Read Keyagana Samu 101 Bible Online

Samu 101 - Keyagana bible

Samu 101

¹Ala kava nene, huꞌna, Nagaemo kahau huka neꞌatana kavakaꞌe alagepa huka alika fako huka neꞌatana kavakaleꞌefeꞌmo yoke huguve. Ala kava nene, huꞌna, kagaefekeꞌmo yoke huguve.

²Ageꞌna aeto huteꞌnaeꞌmo afiteꞌna vaiꞌmo alagi oꞌalisuva kateꞌmo uguve. Hainu afinaꞌmo nagaetegamo egane. Nagaemo noꞌnifiꞌmo maiꞌneꞌnaeꞌmo aliꞌyaꞌnimo neꞌaliya vayaꞌaiteꞌmo yagaiꞌna apateꞌneꞌnaeꞌmo vaiꞌmo alagi oꞌalisuvana alagepa kavaꞌageꞌmo huꞌna maiguve.

³Nagaemo hosu kavaꞌmo hisuvafeꞌmo nagesamo oꞌafiguve. Alagepa kaꞌmo ataleꞌa neꞌvaya vayaꞌai kavaꞌapieꞌmo alagi oꞌnahauꞌniyanageno ani agufa hosu kavaꞌapimoꞌa nagaeteꞌmo aino okamaegaiye.

⁴Aigofe kavaꞌmo osuꞌna hosu apaipa vayaꞌmo hapafaiꞌna apatalegauve.

⁵Huꞌa faipa huꞌa neꞌataya vayaꞌmo hapafaiꞌna apatalegauve. Ala vayaꞌmo maiꞌnone, huꞌa huteꞌa himuꞌnamu kavaꞌmo nehaya vayaꞌmo nagaeꞌeꞌmo oꞌmaigae.

⁶Nagaemo Goti geꞌamo oꞌataleꞌa akame nehaya vayaꞌaifeꞌmo amuse huꞌna apatesugeꞌa nagaeꞌeꞌmo magokepi lokaeꞌa maigae. Aigofe gemo nosaya vayaꞌamogigeꞌmo aliꞌyaꞌnimo aligae.

⁷Aeꞌa ati nekaya vayaꞌmo noꞌnifiꞌmo haiꞌa oꞌmaigae. Aigofe gemo nehaya vayaꞌmo nagaeꞌeꞌmo magokepi lokaeꞌa oꞌmaigae.

⁸Malage huꞌna he tiꞌna hosu vayaꞌmo aliꞌna hano huꞌna apataleteꞌna hosu kavaꞌmo nehaya vayaꞌmo Ala kava neꞌmo taonifatiꞌmo aliꞌna hapa faiꞌna apatalegauve.