Read Keyagana Samu 95 Bible Online

Samu 95 - Keyagana bible

Samu 95

¹Egetao Ala kava neꞌmo agiꞌaleꞌmo alita asaga huta agaefeꞌmo mono yokemo hugune. Lokiya vekatimo yafakana huno maiꞌneno lagufamo alino katino nelateya vekaekeꞌmo alopa gefatiꞌmo huteta lamogagamo aigune.

²Agaetegamo egetao agaefekeꞌmo hao ke hegaune. Agiꞌaleꞌmo alita asaga huta lamogagamo aiteta samu yokemo hugune.

³Ala kava neꞌmo ala Gotiꞌapimoꞌmo maiꞌniye. Ala kini vekamo maiꞌneno muki aigofe gotiꞌapimogimo alagi aeno apakaseno yagaino neꞌapateyaꞌmofeꞌmo mono yokemo higetao.

⁴Kagoꞌmufilagamo yagaige aveleꞌmo yagaige huno neꞌyagaiye.

⁵Solovala aniꞌe mopaꞌeꞌmo alo huꞌniyaꞌmofeꞌmo agaiꞌa yaꞌmo haneꞌniye.

⁶Etapa ape higetao Ala kava neꞌmoꞌa alo huno lateꞌniya vekaeꞌmo laleꞌya faiꞌneta mono huta maigune.

⁷Gotitimoꞌmo maiꞌneno yagaino nelateya vayaꞌmo sipisipi vayaꞌamo agaiꞌa kegiꞌyafiꞌmo haita maiꞌnonaꞌmofeꞌmo agaefekeꞌmo mono higetao. Hemenimo lapakaemo Goti geꞌamo neꞌafisayana

⁸lapaipamo alita lokiya vaitapa oꞌateyo. Lapakinago vayaꞌmogimo kaꞌme kotegamo nata neꞌa neꞌuꞌapaeꞌmo namalageka huꞌnae. Geꞌnimo ago amagiꞌa ataleꞌnaya kava hutapa geꞌnimo amagitapa oꞌataleyo.

⁹Nagaemo lusi alagepa kavaꞌmo huꞌna fotiꞌa kafugamo hapa maeꞌnogeꞌa alagepa kavaꞌnimo ago ageꞌnayaꞌmonanafa hosu kavakeꞌmo nehuꞌapaeꞌmo, na agufa kavaꞌmo husifi, huteꞌa namalageka huꞌnae.

¹⁰Huꞌnayaꞌmofeꞌmo ani afinaꞌmo muki maiꞌnaya vayaꞌaifeꞌmo naipamo kana huꞌnaeꞌmo, muki afinaꞌaeꞌmo hosu apaipa apakesageꞌmo afiteꞌapaeꞌmo neꞌnatalae. Geꞌnimo alagi alagepa huꞌa noꞌafiye.

¹¹Naipamo leꞌnigeꞌnaeꞌmo nagoꞌya ataleteꞌna lokiya gefatiꞌmo huꞌnaeꞌmo, nagaeꞌeꞌmo haiꞌeꞌa maiꞌa falu hisaya koteꞌmo alagi haiꞌa oꞌmaigae, huꞌna huꞌnove.