Read Keyagana Samu 145 Bible Online

Samu 145 - Keyagana bible

Samu 145

¹Gotiꞌnimogamo kini neꞌnimogae, huꞌna, kagaefekeꞌmo ala vekamo maiꞌnane, huꞌna huguve. Muki afinaꞌmo kahao ke hege hege huꞌna kahao ke hegauve.

²Muki afinaꞌae afinaꞌaeꞌmo kahao ke hegauve. Muki afinaꞌmo kagikaleꞌmo aliꞌna asaga huge huge huꞌna maiguve.

³Ala kava neꞌmo ala neꞌmo maiꞌniyaꞌmofeꞌmo agiꞌaleꞌmo aliꞌa asaga huꞌa atesaya vekamo maiꞌniye. Ala agiꞌamo haneꞌniyaꞌmofeꞌmo ageta aeto osugune.

⁴Itaꞌapi afoꞌapimogimo huꞌnana kavafeꞌmo, lusi alagepa kavaꞌmo huꞌniye, huꞌa aliꞌa apatesaya mafaꞌneꞌapieꞌmo kava gemo huꞌa hapa paitesageꞌapaeꞌmo apakaemo henagaꞌamo aliꞌa apatesaya mafaꞌneꞌapieꞌmo kava gemo huꞌa hapa paite hapa paite huliꞌa ugae.

⁵Apakaemo kagaefeꞌmo huꞌapaeꞌmo, ha le konali yaꞌagi ala agiꞌagi huno haneꞌniya vekamo maiꞌniye, huꞌa hisageꞌnaeꞌmo nagaeꞌeꞌmo aeto agufa kanale kavakaeꞌmo nagesa afifi huꞌna maiguve.

⁶Vayaꞌmogi lokiya kavaꞌmo nehana kavakaeꞌmo kava gemo hisageꞌnaeꞌmo nagaeꞌeꞌmo, ala vekamo maiꞌniye, huꞌna huguve.

⁷Apakaemo kanale alagepa kavaꞌmo nehana kavafeꞌmo kava gemo huꞌa hapa paige fatago kavakaeꞌmo yokemo huge huꞌa maigae.

⁸Ala kava neꞌmoꞌa fiku laha maeno lamige hau huno latege malage huno aipamo leno olatege hau ayamopafiꞌmo hauge huno neꞌmaiye.

⁹Agaemo muki vayaꞌaitegamo alagepa kavaꞌmo huteno muki alo hu maleꞌniya yategaꞌeꞌmo hau huno neꞌapate.

¹⁰O Ala kava nene, huꞌna, muki alo huꞌnana vayaꞌmogiꞌe yaꞌmogiꞌeꞌmo kagikaleꞌmo aliꞌa asaga hugae. Muki vayakamogimo kahao ke hegae.

¹¹Apakaemo muki vayaꞌmogimo lokiya kavaꞌmo nehana kavakaꞌe ha le konali yakaletiꞌmo neꞌyagaina kavakaleꞌefeꞌmo ava gemo afisayafeꞌmo neꞌyagaina kavafeꞌmo, lokiya himamuꞌaletiꞌmo ani kavaꞌmo nehiye, huꞌa hugae.

¹³Muki afinaꞌmo yagaige yagaige huka yagaigane. Ala kava neꞌmoꞌa, ma kavaꞌmo huguve, huno huꞌniya gemo akame huno ani kavaꞌmo nehiye. Muki kavaꞌamo alagepa kavaꞌageꞌmo haneꞌniye.

¹⁴Agaemo hanageke yaꞌmo neꞌaliya vayaꞌmo hapa maege asagauꞌa aiꞌnaya vayaꞌmo alino he tino apatege huno neꞌmaiye.

¹⁵Muki afaꞌa neꞌmaiya yaꞌmogiꞌe vayaꞌmogiꞌeꞌmo apaka neteya afinaꞌmo kagaefeꞌmo apakesamo neꞌafigekaeꞌmo neꞌyaꞌmo neꞌapamine.

¹⁶Hapauꞌnigekaeꞌmo neꞌapamine.

¹⁷Ala kava neꞌmoꞌa muki afinaꞌmo ani kava nehunoꞌaeꞌmo fatago kavaꞌmo huge yagu yaga kavaꞌmo huge nehiye.

¹⁸Ala kava neꞌmoꞌa agaefeꞌmo apaipafatiꞌmo keya aeꞌa ge nehaya vayaꞌai hapaopaleꞌmo eno neꞌmaiye.

¹⁹Agaefeꞌmo koli huꞌneꞌa mono nehaya vayaꞌaitegamo hapauꞌnisiya kavaꞌmo afaꞌa hugiye. Keya aeꞌa ge nehagenoꞌaeꞌmo apakufamo alino katino neꞌapate.

²⁰Ala kava neꞌmoꞌa agaefeꞌmo hapau apayamofiꞌmo hapauꞌniya vayaꞌaiteꞌmo yagaino neꞌapategeꞌa afaꞌa neꞌmaiye. Afaꞌa neꞌmaiyaꞌmonanafa muki hosu vayaꞌmo alino apagoꞌya lagauno apatalegaiye.

²¹Muki afinaꞌmo Ala kava neꞌmo agiꞌaleꞌmo aliꞌna asaga huꞌna ategauve. Muki afinaꞌmo muki afaꞌa neꞌmaiya yaꞌmogiꞌe vayaꞌmogiꞌeꞌmo aote agiꞌaleꞌmo aliꞌa asaga hiyo.