Read Keyagana Samu 8 Bible Online

Samu 8 - Keyagana bible

Samu 8

¹Ala kava nene, Ala kava netimogae, huꞌna, ma mopafi muki haopalegatiꞌmo ala kagikamo aliꞌnane. Ha le konali yakamoꞌa kokuꞌnate haneꞌniya yaꞌe vayaꞌeꞌmo ago aeno apakaseꞌniye.

²Kagaemo muki aise mafaꞌne anagaꞌe nute mafaꞌne anagaꞌeꞌmo lokiya vaika apateꞌnanageꞌapaeꞌmo kagikaleꞌmo aliꞌa asaga nehageꞌapaeꞌmo kamekamogiꞌe gekamo amagiꞌa neꞌatalaya vayaꞌmogiꞌeꞌmo ge osuꞌa afaꞌa maigae.

³Nagaemo kokuꞌnate yaꞌmo kayatetiꞌmo alo huꞌnana yaꞌmo kaiꞌe muki kanefiꞌeꞌmo alo huka maleꞌnana yafeꞌmo nagesamo neꞌafiꞌnaeꞌmo, ma mopafi vayaꞌmo ina agufa vayanagi na kava higeka apakaefeꞌmo kagesamo neꞌafine. Na kava higeka vemo mafaꞌnemo ha neꞌmane.

⁵Kagaemo vemo mafaꞌnemo alika atege enisole vayaꞌmo alika apatege huꞌnanageꞌapaeꞌmo enisole vayaꞌmogimo aise afinaꞌmo aeꞌa agaseꞌa maiꞌnae. Enisole vayaꞌai apaiyafiꞌmo alika ateteka ha le konali yaꞌaꞌe ala agiꞌaꞌeꞌmo alika amiꞌnane.

⁶Kagaemo, alo huꞌnova yateꞌmo yagaika apato, huka hapa paiteka muki yaꞌe vayaꞌeꞌmo alika aiyafiꞌmo apateꞌnane.

⁷Muki sipisipigi pulumakagi afela afugi kokuꞌnate namagi anipi noyamegi solovalapiꞌmo umenitata nehaya yanagi huka alika aiyafiꞌmo apateꞌnane.

⁹Ala kava nene, Ala kava netimogae, huꞌna, ma mopafi muki haopalegatiꞌmo ala kagikamo aliꞌnane.