Read Kernewek 1 Samuel 9 Bible Online

1 Samuel 9 - Kernewek bible

1 Samuel 9

¹Yth esa gour a Benyamin, Kish y hanow, mab Abiel mab Seror mab Bekorath mab Afia, Benyaminyas, gour galloesek.

²Y feu dhodho mab, Sowl y hanow, neb o yonker teg. Nyns esa gour yn mysk mebyon Ysrael tekka agesso; a-dhiworth y dhiwskoedh hag yn-bann ev o hirra ages oll an bobel.

³Lemmyn asenes Kish, tas Sowl, o kellys. Ha Kish a leveris dhe Sowl y vab, ‘Kemmer onan a'n wesyon genes; ke ha hwila an asenes.’

⁴Ytho ev a dremenas dre venydh Efraym, ha tremena dre dir Shalisha, mes ny's trovsons. Ena i a dremenas dre dir Shaalim, mes nyns esens ena. Ena ev a dremenas dre dir an Benyaminysi, mes ny's trovsons.

⁵Pan dheuthons dhe bow Suf, Sowl a leveris dh'y was esa ganso, ‘Deus, ha dehwelyn, po ow thas a hedh ow prederi a-dro dhe'n asenes ha prederi a-dro dhyn ni.’

⁶Hag ev a leveris dhodho, ‘Otta lemmyn, yma y'n sita ma gour Duw; ev yw gour enorys; ha pup-tra a lever a dheu ha bos gwir. Deun bys di lemmyn; martesen ev a yll leverel dhyn a-dro dhe'n vyaj mayth eson ni ow vyajya warnodho.’

⁷Ena Sowl a leveris dh'y was, ‘Mes mar teun, pandr'a yllyn dri dhe'n gour? Rag an bara yn agan seghyer yw gyllys, ha nyns eus ro vyth dhe dhri dhe wour Duw. Pandr'eus dhyn?’

⁸Ha'n gwas a worthybis dhe Sowl arta, ‘Ottomma genev kwarter a shekel arghans; my a'n re dhe wour Duw, dh'agan leverel agan fordh.’

⁹(Seulabrys yn Ysrael, pan eth gour dhe wovynn orth Duw, ev a leveri, ‘Dewgh, ha deun dhe'n gwelesydh’; rag an gour neb yw gelwys profoes y'n dydhyow ma o seulabrys gelwys gwelesydh.)

¹⁰Ena Sowl a leveris dh'y was, ‘Dha er yw da; deus, deun.’ Ytho i eth dhe'n sita mayth esa gour Duw.

¹¹Pan esens ow mos war an fordh yn-bann dhe'n sita, i a vetyas mowesi yowynk ow tos yn-mes dhe denna dowr, hag i a leveris dhedha, ‘Usi an gwelesydh omma?’

¹²I a worthybis ha leverel, ‘Usi; ottava a-dheragowgh. Fistenewgh; ev re dheuth nammnygen dhe'n sita, rag yma sakrifis hedhyw rag an bobel y'n tyller ughel.

¹³Kettell dhewgh a-bervedh y'n sita, hwi a'n kyv, kyns ev dhe vones yn-bann dhe'n tyller ughel dhe dhybri. Rag ny vynn an bobel dybri erna dheffo, drefenn ev dhe venniga an sakrifis; ha wosa henna an re neb yw gelwys a dheber. Ha lemmyn kewgh yn-bann, rag a-dro dhe'n termyn ma hwi a'n kyv.’

¹⁴Hag i eth yn-bann dhe'n sita. Ha pan esens owth entra y'n sita, otta, i a welas Samuel ow tos yn-mes trohag i war y fordh dhe'n tyller ughel.

¹⁵Lemmyn an jydh kyns Samuel dhe dhos, an ARLOEDH re dhiskudhsa dhe Samuel:

¹⁶‘A-vorow a-dro dhe'n termyn ma my a dhannvon dhis gour mes a bow Benyamin, ha ty a wra y untya avel rewler war oll ow fobel Ysrael. Ev a saw ow fobel a-dhiworth dorn an Filistysi. My re viras war ow fobel, drefenn aga garm dhe dhos dhymm.’

¹⁷Ha pan welas Samuel Sowl, an ARLOEDH a leveris dhodho, ‘Otta an gour a gewsis dhis anodho. Ev yw neb a rewl ow fobel.’

¹⁸Ena Sowl a dheuth nes dhe Samuel a-ji dhe'n yet, ha leverel, ‘Lavar dhymm, my a'th pys, ple'ma chi an gwelesydh?’

¹⁹Ha Samuel a worthybis dhe Sowl, ha leverel, ‘An gwelesydh ov vy, ke yn-bann a-dheragov dhe'n tyller ughel, rag ty a dheber genev hedhyw, ha myttin my a wra dha asa dhe vones, ha leverel dhis pup-tra eus y'th kolonn.

²⁰Ha'th asenes esa kellys nans yw tri dydh, na sett dha vrys dhedha; rag i re beu kevys. Ha war biw yw oll desir Ysrael fastys? A nyns usi warnas jy, ha war oll chi dha dasow?’

²¹Sowl a worthybis ha leverel, ‘A nyns ov vy marnas Benyaminyas, a-dhiworth an lyha loeth Ysrael, hag ow theylu an lyha a oll teyluyow loeth Benyamin? Ytho prag y kewsydh orthiv yndella?’

²²Ena Samuel a gemmeras Sowl ha'y was, ha'ga dri a-bervedh y'n hel ha ri dhedha tyller orth penn an re esa gelwys, neb esa a-dro dhe dheg gour warn ugens.

²³Yn-medh Samuel dhe'n keginer, ‘Dro an rann a res vy dhis, an rann a leveris dhis dh'y gorra a-denewen.’

²⁴Ha'n keginer a dhrehevis an vordhos gans pup-tra esa warnedhi, ha'y gorra a-dherag Sowl. Ha Samuel a leveris, ‘Awotta, an pyth o gwithys yw settys a-dheragos. Deber; rag bys y'n termyn ma hi re beu gwithys ragos, a-ban leveris vy, “My re elwis an bobel.” ’ Ha Sowl a dhybris gans Samuel y'n jydh na.

²⁵Wosa i dhe dhos yn-nans a-dhiworth tyller ughel an sita, gweli a veu lesys rag Sowl war an to.[5]

²⁶Hag i a sevis a-varr a-dro dhe dardh an jydh ha Samuel a elwis dhe Sowl war an to ow leverel, ‘Sav, rag may hallav dha dhannvon war dha fordh.’ Ha Sowl a sevis, hag i eth yn-mes aga dew, ev ha Samuel.

²⁷Ha pan esens ow mos yn-nans dhe amal an sita, Samuel a leveris dhe Sowl, ‘Lavar dhe'n gwas may tremenno yn-rag a-dheragon, ha wosa ev dhe dremena, gorta omma dha honan rag termyn, rag may hallav derivas dhis ger Duw.’