Read Keyagana Samu 118 Bible Online

Samu 118 - Keyagana bible

Samu 118

¹Ala kava neꞌmo alagepa vekamo maiꞌniyaꞌmofeꞌmo agaefekeꞌmo hao ke heyo. Hau huno neꞌapateyanageno muki afinaꞌaeꞌmo hau huno apatege apatege huno maigiye.

²Isaleli vayaꞌmogitamo, Hau huno neꞌapateyanageno muki afinaꞌaeꞌmo hau huno apatege apatege huno maigiye, huta higetao.

³Eloni nofi vayaꞌamogitapamo, Hau huno neꞌapateyanageno muki afinaꞌaeꞌmo hau huno apatege apatege huno maigiye, hutapa hiyo.

⁴Muki vayaꞌamogitapamo agaefekeꞌmo koli hutetapa mono nehaya vayaꞌmogitapamo, Hau huno neꞌapateyanageno muki afinaꞌaeꞌmo hau huno apatege apatege huno maigiye, hutapa hiyo.

⁵Lusi hanageke yaꞌmo aliꞌneꞌnaeꞌmo Ala kava nefekeꞌmo keya aeꞌna ge huꞌnogenoꞌaeꞌmo geꞌnimo afiteno hatu maeno nateꞌnigeꞌna afaꞌa maiꞌnove.

⁶Ala kava neꞌmo nagae vekamogeno naha maesiyafeꞌmo maiꞌniyaꞌmofeꞌmo vayaꞌmogi nagaetegamo hisaya kavafeꞌmo koli osuguve.

⁷Ala kava neꞌmo nagae vekamogeno naha maesiyafeꞌmo maiꞌniyaꞌmofeꞌmo apakeꞌnovana kame vayaꞌnimo asagauꞌa aigae.

⁸Vayaꞌmogimo laha maesayafeꞌmo lagesamo afisunana kanale osugifa Ala kava nefekeꞌmo laha maegaiye, huta lagesamo afisunana kanale hugiye.

⁹Ala apaki aliteꞌa neꞌyagaiya vayaꞌmogi laha maesayafeꞌmo lagesamo afisunana kanale osugifa Ala kava nefekeꞌmo laha maegaiye, huta lagesamo afisunana kanale hugiye.

¹⁰Muki alu nofi vaya alu nofi vayaꞌmo kame vayaꞌnimo maiꞌneꞌa faiꞌa ku aiꞌa nateꞌnageꞌnaeꞌmo Ala kava neꞌmo himamuꞌaletiꞌmo alagi aliꞌna hano huꞌna apatalegauve.

¹¹Muki haopalega maiꞌneꞌa faiꞌa ku aiꞌa nateꞌnageꞌnaeꞌmo Ala kava neꞌmo himamuꞌaletiꞌmo alagi aliꞌna hano huꞌna apatalegauve.

¹²Kevegevegana huꞌa faiꞌa ku aiꞌa nateꞌnayaꞌmonanafa aufe nofipiꞌmo malage huno atamo leno yu neheya kava huꞌna Ala kava neꞌmo himamuꞌaletiꞌmo alagi aliꞌna hano huꞌna apatalegauve.

¹³Kameꞌnimogae, huꞌna, alika nagoꞌya faitalanageꞌna heleve hugefe huꞌnogenoꞌaeꞌmo Ala kava neꞌmoꞌa naha maeꞌniye.

¹⁴Ala kava neꞌmoꞌa lokiya vaino nateꞌnigeꞌna yoke nehuve. Agaemo nagufamo ago alino katino nateꞌniye.

¹⁵Afiyo, huꞌna, alagepa vayaꞌmogimo seli noꞌapifatiꞌmo apakufamo ago alino katino apateꞌniya kavafeꞌmo yoke huꞌapaeꞌmo, Ala kava neꞌmoꞌa himamuꞌaletiꞌmo ani kavaꞌmo huꞌniye.

¹⁶Himamuꞌaletiꞌmo aeta apakaseꞌnone, huꞌa nehae.

¹⁷Ofaliꞌna afaꞌa maiꞌneꞌnaeꞌmo Ala kava neꞌmoꞌa huꞌniya kavafeꞌmo ava gemo aeꞌna hakalo huꞌna hapa paiguve.

¹⁸Ala kava neꞌmoꞌa lusi kava huno namagiꞌniyaꞌmonanafa falisuvafeꞌmo afaꞌa oꞌnataleꞌniye.

¹⁹Alopa mono noꞌmo kitamo yakika nategeꞌnao haiꞌna Ala kava nefeꞌmo hao ke heno.

²⁰Ala kava neꞌmoꞌa kipaꞌamo haneꞌnigeꞌa alagepa vayaꞌageꞌmo faleꞌa nehaiye.

²¹Geꞌnimo afiteka nagufamo alika katika nateꞌnanaꞌmofeꞌmo kahao ke nehove.

²²Yafatetiꞌmo no nekiya vayaꞌmogimo mago no nekiya yafafeꞌmo, afa yafane, huꞌa huteꞌa aliꞌa yaga auꞌa ataleꞌnagenoꞌaeꞌmo Gotiꞌa ani yafafeꞌmo, hogote yafaꞌmo noꞌmo faiꞌna atesuvafeꞌmo konale yafaꞌmo haneꞌniye, huno huteno alino asaga huno ateꞌniye.

²³Ala kava neꞌmoꞌa ani kavaꞌmo huꞌnigetaeꞌmo ageteta aeto agufa kanale kava huꞌniye, huta lahau aiꞌnone.

²⁴Ala kava neꞌmoꞌa ani afinaꞌmo hu maleꞌniye. Ani afinaꞌmo lamogaga aigetao.

²⁵Aukaya hutaeꞌmo, O Ala kava nene, huta, lagufamo alika katika lato. O Ala kava nene, huta, laha maegenoꞌao aliꞌyatimoꞌmo alagepa huno afole aino, huta aukaya nehune.

²⁶Gotiꞌa Ala kava neꞌmo agiꞌalefeꞌmo neꞌeya vekamo fiku ha maeno amino. Lagaemo Ala kava neꞌmo mono noꞌafatiꞌmo Gotiꞌa fiku lapa maeno lapamino, huta nehune.

²⁷Ala kava neꞌmo Gotiꞌa maiꞌniye. Agaemo ha le yaꞌamo alino lamiꞌniye. Ofalini afumo alitapa hiꞌyalamuteꞌmo maleꞌnetapa nofitetiꞌmo kitapa atafau maleyo.

²⁸Gotiꞌnimogamo maiꞌnananageꞌna kahao ke hegauve. Gotiꞌnimogamo maiꞌnananageꞌna ala kagikamo kamiguve.

²⁹Ala kava neꞌmo alagepa vekamo maiꞌniyaꞌmofeꞌmo agaefekeꞌmo hao ke heyo. Hau huno neꞌapateyanageno muki afinaꞌaeꞌmo hau huno apatege apatege huno maigiye.