Read Keyagana Samu 139 Bible Online

Samu 139 - Keyagana bible

Samu 139

¹Ala kava nene, huꞌna, alagi nageka alagepa huka nageꞌnane.

²Nagaemo itopaleꞌmo neꞌmaufi he tiꞌna neꞌmaufi huꞌna maiꞌnogekaeꞌmo neꞌnagane. Kagaemo afagitegamo maiꞌnekaeꞌmo nagesa neꞌafuva nagesamo neꞌnagane.

³Umenitata huge havaege nehugekaeꞌmo nageteka muki nehuva kavaꞌnimo ago neꞌnagane.

⁴Ge osuꞌnovaꞌmonanafa Ala kava nene, huꞌna, henagaꞌamo hisuva geꞌnimo ago ageꞌnane.

⁵Yagaika ku aika nateteka nagaeteꞌmo kayaꞌmo maleka neꞌnatane.

⁶Ago nageꞌnanana kagae kaipa kagesamoꞌmo nagae naipa nagesamo ago aeno agaseꞌniyanageꞌna afaꞌa oꞌagegauve.

⁷Kagaetegatiꞌmo faiꞌna kasalo paetaleꞌna haiyategamo uguve. Maiꞌnanategamo uꞌna oꞌmaiꞌna naoteꞌmo maisuvafeꞌmo haiyategamo uguve.

⁸Kokuꞌnapiꞌmo haiꞌna maisuvana maiꞌnane. Nagaemo faliꞌnaya vayaꞌmo uꞌa maiꞌnaya kotegamo lamiꞌna maiguvana maiꞌnane.

⁹Yegemo hainenoꞌaeꞌmo hayomo neꞌaeya yaꞌmoꞌa afagitega mopa atupaleꞌmo malage huno neꞌviya kava huꞌna malage huꞌna afagitega uꞌna maiguvana maiꞌnane.

¹⁰Afagitega uꞌna maiꞌnisugekaeꞌmo kayatetiꞌmo navalelika egane. Ani kava huka lamaga kayatetiꞌmo natafauka maigane.

¹¹Nagaemo, hani huka aika nati kao, huꞌna hisuvana hani huꞌniya yapiꞌmo ha le yakamoꞌa aeno ha leꞌnigeka neꞌnagane.

¹²Hani huꞌnisiya yapiꞌmo uꞌna fala kisuvana nagegane. Yegemoꞌmo aeno ha neleya kava huno kagae kaulagaleꞌmo hanipiꞌmo aeno ha nele. Hani nehiya kavaꞌmoꞌmo kagae kaulagaleꞌmo ha le yakana huno haneꞌniye.

¹³Muki nahau nayamopafiꞌmo haneꞌniya yaꞌaꞌnimo kagaikamo alo huꞌnanageno kagaika yaꞌmo haneꞌniye. Muki nagufafiꞌmo haneꞌniya yaꞌaꞌnimo alo huteka alika itaꞌnimo aipafiꞌmo magokepi maleꞌnane.

¹⁴Kagaemo alagepa huka alo huka nateꞌnanaꞌmofeꞌmo koli huteꞌna kagikaleꞌmo aliꞌna asaga nehuve. Nagaetegamo huꞌnana kavaꞌmo ageteꞌnaeꞌmo nahau neꞌauve. Huꞌnana kavafeꞌmo alagepa kavaꞌmo huꞌnane, huꞌna huteꞌna aliꞌna namalagiꞌnove.

¹⁵Itaꞌnimo aipafiꞌmo maiꞌnogenoꞌaeꞌmo nayamufaꞌnimo afole aiteno kosime kosime uꞌnigeka nageꞌnane.

¹⁶Itaꞌnimoꞌmo aipafatiꞌmo alino oꞌnateꞌniya afinaꞌmo muki nagufafiꞌmo haneꞌniya yaꞌaꞌnimo ago ageꞌnane. Ma mopafiꞌmo afole aiꞌna oꞌmaiꞌnogekaeꞌmo na magi afinaꞌmo ma mopafiꞌmo maisapi huka mukufiꞌmo ago avoꞌmo kae maleꞌnane.

¹⁷Nagaefeꞌmo kagesamo neꞌafina kavakamoꞌmo aeto agufa kanale yaꞌmo haneꞌnigeno neꞌnahaiye. Nagaefeꞌmo kagesamo neꞌafina kavaꞌmo lusi asole kavaꞌmo haneꞌniye.

¹⁸Lekana paiguvana ani kahaepaleꞌmo aise yafaꞌmo ago aeno agaseꞌniya agufa yaꞌmo haneꞌniye. Naupatiꞌmo he tiꞌnaeꞌmo kagaeꞌekeꞌmo maiꞌnoꞌae.

¹⁹O Gotiyo, huꞌna, hosu vayaꞌmo apamagisanafeꞌmo neꞌnahaiye. Kaveta nehapaya vayaꞌmo nataleꞌa visayafeꞌmo neꞌnahaiye.

²⁰Apakaemo kagaefeꞌmo hosu gemo huteꞌa huꞌa faipa huꞌa nekatae.

²¹O Ala kava nene, huꞌna, Apaini huꞌa nekataya vayaꞌaifeꞌmo naini huꞌna neꞌapatove. Apakameꞌyamo nekamiya vayaꞌai apaulagafiꞌmo navenatuꞌna heꞌna neꞌapatove.

²²Nagaemo apakaefeꞌmo alagi oꞌnahauꞌnigeꞌnaeꞌmo, kame vayaꞌnie, huꞌna nehuve.

²³O Gotiyo, huꞌna, naipa nagesafiꞌmo alagepa huka alika fako huka nago. Naipa nagesafiꞌmo aulu haeka ago.

²⁴Naipafiꞌmo hosu kavaꞌnimo haneꞌnifigi ageteka alagepa huꞌna maige maige huꞌna maisuva kateꞌmo navalelika uvo.