Read Kernewek 1 Samuel 8 Bible Online

1 Samuel 8 - Kernewek bible

1 Samuel 8

¹Pan o Samuel koth, ev a apoyntyas y vebyon avel breusysi dres Ysrael.

²Hanow y gynsa-genys o Yoel, ha hanow y nessa, Abia; breusysi ens yn Beer-sheba.

³Mes ny gerdhi y vebyon yn y fordhow, mes i a dreylya a-denewen rag gwayn disonest, ha kemmeres falswobrow ha kamma gwirvreus.

⁴Ena oll henavogyon Ysrael a omguntellas war-barth ha dos dhe Samuel yn Rama,

⁵ha leverel dhodho, ‘Otta, koth osta, ha ny gerdh dha vebyon y'th fordhow; ytho apoynt ragon, myghtern dh'agan breusi, kepar hag oll an kenedhlow erell.’

⁶Mes an dra a dhisplesyas Samuel pan lavarsons, ‘Ro dhyn myghtern dh'agan breusi.’ Samuel a bysis war an ARLOEDH,

⁷ha'n ARLOEDH a leveris dhe Samuel, ‘Goslow orth lev an bobel yn pup-tra a leverons dhis; rag ny'th skonsons jy, mes i re'm skonyas vy a vones myghtern warnedha.

⁸Kepar dell wrussons dhymm a-dhia'n jydh ma's dres vy yn-bann yn-mes a Ejyp bys y'n jydh hedhyw, orth ow eskasa hag ow servya duwow erell, yndella a wrons ynwedh dhis.

⁹Ha lemmyn goslow orth aga lev; mes ty a's gwarn yn solem, ha diskwedhes dhedha fordhow an myghtern neb a reyn warnedha.’

¹⁰Ytho Samuel a dherivas oll geryow an ARLOEDH dhe'n bobel esa ow kovynn myghtern a-dhiworto.

¹¹Ev a leveris, ‘Hemma a vydh fordhow an myghtern neb a reyn warnowgh: ev a gemmer agas mebyon ha'gas apoyntya rag y jarettow ha dhe vos y varghogyon, ha dhe boenya a-dherag y jarettow;

¹²hag ev a apoynt ragdho y honan kaslewydhyon a vilyow ha kaslewydhyon a hanter-kansow, hag erell dhe aras y dhor ha mysi y drevas, ha dhe wul y arvow a vresel ha daffar y jarettow.

¹³Ev a gemmer agas myrghes dhe vos perfumyoresow ha bos kogesow ha peboresow.

¹⁴Hag ev a gemmer agas parkow ha'gas gwinlannow ha'gas olewbrennyer, an gwella anedha, ha'ga ri dh'y wesyon.

¹⁵Ev a gemmer an degves a'gas greun, ha'gas gwinlannow ha'y ri dh'y soedhogyon ha'y wesyon.

¹⁶Ev a gemmer agas gwesyon ha'gas maghtethyon, ha'n gwella a'gas gwer yowynk[4] ha'gas asenes, ha'ga gorra dh'y ober.

¹⁷Ev a gemmer an degves a'gas deves, ha hwi a vydh y gethyon.

¹⁸Hag y'n jydh na hwi a arm drefenn agas myghtern re dhewissowgh ragowgh agas honan; mes ny'gas worthyp an ARLOEDH y'n jydh na.’

¹⁹Mes an bobel a skonyas goslowes orth lev Samuel; hag i a leveris, ‘Nansi! Mes ni a vynn kavoes myghtern warnan,

²⁰may fydhyn ni kepar hag oll an kenedhlow erell, ha rag may hyll agan myghtern agan breusi, ha mones yn-mes a-dheragon, ha'gan ledya yn agan batelyow.’

²¹Samuel a glewas oll geryow an bobel, hag ev a's dasleveris yn diwskovarn an ARLOEDH.

²²Ha'n ARLOEDH a leveris dhe Samuel, ‘Goslow orth aga lev ha gwra myghtern dhe reynya warnedha.’ Ha Samuel a leveris dhe wer Ysrael, ‘Kewgh pub gour dh'y sita.’