Read Keyagana Samu 5 Bible Online

Samu 5 - Keyagana bible

Samu 5

¹O, Ala kava nene, huꞌna, geꞌnimo afika alagepa huka afiyo. Naipafiꞌmo nagesa afifi huꞌna neꞌmauvanagi kaipamo namiyo.

²Ala kini vekaꞌnimo Gotiꞌnimogae, huꞌna, kagaefekeꞌmo nunumu huguvaꞌmofeꞌmo keya aeꞌna ge hisuva geꞌnimo afiyo.

³Nagaemo muki afinaꞌmo netepiꞌmo ge hisugeka afigane. O, Ala kava nene, huꞌna, Netepiꞌmo nunumu hisuva geꞌnimoꞌa kevemo haegekana huꞌna kahaeteꞌna aliꞌna maku huꞌna kagegauve.

⁴Kagaemo hosu kavafeꞌmo amuse huka noꞌatana Gotigamo maiꞌnane. Hosu kavaꞌmoꞌa kagae kahaopaleꞌmo alagi lokaeno ohanegaiye.

⁵Apakiꞌapileꞌmo aliꞌa asaga nehaya vayaꞌmo kaulagaleꞌmo he tiꞌa oꞌmaigae. Kagaemo muki hosu kavaꞌmo nehaya vayaꞌaifeꞌmo alagi okahauꞌnigeka kaini huka neꞌapatane.

⁶Kagaemo aigofe gemo nehaya vayaꞌaina alika apagoꞌya lagauka apatalegane. Ala kava neꞌmoꞌa vayaꞌmo nehapaya vayaꞌe humi neꞌapataya vayaꞌefeꞌmo avenatuꞌna heno atalegekana huno neꞌmaiye.

⁷Ani kava huka maiꞌnanaꞌmonanafa nagaefeꞌmo muki kahau huka neꞌnatana kavakaletiꞌmo nokafiꞌmo faleꞌna haiguve. Kagaefekeꞌmo koli huteꞌnaeꞌmo aote mono nokamo ageteꞌna mono huguve.

⁸O, Ala kava nene, huꞌna, kame vayaꞌnimo maiꞌnayaꞌmofeꞌmo fatago kavakafiꞌmo nayateꞌmo alika navalelika uvo. Naulagamo kakaleꞌmo alika api aika nato.

⁹Lama gemo apavayafiꞌmo alagi ohaneꞌniye. Apaipafiꞌmo hosu kavaꞌageꞌmo haneꞌniye. Lugoꞌapimo kano kelimo aliꞌa halo neꞌaigeno atu neꞌaiya kano keligana huno haneꞌniye. Apavenafuꞌnaletiꞌmo hapaisiya agufa gemo nehae.

¹⁰O Gotiyo, huꞌna, Vaiꞌmo alika apamiyo. Alika apatalegeꞌapao ani kavaꞌmo hugune, huꞌa apakesamo neꞌafiya kavatetiꞌmo asagauꞌa aiyo. Kagaetegamo hosu kavaꞌmo huteꞌa gekamo ago amagiꞌa ataleꞌnayaꞌmofeꞌmo asole hosu kavaꞌapifiꞌmo maiꞌnagi alika yaga auka apatalo.

¹¹Apataleganaꞌmonanafa kagaefekeꞌmo, laha maegaiye, huꞌa apakesamo neꞌafiya vayaꞌmogi muki afinaꞌmo alopa gefatiꞌmo huteꞌa apamogaga aiyo, kagaemo alagepa huꞌa maisayafeꞌmo aika apati kaeꞌnanaꞌmofeꞌmae. Kagikaeꞌmo hapau apayamopafiꞌmo hapauꞌnisiya vayaꞌmogimo kagaepiꞌmo apamogaga aiyo.

¹²O Ala kava nene, huꞌna, kagaemo fatago vayaꞌmo hapa maesanageꞌa alagepa huꞌa maigae. Kagaemo haleguꞌapigana huka faika ku aika apategane.