Read Keyagana Samu 17 Bible Online

Samu 17 - Keyagana bible

Samu 17

¹O Ala kava nene, huꞌna, Alagepa kavaꞌnieꞌmo ge hisugekaeꞌmo geꞌnimo afiyo. Kamalageka hisuvafeꞌmo nunumu osuꞌnogi kaipamo namiyo.

²Kaulagaleꞌmo maiꞌnisugekaeꞌmo alika fako huka natetekaeꞌmo, alagepa kavaꞌmo huꞌnane, huka huvo. Kagaemo alagepa kavaꞌnimo ago.

³Naipaeꞌmo amalageka huꞌnane. Kagaemo haniꞌilagamo eka nagetekaeꞌmo namalageka huꞌnanaꞌmonanafa hosu nagesa neꞌafuva kavaꞌnimo oꞌageꞌnane. Hosu gemo osuguve, huꞌna nagoꞌyamo ataleꞌna ge huꞌnove.

⁴Ma mopafi vayaꞌai kavaꞌapieꞌmo oꞌnahauꞌnigeꞌna nagesa noꞌafuve. Gekamo afiteꞌnaeꞌmo vayaꞌmo nehapaeya vekamo kaꞌaleꞌmo oꞌuꞌnove.

⁵Nagaemo kakaleꞌmo neꞌuꞌnaeꞌmo aeꞌna halu oꞌvalesuvafeꞌmo natafauvo.

⁶O Gotiyo, huꞌna, Geꞌnimo afaꞌa afiganaꞌmofeꞌmo kagaefekeꞌmo ge huꞌnove. Kagetafo huꞌneka geꞌnimo afiyo.

⁷Lamaga kayatetiꞌmo naha maeteka kahau kayamopafiꞌmo kahauꞌniya kavakamo ageꞌna nahau aisuva kavakamo alika nave liyo. O Gotiyo, huꞌna, kame hapaesayafeꞌmo huꞌnaya vayaꞌai apayapatiꞌmo apakufamo alika katika neꞌapatana Gotigae, huꞌna, Naha mao.

⁸Vayaꞌmogimo apaulagaleꞌmo alagepa huꞌa neꞌyagaiya kava huka yagaika nato. Kahakumo ulunapiꞌmo alika fala kika nato.

⁹Hosu vayaꞌmogimo kana yaꞌmo aliꞌa neꞌnamiye. Kame vayaꞌnimogimo nahaesayafeꞌmo yagaiꞌa ku aiꞌa nateꞌnayanagi naha mao.

¹⁰Apaipaguꞌe vayaꞌmo maiꞌnae. Ala apakimo alisayafekeꞌmo gemo nehae.

¹¹Apakaemo faiꞌa ku aiꞌa lateꞌnae. Laiyakamo ageteꞌa mopafiꞌmo aliꞌa yaga auꞌa latalesayafeꞌmo nehae.

¹²Hapaesayafeꞌmo yagaiꞌa maiꞌnaya laiyonigana huꞌa maige fala kino maiꞌniya aikeli laiyonigana huꞌa maige huꞌa maiꞌnae.

¹³O Ala kava nene, huꞌna, he tika eka apakaeꞌeꞌmo fotu nehukaeꞌmo mopafiꞌmo alika yaga auka apatalo. Kagaemo naipekaletiꞌmo hosu vayaꞌai apayapatiꞌmo nagufamo alika katika nato.

¹⁴O Ala kava nene, huꞌna, kayatetiꞌmo ma mopafi vayaꞌai apayapatiꞌmo nagufamo alika katika nato. Ma mopafikeꞌmo hetamaꞌapimo haneꞌniye. Kagaemo fala kino haneꞌniya alagepa yakamo alika neꞌapaminagenoꞌaeꞌmo apakupafiꞌmo havai teꞌniye. Mafaꞌneꞌapimo neꞌyaꞌmoꞌa apamu paeꞌniye. Apakaemo kagemi yaꞌapimo neꞌatalageꞌapaeꞌmo nute mafaꞌneꞌapimogi neꞌaliye.

¹⁵Kagemi yaꞌapimo neꞌaliyaꞌmonanafa nagaemo fatago kavakamo aliꞌnovanageꞌna kaugosafiꞌmo kagegauve. Nagaemo naupatiꞌmo he tiꞌna kagaekana huꞌna maiꞌneꞌnaeꞌmo magoꞌe kavafeꞌmo nahaꞌye osugiye.