Read Keyagana Samu 19 Bible Online

Samu 19 - Keyagana bible

Samu 19

¹Kokuꞌnateꞌmo haneꞌniya yaꞌmoꞌa Goti ha le konali yaꞌaeꞌmo aeno hakalo huno hapa nepaiye. Kokuꞌnaꞌmoꞌa Goti alagepa aliꞌyaꞌamo alino apave neliye.

²Felugaꞌe felugaꞌeꞌmo ge nehunoꞌaeꞌmo haniꞌilagaꞌe haniꞌilagaꞌeꞌmo huꞌa ageteꞌa afisayafeꞌmo alino apave neliye.

³Muki ma mopafiꞌmo maiꞌneꞌa alu apake alu apakemo neꞌaiya vayaꞌmogimo kokuꞌnate haneꞌniya yaꞌmo ava gemo neꞌafiye. Ava gemo oꞌafiꞌnaya vayaꞌmo mago oꞌmaiꞌnae.

⁴Kokuꞌnate haneꞌniya yaꞌmo ava gemo muki haopalega mopamo loleꞌe loleꞌe atupalegamo aino atagu faelino uneno hulino uꞌniye. Gotiꞌa yegemo noꞌamo kokuꞌnapiꞌmo ki maleꞌniye.

⁵Aꞌmo aligefeꞌmo nehaya vayaꞌmogi noꞌapimo ataleꞌa apamogaga aime aime neꞌvaya kava huno yegemoꞌmo haineno nelamiye. Apayamufa vayaꞌmogimo uꞌa aeꞌa apakasesayafeꞌmo nagu nagu huꞌa neꞌvaya kava huno yegemoꞌmo haineno nelamiye.

⁶Yegemoꞌa kokuꞌnaꞌmo aepalegatiꞌmo haineno atupalegamo nelamiye. Yegemo nelegenoꞌaeꞌmo mago amuko nosiya aupilagamo ohaneꞌnifa muki aupilagaꞌamo alagi leno amuko huno neꞌate.

⁷Ala kava neꞌmo keꞌaepa geꞌamo kanale alagepa gemo haneꞌneno apakupi mafaꞌnemo alino alagepa huno neꞌate. Ala kava neꞌmo faigoko geꞌamoꞌmo aino ataginovano nosifa alagepa huno haneꞌnenoꞌaeꞌmo oꞌageꞌnaya vayaꞌmo alino apaya maleꞌnigeꞌa apakesamo neꞌafiye.

⁸Keꞌaepa gemo api gemo haneꞌnigeꞌa neꞌafiya vayaꞌmogi apamogaga neꞌaiye. Ani kava hiyo, ina kava osiyo, huno huꞌniya gemo hosu gemo ohaneꞌnifa alagepa geꞌageꞌmo haneꞌneno apaulagamo alino ayakeno apateteno alino alagepa huno neꞌapate.

⁹Ala kava nefekeꞌmo koli huteꞌa mono nehaya kavaꞌmo yaveyave kavaꞌmo haneꞌneno muki afinaꞌmo hanege hanege huno hanegaiye. Ala kava neꞌmoꞌa alino fako huno neꞌapateya gemo alagi lama geꞌageꞌmo haneꞌneno fatago gemo haneꞌniye.

¹⁰Alopa monieꞌmo hapaꞌye nehiya kava huꞌa geꞌamo afisayafeꞌmo magoꞌe huno hapaꞌye hisiya agufa gemo haneꞌniye. Magoꞌe huno hagaꞌage gemo haneꞌneno kevegeve anumoꞌmo nehiya hagaꞌamo ago aeno agaseno haneꞌniye.

¹¹Gekamoꞌmo, ehekae, huno nehigeꞌnaeꞌmo aliꞌyakamo neꞌaluva vekamoꞌnamo afiteꞌnaeꞌmo atete nehuve. Gekamo akame nehaya vayaꞌmogimo alopa miyaꞌapimo aligae.

¹²Muki vayaꞌmogimo muki hosu kavaꞌapifatiꞌmo aeꞌa kasalo nepaya kavaꞌapimo alagepa huꞌa afaꞌa oꞌagegae. Ala kava nene, huꞌna, hosu kavaꞌmo haneꞌniye, huꞌna oꞌageꞌna huꞌnova hosu kavaꞌnimo aeka kalo paeka atalo.

¹³Hosu kavaꞌmo haneꞌniye, huꞌna ago ageꞌnova hosu kavaꞌmo halate osisuvafeꞌmo natafauka nato fiku yanageno ani hosu kavaꞌmoꞌa yagaino nategaiyanagi. Ani kava huka naha maesanageꞌnaeꞌmo vaiꞌmo oꞌaliꞌna hogote hosu kavaꞌmo aeno agaseꞌniya hosu kavaꞌmo osuguve.

¹⁴Ala kava nene, huꞌna, miya faika nateteka himamuꞌnimo alika neꞌnamina vekaꞌnimo maiꞌnane. Navayafatiꞌmo nehuva geꞌnimo ago afiteka naipafiꞌmo nagesamo neꞌafuva kavaꞌnimo kaulagafatiꞌmo ago nagetekaeꞌmo, alagepa kavaꞌmo huꞌnane, huka hisanafekeꞌmo neꞌnahaiye.