Read Keyagana Samu 104 Bible Online

Samu 104 - Keyagana bible

Samu 104

¹O, Nauneꞌnameyo, huꞌna, Ala kava neꞌmo agiꞌaleꞌmo alika asaga huka ato. Ala kava neo, O Gotiꞌnimogae, huꞌna, ala kagi vekamo maiꞌnane. Ala kagikaꞌe alopa konali yakaꞌeꞌmo kukenagana huka alika vaiteka neꞌmaine.

²Ha le yakamo kukenakagana huka alika vaiteka neꞌmaine. Kokuꞌnaꞌmo seli nokana huka alika atale maleꞌnane.

³Anagamo hiyapi aniteꞌmo nokamo akalo huka ki maleꞌnane. Hiyaꞌmo kalekagana huno haneꞌnigeno yasimoꞌmo kavalelino neꞌviye.

⁴Agaemo enisole vayaꞌamo yasigana huno alo huno apateꞌniye. Aliꞌyaꞌamo neꞌaliya vayaꞌmo ata vaikana huno alo huno apateꞌniye.

⁵Kagaemo ma mopamo muki afinaꞌmo hanege hanege huno hanesiyafeꞌmo faika ateꞌnane.

⁶Solovala aniꞌmo alika ateꞌnanageno eno ma mopamo aeno ati kaeteno avemo alino agaseꞌniye.

⁷Solovala anifeꞌmo, kaune ho, huka huꞌnanageno aune heno uꞌniye. Hakalu huꞌnanageno afitenoꞌaeꞌmo nagu nagu huno lamiꞌniye. Aveletiꞌmo aino laki lamino aune hetaleno lamino ani yamufiꞌmo asagauno aiteno ateꞌnana noꞌaleꞌmo halate haneꞌniye.

⁹Kegiꞌyamo huka ku aika ateꞌnananageno halate eno ma mopamo aeno ati okaegaiye.

¹⁰Meti aniꞌmo alino ateꞌnigeno ani yamufiꞌmo nelamiye.

¹¹Nelamigeꞌapaeꞌmo muki afela afumogimo neꞌnae. Afela nokimogimo neꞌnagenoꞌaeꞌmo apainagamo hau nosiye.

¹²Ani agiꞌnaleꞌmo haneꞌniya yosafiꞌmo nama anagaꞌmogi apanoꞌmo ki maleteꞌa yosa akopaleꞌmo maiꞌneꞌa apake neꞌaiye.

¹³Anagamo akalo huka ki maleꞌnana nopatiꞌmo aniꞌmo alika aveleꞌmo lakiꞌnanagenoꞌaeꞌmo koꞌmo neꞌaigenoꞌaeꞌmo muki ma mopafi yaꞌmo nehage.

¹⁴Muki pulumakamogi kahaumo nesayafeꞌmo alika hageka ateteka vayaꞌmogi hoyafiꞌmo hakalesaya neꞌyateꞌmo yagaiꞌneꞌa aliꞌa nesayafeꞌmo alika hageka neꞌatane.

¹⁵Ani kava huka ma mopafi vayaꞌmogimo apamogaga aisayafeꞌmo nofi alagafati aniꞌmo alika apamige apaugosafiꞌmo uvelimo falesageno fayu fayu hisigeꞌa amuse hisayafeꞌmo uvelimo alika apamige apaipamo alino lokiya vaino apatesiyafeꞌmo peleti mayamo alika apamige huka alika neꞌamine.

¹⁶Koꞌmo neꞌaigenoꞌaeꞌmo Lemanonigayagamo Ala kava neꞌmoꞌa fai maleꞌniya yosamoꞌmo lusi kava huno aniꞌmo neꞌaliye.

¹⁷Ani yosaleꞌmo muki nama anagaꞌmogimo apanoꞌmo nekiye. Mago alopa namamogimo mago yosaleꞌmo apanoꞌmo nekiye.

¹⁸Afela meme anagaꞌmogimo yatala aveleꞌmo umenitata nehageꞌapaeꞌmo mago afela afu anagaꞌmo yafa kapiꞌmo uꞌa fala nekiye.

¹⁹Kagaemo kaimo alo hu maleꞌnanageno muki afinaꞌmo kaimo eno neꞌateya kavafeꞌmo lekana nepaiye. Yegemo lamino nefaleya afinaꞌmo agetageno lamino nefale.

²⁰Kagaemo hani huvo, huka nehanageno haniꞌmo nehigeꞌapaeꞌmo muki yagagafamo fala kiꞌa maiꞌnayategatiꞌmo eꞌa umenitata nehae.

²¹Afela laiyoni anaꞌaumogi Gotitegatiꞌmo neꞌyaꞌmo aliꞌa nesayafeꞌmo kahauya huꞌa kae kae nehae.

²²Yegemo nelegeꞌapaeꞌmo kelifiꞌmo lamiꞌa havaeꞌa neꞌmaiye.

²³Fala kiꞌa neꞌmaigeꞌapaeꞌmo vayaꞌmo he tiꞌa uꞌa aliꞌyaꞌapimo neꞌaligenoꞌaeꞌmo yegemo lamino nefale.

²⁴O Ala kava nene, huꞌna, asole kavaꞌmo nehane. Ageteka afiꞌnana kavakaletiꞌmo muki ma mopafi yaꞌe vayaꞌeꞌmo alo hu maleꞌnanageꞌapaeꞌmo ma mopafiꞌmo kili paeꞌa maiꞌnae.

²⁵Solovala aniꞌmo muga afagiꞌaleꞌmo haneꞌnigeno lusi yatala aniꞌmo vasilonafiꞌmo muki apauneꞌapameꞌe yaꞌmo maiꞌnae.

²⁶Muga alopa anipiꞌmo asole sipimo neꞌvageꞌapaeꞌmo alopa noyamemogi nagosaꞌmo ailiꞌa uꞌeꞌa huꞌa yokalomo neleꞌaeꞌmo aeꞌa hailo huꞌa haiteꞌa emi eteꞌa nehae.

²⁷Mukiꞌamogimo neꞌyaꞌmo alika apamisanafeꞌmo apaka netegeꞌa kagava neꞌmaiye.

²⁸Neꞌyaꞌmo alika neꞌapaminageꞌaphaeꞌmo neꞌnae. Kayapatiꞌmo aliꞌa neꞌa apamu neae.

²⁹Kakameꞌyamo neꞌapaminageꞌapaeꞌmo kolikamo nehae. Apavamusateꞌmo neꞌalinageꞌapaeꞌmo faliteꞌa halate mopamo aliꞌa nehamalae.

³⁰Kaunekameꞌmo alika ateꞌnanageno uno alino afole aino neꞌapate. Muki haopalegamo saufa yaꞌe vayaꞌeꞌmo alo huteka alika afole aika neꞌapatane.

³¹Ala kava neꞌmo ha le konali yaꞌamoꞌmo alagi hanege hanege huno haneno. Ala kava neꞌmoꞌa alo huꞌniya yatefeꞌmo amogaga aino.

³²Agaemo mopaleꞌmo aulu heno neꞌagegenoꞌaeꞌmo imima neꞌaliye. Aveleꞌmo ame neꞌaligenoꞌaeꞌmo halinamo neꞌaiye.

³³Nagaemo ofaliꞌna muki afinaꞌmo afaꞌa maiꞌneꞌnaeꞌmo Ala kava neꞌmo agiꞌaleꞌmo aliꞌna asaga huꞌna yoke huguve.

³⁴Ala kava nefeꞌmo namogaga neꞌauvaꞌmofeꞌmo agaefekeꞌmo nagesa afifi huꞌna neꞌmauvanageno amuse huno natesiyafeꞌmo nahauꞌniye.

³⁵Agaemo hosu vayaꞌmo ma mopafatiꞌmo alagi alino hano huno apatalesiyafeꞌmo nahauꞌniye. O nauneꞌnameyo, huꞌna, Ala kava neꞌmo agiꞌaleꞌmo alika asaga huka ato. Ala agiꞌamo amiyo.