Read Kernewek 1 Samuel 7 Bible Online

1 Samuel 7 - Kernewek bible

1 Samuel 7

¹Ytho pobel Kiryath-yearim a dheuth ha kemmeres yn-bann argh an ARLOEDH, ha'y dri a-bervedh yn chi Abinadab war an vre. I a sakras y vab Eleazar, dhe witha argh an ARLOEDH.

²Lies dydh a bassyas a-dhia'n jydh may trigas an argh yn Kiryath-yearim; ugens blydhen o, hag oll chi Ysrael a yeunis war-lergh an ARLOEDH.

³Ena Samuel a gewsis dhe oll chi Ysrael ow leverel, ‘Mars esowgh hwi ow tehweles dhe'n ARLOEDH gans oll agas kolonn, ena gorrewgh dhe-ves an duwow astranj ha'n Ashtaroth a-dhiworth agas mysk. Settyewgh agas kolonn war an ARLOEDH, ha servyewgh unnsel ev, hag ev a'gas delirv yn-mes a leuv an Filistysi.’

⁴Ena mebyon Ysrael a removas an Baalim ha'n Ashtaroth, hag i a servyas unnsel an ARLOEDH.

⁵Ena Samuel a leveris, ‘Kuntellewgh oll Ysrael yn Mispa, ha my a bys war Dhuw ragowgh.’

⁶Hag i a omguntellas war-barth yn Mispa, ha tenna dowr ha'y dhinewi yn-mes a-dherag an ARLOEDH. I a benysas y'n jydh na, ha leverel, ‘Ni re beghas erbynn an ARLOEDH.’ Ha Samuel a vreusi mebyon Ysrael yn Mispa.

⁷Pan glewas an Filistysi bos mebyon Ysrael kuntellys war-barth yn Mispa, gwahalyethow an Filistysi eth yn-bann erbynn Ysrael. Ha pan glewas mebyon Ysrael anodho, i a borthas own a'n Filistysi.

⁸Mebyon Ysrael a leveris dhe Samuel, ‘Na hedh ow karma dhe'n ARLOEDH agan Duw ragon, ma'gan sawyo yn-mes a leuv an Filistysi.’

⁹Ha Samuel a gemmeras oen-dena ha'y offrynna rag offrynn kowlleskys dhe'n ARLOEDH; ha Samuel a armas dhe'n ARLOEDH rag Ysrael, ha'n ARLOEDH a worthybis dhodho.

¹⁰Pan esa Samuel owth offrynna yn-bann an offrynn leskys, an Filistysi a dheuth nes dhe vatalyas orth Ysrael; mes an ARLOEDH a darennas gans lev bras an jydh na war an Filistysi ha'ga thewlel yn deray; ha domhwelys ens a-dherag Ysrael.

¹¹Ha gwer Ysrael eth yn-mes a Mispa ha helghya an Filistysi, ha'ga gweskel bys yn Beth-kar.

¹²Ena Samuel a gemmeras men ha'y settya yntra Mispa ha Yeshana,[3] ha'y henwel Ebenezer; rag ev a leveris, ‘Kyns-lemmyn an ARLOEDH re'gan gweresas.’

¹³Ytho an Filistysi o fethys ha ny dheuthons arta yn pow Ysrael; yth esa dorn an ARLOEDH erbynn an Filistysi oll dydhyow Samuel.

¹⁴Ha'n sitys a gemmeras an Filistysi dhiworth Ysrael a veu daskorrys dhe Ysrael, a-dhiworth Ekron bys yn Gath; hag Ysrael a dhelivras aga thir yn-mes a leuv an Filistysi. Hag yth esa kres ynter Ysrael ha'n Amorysi.

¹⁵Samuel a vreusi Ysrael oll dydhyow y vewnans.

¹⁶Hag yth e pub blydhen yn gylghenn dhe Bethel, Gilgal, ha Mispa; hag ev a vreusi Ysrael yn oll an tylleryow ma.

¹⁷Ena ev a dhehweli dhe Rama, rag yth esa y ji ena; hag ena ev a vreusi Ysrael; hag ev a dhrehevis ena alter dhe'n ARLOEDH.