Read Keyagana Samu 91 Bible Online

Samu 91 - Keyagana bible

Samu 91

¹Hogote Ala neꞌapimo fala kino maiꞌniyategamo haino neꞌmaiya vekamoꞌa lokiyaꞌage vekamo aunefiꞌmo fala kino maige maige huno maigiye.

²Nagaemo Ala kava nefeꞌmo huꞌnaeꞌmo, agaepiꞌmo fala kiꞌna maiꞌnogeno faino ku aino yagaino nateꞌneno naha maeno nagufamo alino katino nateꞌniya vekaꞌnimo maiꞌniye. Gotiꞌnimoꞌmo maiꞌniyanageno, naha maegaiye, huꞌna huguve.

³Agaemo oꞌageꞌnana nofitetiꞌmo aneꞌaimo hanagiꞌa aeꞌa katafaugefeꞌmo hisaya nofiꞌmoꞌa okatafausiyafeꞌmo hatu maeno kateteno lusi kaitaꞌmo kahausigekaeꞌmo ofalisanafeꞌmo alagepa huno yagaino kategaiye.

⁴Agaemo hakumo alino atalelineno hakufiꞌmo alino fala kino katesigeka alagepa huka hakufiꞌmo fala kika maigane. Lama geꞌamoꞌmo kagae halegukana huno haneꞌneno yagaino katesigeka maigane.

⁵Apakaemo hanipifeꞌmo koli hisaya yafeꞌmo kagaemo koli osugane. Kevemoꞌmo malage huno eno haniꞌniya kava huno yegemo neleya afinaꞌmo hosu kavaꞌmoꞌa malage huno kahaesiya kavafeꞌmo koli osugane.

⁶Haniꞌilagamo lusi kaitaꞌmo kahausigekaeꞌmo koli osugane. Felugamo alopa hanageke yaꞌmo kagaeteꞌmo afole aisiya kavafeꞌmo koli osugane.

⁷Kahaopaleꞌmo vani tauseniꞌa vayaꞌmo falige lamaga kahaopaleꞌmo teni tauseniꞌa vayaꞌmo falige huꞌa falisagenoꞌaeꞌmo falisana kavaꞌmo kahaopaleꞌmo afole oꞌaigiye.

⁸Kahaopaleꞌmo afole oꞌaigiyaꞌmonanafa kaulagafatikeꞌmo hosu vayaꞌmo hosu kavaꞌmo anonaꞌapilefeꞌmo hosu yaꞌmo alisageka apakegane.

⁹Kagaemo uꞌna fala kiꞌnova vekafifeꞌmo, agaepiꞌmo maige maige huꞌna maiguve, huka huꞌnanaꞌmofeꞌmo mago hosu yaꞌmoꞌa okahaesigeno hosu kaitaꞌmo nokaleꞌmo afole oꞌaigiye.

¹¹Ala kava neꞌmoꞌa enisole vayaꞌaeꞌmo, yagaitapa ateyo, huno hapa paisigeꞌa muki afinaꞌmo kategamo umenitata hisana afinaꞌmo yagaiꞌa kategayaꞌmofeꞌmo hosu kavaꞌmo kagaeteꞌmo alagi afole oꞌaigiye.

¹²Apayatetiꞌmo kavaleꞌa kasagausageno yafaꞌmoꞌa kaiyafiꞌmo okahaegaiye.

¹³Kaiyaletiꞌmo laiyoniꞌe nagaloꞌyaveꞌeꞌmo aeka latapaigane.

¹⁴Gotiꞌa, nagaefeꞌmo hau ayamopafiꞌmo hauꞌniyaꞌmofeꞌmo agufamo aliꞌna katiꞌna ategauve, huno huꞌniye. Nagiꞌnimo afino alagepa huꞌniyaꞌmofeꞌmo aliꞌna asaga huꞌna ategauve.

¹⁵Nagaefeꞌmo keya aeno ge hisigeꞌnaeꞌmo afiguve. Hanageke yaꞌmo neꞌalisigeꞌnaeꞌmo agaeꞌeꞌmo magokepi lokaeꞌna maiguve. Agufamo aliꞌna katiꞌna ateteꞌna ala agiꞌamo amiguve.

¹⁶Yatala kafugamo maisiya yaꞌmo amisugenoꞌaeꞌmo, haine, huno huteno hao ke hegaiye. Agufamo aliꞌna katiꞌna ateꞌnova kavaꞌnimo aepaꞌamo aliꞌna ave liguve, huno huꞌniye.