyth ynwedh. Ena hwi a vydh sawys hag y fydh godhvedhys dhywgh prag nag yw y dhorn treylys a-dhiworthowgh.’

⁴Hag i a leveris, ‘Pandr'yw an offrynn kammweyth a dhaskorryn dhodho?’ I a worthybis, ‘Pymp hwedh owrek ha pymp logosenn owrek, war-lergh niver gwahalyethow an Filistysi; rag yth esa an keth pla warnowgh oll, ha war agas rewloryon.

⁵Ytho hwi a wra imajys a'gas hwedhow hag imajys a'gas logos neb a dhiswra an tir, ha hwi a re glori dhe Dhuw Ysrael; martesen ev a skavha y dhorn a-dhiwarnowgh hag a-dhiwar agas duwow hag a-dhiwar agas tir.

⁶Prag y hwrewgh kaleshe agas kolonn kepar dell wrug an Ejyptianys ha Faro kaleshe aga holonn? Wosa ev dhe wul ges anedha, a ny assons an bobel dhe vones, hag i a dhibarthas?

⁷Lemmyn ytho, gwrewgh kert nowydh ha kemmerewgh diw vugh-wodra na borthas nevra yew warnedha, ha yewewgh an bughes dhe'n kert, mes kemmerewgh aga leughi tre, dhe-ves a-dhiworta.

⁸Kemmerewgh argh an ARLOEDH ha'y gorra war an kert, ha gorrewgh an taklennow a owr, a dhaskorrowgh dhodho rag offrynn kammweyth, yn kist rybdhi, ha'y dannvon dhe-ves war hy fordh.

⁹Ha mirewgh orti; mar teu yn-bann war an fordh dh'y thiredh hy honan, dhe Beth-shemesh, ena ev re wrug dhyn an drog bras ma; mes mar ny'n gwra, ena ni a woer nag yw y dhorn a'gan gweskis; y hwarva par happ.’

¹⁰Yndella y hwrug an wer; i a gemmeras diw vugh-wodra ha'ga yewa dhe'n kert, ha degea aga leughi yn tre.

¹¹I a settyas argh an ARLOEDH war an kert, ha'n gist gans an logosennow a owr hag imajys aga hwedhow ynni.

¹²Ha'n bughes eth kompes war-tu Beth-shemesh war an fordh, ow pedhygla hag i ow mos, ha ny dreylsons dhe'n barth dhyghow na dhe'n barth kledh, ha gwahalyethow an Filistysi a's holyas bys yn or Beth-shemesh.

¹³Lemmyn yth esa pobel Beth-shemesh ow mysi aga gwaneth y'n nans, ha pan virsons yn-bann ha gweles an argh, i a lowenhas dh'y gweles.

¹⁴Ha'n kert a dheuth yn gwel Yoshua, den a Beth-shemesh, hag ev a hedhis ena. Yth esa men bras ena; hag i a folsas prenn an kert, hag offrynna an bughes avel offrynn leskys dhe'n ARLOEDH.

¹⁵Ha'n Levysi a gemmeras yn-nans argh an ARLOEDH ha'n gist esa rybdhi, mayth esa taklennow a owr ynni, ha'ga gorra war an men bras. Ena gwer Beth-shemesh a offrynnas offrynnow leskys ha sakrifia sakrifisow y'n keth jydh na dhe'n ARLOEDH.

¹⁶Ha pan welas pymp gwahalyeth an Filistysi hemma, i a dhehwelis y'n keth jydh na dhe Ekron.

¹⁷An re ma yw an hwedhow owrek a dhaskorras an Filistysi avel offrynn kammweyth dhe'n ARLOEDH: onan rag Ashdod, onan rag Gaza, onan rag Ashkelon, onan rag Gath, onan rag Ekron;

¹⁸ynwedh an logosennow owrek, war-lergh niver oll sitys an Filistysi usi dhe'n pymp gwahalyeth, an kastylli ha godrevi, bys y'n men bras, may hworrsons argh an ARLOEDH warnodho hag usi hwath ena yn gwel Yoshua a Beth-shemesh.

¹⁹Hag ev a weskis gwer Beth-shemesh, drefenn i dhe vires a-ji dhe argh an ARLOEDH; hag ev a weskis deg ha tri-ugens gour anedha. An bobel a gynis, drefenn an ARLOEDH dhe wul ladhva veur yn mysk an bobel.

²⁰Ha gwer Beth-shemesh a leveris, ‘Piw a yll sevel a-dherag an ARLOEDH, an Duw sans ma? Dhe biw a wra ev mos yn-bann a-dhiworthyn?’

²¹Hag i a dhannvonas kannasow dhe dus Kiryath-yearim, ow leverel, ‘An Filistysi re dhaskorras argh an ARLOEDH, Dewgh yn-nans ha kemmerewgh hi yn-bann dhywgh.’