Read Keyagana Samu 103 Bible Online

Samu 103 - Keyagana bible

Samu 103

¹Nagupi mafaꞌneo, huꞌna, Ala kava neꞌmo agiꞌaleꞌmo alika asaga huvo. Muki nagufamoꞌe naipa nagesamoꞌeꞌmo aote neꞌmo agiꞌaleꞌmo alino asaga hino.

²Nagupi mafaꞌneo, huꞌna, alagepa huno naha maeꞌniya kavafeꞌmo kage okanika agiꞌaleꞌmo alika asaga huvo.

³Agaemo muki hosu kavaꞌnimo alino ataleteno muki kaitaꞌnimo alino nahageno neꞌnate.

⁴Falisuva kavapatiꞌmo miya faino hatu maeno neꞌnate. Ala kava neꞌmoꞌa ala nagiꞌnimo namitenoꞌaeꞌmo nagaefeꞌmo hau ayamopafiꞌmo hauꞌnigenoꞌaeꞌmo hau huno neꞌnate.

⁵Alagepa yaꞌmo alino neꞌnamigenoꞌaeꞌmo magoꞌe yafeꞌmo naipafatiꞌmo ohauꞌniye. Naha neꞌmaegeꞌnaeꞌmo hakiki namamo neya vekagana huno maiꞌniya kava huꞌna neꞌmauve.

⁶Ala kava neꞌmoꞌa aliꞌa afepi apatageꞌa neꞌmaiya vayaꞌmo hapa maeteno apakaiꞌapi yaꞌmo alisayafeꞌmo alino apamigiye.

⁷Agaemo aipafiꞌmo agesa afige hauge nehiya kavaꞌamo Moseseꞌmo alino ave lige Isaleli vayaꞌmo huꞌniya kavaꞌamo alino apave lige huꞌniye.

⁸Ala kava neꞌmoꞌa hau huno apatege fiku hapa maeno apamige vase vase huno aipamo leno apatege lusi kava huno hau ayamopafiꞌmo hauge huno neꞌmaiye.

⁹Halate magoꞌe huno olahaugiyaꞌmonanafa muki afinaꞌmo aipamo leno olategaiye.

¹⁰Hosu kavatimo anonatilefeꞌmo magoke aiyaya huno nolamiye. Hosu kavaꞌmo huꞌnona kavatilefeꞌmo magoke aiyaya huno nolamagiye.

¹¹Kokuꞌnaꞌmo muga anagamo haneꞌniya kava huno agaefekeꞌmo koli huteꞌa mono nehaya vayaꞌaifeꞌmo magoke aiyaya kava huno hau huno neꞌapate.

¹²Yegemo haine neꞌeya aupilagaꞌe yegemo lamino nefaleya aupilagaꞌeꞌmo lusi afagiꞌaleꞌmo haneꞌniya kava huno Gotiꞌa hosu kavatimo magoke aiyaya kava huno alino afagiꞌaleꞌmo yaga auno neꞌatale.

¹³Afoꞌapimogi mafaꞌne anagaꞌapieꞌmo hapau huꞌa neꞌataya kava huno Ala kava neꞌmoꞌa agaefeꞌmo koli huteꞌa mono nehaya vayaꞌaifeꞌmo hau huno neꞌate.

¹⁴Agaemo, mopaletiꞌmo alo huꞌna apateꞌnove. Mumusopaletiꞌmo alo huꞌnova vayaꞌageꞌmo maiꞌnae, huno agesamo neꞌafiyaꞌmofeꞌmo lagaetegamo vase vase huno aliꞌyaꞌmo neꞌaliye.

¹⁵Kahaumoꞌmo aise afinaꞌmo nehaneya kava huta ma mopafiꞌmo aise afinaꞌmo maigeta nefalune. Kahau ausemo heꞌnigenoꞌaeꞌmo malage huno yasimo neꞌaligenoꞌaeꞌmo falu teteno hali huno mopafiꞌmo asagauno neꞌaiya kava huta aise afinaꞌmo maigeta ago nefalune.

¹⁶Nefalunaꞌmonanafa Ala kava nefeꞌmo koli huteꞌa mono nehaya vayaꞌaifeꞌmo ema akeyaꞌvilagatiꞌmo hau huno apateme apateme eno henagaꞌamo afole aisiya afinaꞌeꞌmo hau huno apateme apateme uno hano osugiye. Agaemo laha neꞌmaeya kava huno alita apateꞌnonanageꞌa henagaꞌamo aliꞌa apateme apateme visaya mafaꞌnemogimo kotalake geꞌamo akame huꞌa ma kavaꞌmo hiyo, huno huꞌniya gemo neꞌafiya vayaꞌmo hapa neꞌmae.

¹⁹Ala kava neꞌmo kokuꞌnapiꞌmo maiꞌnenoꞌaeꞌmo yagaino neꞌate. Muki asole vayaꞌaiteꞌmo yagaino neꞌate.

²⁰Enisole vayaꞌmogitapae, huꞌna, lokiya vayaꞌmo maiꞌnetapa geꞌamo afitetapa akame nehaya vayaꞌmogitapae, Ala kava neꞌmo agiꞌaleꞌmo alitapa asaga hiyo.

²¹Muki kokuꞌnapi maiꞌnetapa aliꞌyaꞌamo neꞌaliya vayaꞌamogitapamo hauꞌniya kavaꞌmo nehaya vayaꞌmogitapae, huꞌna, Ala kava neꞌmo agiꞌaleꞌmo alitapa asaga hiyo.

²²Muki alo huno lapateteno muki neꞌyagaiya kotegamo maiꞌnaya vayaꞌmogitapae, huꞌna, Ala kava neꞌmo agiꞌaleꞌmo alitapa asaga hiyo. Nagupi mafaꞌneo, huꞌna, Ala kava neꞌmo agiꞌaleꞌmo alika asaga huvo.