Read Keyagana Samu 106 Bible Online

Samu 106 - Keyagana bible

Samu 106

¹Ala kava neꞌmo agiꞌaleꞌmo alitapa asaga hiyo. Alagepa vekamo maiꞌniyaꞌmofeꞌmo hao ke heyo. Muki afinaꞌmo hau huno apatege apatege huno neꞌmaiye.

²Ina lagimo huꞌniya kavafeꞌmo ava gemo hugae. Alagepa kavaꞌmo lusi kanale kavaꞌmo huꞌniyaꞌmofeꞌmo ina lagimo ani kavaꞌmo huꞌa agiꞌaleꞌmo aliꞌa asaga hugae.

³Geꞌamo afiteꞌa akame huꞌa muki afinaꞌmo alagepa kavaꞌmo nehaya vayaꞌmogimo Goti aulagaleꞌmo alagepa huꞌa maiꞌnayanageꞌa afaꞌa apamogaga aigae.

⁴Ala kava nene, huꞌna, Vayakamo hapa maesana afinaꞌmo nagaeꞌefeꞌmo kagesamo afiyo. Apakufamo alika katika apatesana afinaꞌmo nagaeꞌeꞌmo nagufamo alika katika nato.

⁵Naha maegeꞌnao vayakamo alagepa huꞌa maisageꞌna apaketeꞌnaeꞌmo apakaegiꞌeꞌmo magokepi namogaga aiteꞌna vayakaꞌeꞌmo Goti vayaꞌamo maiꞌnone, huꞌna huteꞌna magokepi lamogaga aigune.

⁶Laginago vayaꞌmogimo hosu kavakeꞌmo huꞌa maiꞌnaya kava huta hosu kavakeꞌmo huta maiꞌnone.

⁷Laginago vayaꞌmogi Isipi kotegamo maiꞌnagenoꞌaeꞌmo Gotiꞌa lokiya aune kavaꞌmo huꞌniyana ageꞌa aeto osuꞌnae. Hau huno apateꞌniya kavafeꞌmo alagepa huꞌa apakesamo oꞌafiꞌnafa ago apake kaniꞌniye. Apakaemo solovala aniteꞌmo uꞌa avaꞌyi huteꞌaeꞌmo anaga hogote vekalegamo hosu kavaꞌmo huteꞌa geꞌamo ago amagiꞌa ataleꞌnae.

⁸Amagiꞌa ataleꞌnayaꞌmonanafa lapa maegauve, huno huꞌniya gemo akame huno himamuꞌamo alino apave lisiyafeꞌmo apakufamo alino katino apateꞌniye.

⁹Agaemo solovala anifeꞌmo, aika kaka vao, huno huꞌnigeno aino akaka vaeꞌnigeno aniꞌmo folagapiꞌmo hau huꞌniya mopaleꞌmo apavalelino uꞌniye.

¹⁰Agaemo kame vayaꞌai apayapatiꞌmo apakufamo ago alino katino apatetenoꞌaeꞌmo ani kava huno kame vayaꞌapilegatiꞌmo apavalelino eꞌnigeꞌa eꞌa afaꞌa maiꞌnae.

¹¹Aniꞌmoꞌa kame vayaꞌapimo ago aeno apati kaeꞌnigeꞌa muki vayaꞌamo ago faliꞌnae.

¹²Ani kava huꞌnigeꞌapaeꞌmo geꞌaeꞌmo apakesamo afiꞌa fatago huꞌnae.

¹³Huꞌnayaꞌmonanafa huꞌniya kavafeꞌmo ago apake kaniꞌnigeꞌapaeꞌmo agaefeꞌmo na kava hisune, huꞌa afi okeꞌneꞌa afa kavaꞌmo huꞌnae.

¹⁴Kaꞌme kotega maiꞌneꞌaeꞌmo hosu hapaꞌye huꞌnigeꞌa Gotiꞌmo amalageka huꞌa ateꞌnae.

¹⁵Agaefeꞌmo lamiyo, huꞌa ge huꞌnaya gemo afiꞌniyaꞌmonanafa kaitaꞌmo apamiꞌnigeꞌa ago faliꞌnae.

¹⁶Kaꞌme kotega maiꞌneꞌaeꞌmo Moseseꞌe Ala kava neꞌmo aliꞌyaꞌamo neꞌaliya vekamo Eloniꞌefeꞌmo, aetana laga oseꞌnaꞌaꞌmofeꞌmo yagaitana olateꞌao, huꞌa huꞌnageno mopamo aino akaka vaeꞌnigeꞌa Neteniꞌe afamo anagaꞌaꞌenagi Amilamiꞌe afamo anagaꞌaꞌenagi huꞌa asagauꞌa aiꞌnageno aino akaniteno aeno apati kaeꞌniye.

¹⁸Kokuꞌnapatiꞌmo atamo emineno hosu kavaꞌmo huteꞌa anakame huꞌnaya vayaꞌeꞌmo alagi leno apasaga liꞌniye.

¹⁹Alu afinaꞌmo apakaemo goli yafatetiꞌmo pulumakamo auneꞌamo alo huteꞌa mono huꞌnae.

²⁰Apakaemo ani kava huꞌa ha le konali Gotiꞌmo ataleꞌa agae aimuꞌyaleꞌmo kahaumo neꞌneya pulumakamo auneꞌalefeꞌmo mono huꞌnae.

²¹Gotiꞌa lokiya aune kavaꞌmo Isipi kotegamo huteno apakufamo alino katino apateꞌniya kavafeꞌmo ago apake kaniꞌniye.

²²Agaemo Isipi kotegamo aune kavaꞌmo huteno solovala aniteꞌeꞌmo lokiya kavaꞌmo huꞌnigeꞌapaeꞌmo hapau aiꞌnae.

²³Henagaꞌamo Gotiꞌa aipamo leno apatetenoꞌaeꞌmo vayaꞌnimo aliꞌna apagoꞌya lagauꞌna apatalegauve, huno nehigenoꞌaeꞌmo aliꞌyaꞌamo alisiyafeꞌmo Gotiꞌa lekana paino ateꞌniya vekamo Moseseꞌa nunumu huno apatetenoꞌaeꞌmo apamagisiya kaꞌmo ago akani maleꞌnigeno Gotiꞌa afaꞌa apateꞌniye.

²⁴Apateteno alagepa mopamo lapamiguve, huno huꞌniyana apakesamo afiꞌa fatago osuꞌnayaꞌmofeꞌmo ina agufa mopamo haneꞌniye, huꞌa huteꞌa alagepa mopaeꞌmo ohapauꞌniye.

²⁵Apakaemo seli noꞌapifiꞌmo maiꞌneꞌaeꞌmo Goti geꞌamo akame osuꞌa ge nege nege huꞌageꞌmo maiꞌnae.

²⁶Ani kava huꞌa maiꞌnagenoꞌaeꞌmo ani vayaꞌaifeꞌmo kaꞌme kotegamo lapamagiteꞌna henagaꞌamo lapakinago vayaꞌmo alagepa mopaꞌapiletiꞌmo aliꞌna hapa faitalesugeꞌa alu vayaꞌai kotegamo uꞌa falige falige huꞌa maigae, huno hapa paiꞌniye.

²⁸Henagaꞌamo Piyo kotega aigofe gotiꞌapimo agiꞌamo Malifeꞌmo mono huteꞌa aunemeꞌamo ohaneꞌniya aigofe gotiꞌa ofalinimo amiteꞌa amiꞌnaya ofalini yaꞌmo aliꞌa neꞌnae.

²⁹Ani kava huꞌnagenoꞌaeꞌmo Ala kava neꞌmoꞌa aipamo leno apateteno alopa kaitaꞌmo apamiꞌniye.

³⁰Apamiꞌnigeno Finiyasiꞌa he tino hosu kavaꞌmo huꞌnaya vayaꞌmo apamagiꞌnigeꞌa faliꞌnageno Gotiꞌa magoꞌe huno kaitaꞌmo alino oꞌapamino ataleꞌniye.

³¹Finiyasiꞌa ani alagepa kavaꞌmo huꞌnigenoꞌaeꞌmo Gotiꞌa naulagaleꞌmo fatago kavaꞌmo huꞌniye, huno hu maleꞌniyanageno fatago kavaꞌamo muki afinaꞌmo hanege hanege huno hanegaiye.

³²Apakaemo Melima kotegamo yafapatiꞌmo aniꞌmo emineꞌniya kotegamo hosu kavaꞌmo huꞌnagenoꞌaeꞌmo Gotiꞌa aipamo leno apateꞌniye. Hosu kavaꞌmo huꞌnagenoꞌaeꞌmo Moseseꞌa hosu aipamo kaliꞌnigeno agesamo oꞌafiꞌneno malage huno hosu gemo huꞌnigeno Gotiꞌa kana yaꞌmo alino amiꞌniye.

³⁴Henagaꞌamo Gotiꞌa, alu nofi vayaꞌmo muki vayaꞌamo apamagigeꞌa faliyo, huno huꞌniya gemo oꞌafiꞌnae.

³⁵Oꞌafiꞌa alu nofi vayaꞌai aꞌmafaꞌneꞌapimo alige aꞌmafaꞌneꞌapimo apamige huꞌa maiꞌneꞌapaeꞌmo hosu kavaꞌapimo akame huꞌa maiꞌnae.

³⁶Aigofe gotiꞌapimogifeꞌmo mono huꞌnayaꞌmofeꞌmo Gotiꞌa apamagiꞌniye.

³⁷Apakaemo mafaꞌneꞌapiꞌe aꞌmafaꞌneꞌapiꞌeꞌmo apamagiꞌa hosu apaune vayaꞌmo ofalinimo apamiꞌnae. Apakaemo mago kavaꞌmo osuꞌnaya nute mafaꞌneꞌapimo apamagiteꞌa Kenani vayaꞌai aigofe gotiꞌapimogimo aliꞌa apamiꞌnae. Apamagiꞌnaya mafaꞌneꞌapimogi kolaꞌmoꞌa mopamo alagi alino hosu huno ateꞌniye.

³⁹Apakaemo Gotiꞌa apakameꞌya amiteꞌa hosu kavaꞌmo huteꞌa apakaiꞌapimo aliꞌa hosu huꞌa apateꞌnae.

⁴⁰Ani kava huꞌnagenoꞌaeꞌmo Ala kava neꞌmoꞌa agaiꞌa vayaꞌaifeꞌmo aipamo leno apateteno ohauꞌniye.

⁴¹Hapa oꞌmaeno afaꞌa apakeno apataleꞌnigeꞌapaeꞌmo alu nofi vayaꞌmo kame vayaꞌapimogimo eꞌa yagaiꞌa apateꞌnae.

⁴²Kame vayaꞌapimogi yagaiꞌa apateꞌnageꞌa apaiyafiꞌmo maiꞌneꞌa geꞌapimo akame huꞌnae.

⁴³Agaemo asole afinaꞌmo apakufamo alino katino apateme apateme eꞌniyaꞌmonanafa apakameꞌya amiteꞌa hosu kavaꞌmo huteꞌapaeꞌmo hanageke yaꞌmo aliꞌnae.

⁴⁴Ani kava huꞌa maiꞌnayaꞌmonanafa agaefeꞌmo keya aeꞌa ge huꞌnageno hau huno apateꞌniye.

⁴⁵Kotalake gemo huguve, huno hu maleꞌniya geꞌaeꞌmo agesamo afiꞌniye. Apakaefeꞌmo hau huno apateteno halate agesamo afiꞌniye.

⁴⁶Agaemo kalavusi aliꞌyateꞌmo apavaleli uꞌa apateꞌnaya vayaꞌaifeꞌmo hapa paiꞌnigeꞌa hapau huꞌa apateꞌnae.

⁴⁷O Gotiyo, huꞌna, Ala kava netimogae, lagufamo alika katika lateteka alu nofi vayaꞌai apayapatiꞌmo lavaleka alika anupa huka lategetao kaote kagikaleꞌmo alita asaga huta ateteta kahao ke heteta lamogaga aino.

⁴⁸Isaleli vayaꞌai Gotiꞌapimo agiꞌaleꞌmo alitapa asaga hiyo. Hemenimo agiꞌaleꞌmo alitapa asaga hutetapa muki afinaꞌefeꞌmo agiꞌaleꞌmo alitapa asaga hiyo. Muki vayaꞌamogitapamo he, lama ge hutapa hiyo. Agiꞌaleꞌmo alitapa asaga hiyo. Gotiꞌa hosu kavategatiꞌmo apakufamo alino katino neꞌateya kavafeꞌmo ava gemo huꞌniya gemae