Read Keyagana Maki 3 Bible Online

Maki 3 - Keyagana bible

Maki 3

¹Yesuꞌa halate Yu vayaꞌai mono nopiꞌmo haino maiꞌnigeno ayaꞌmo kalage kiꞌniya vekamo ani mono nopiꞌmo maiꞌniye.

²Mago vayaꞌamogimo agoti huꞌa atesayafeꞌmo ageꞌa maiꞌneꞌapaeꞌmo, Sapati afinaꞌmo alino alagepa huno atesifigeta agegaune, huꞌa huꞌnae.

³Yesuꞌa ayaꞌmo kalage kiꞌniya vekaeꞌmo, he tika male eno, huno ha paitenoꞌaeꞌmo

⁴apakaefeꞌmo, Sapati afinaꞌmo keꞌaepa gemo akame hisunafeꞌmo na agufa kavaꞌmo hugune. Sapati afinaꞌmo alagepa kavaꞌmo hisupi hosu kavaꞌmo hugune. Vayaꞌmo hapaesupi hapa maegaune, huno apafi geꞌnigeꞌapaeꞌmo ge osuꞌa afaꞌa maiꞌnae.

⁵Yesuꞌa aulu hapaeno apakelinuneno huteno aipamo leno apateꞌniye. Lokiya apaipa vayaꞌmo maiꞌnayaꞌmofeꞌmo aipamoꞌmo kana huꞌniye. Agaemo, kayaꞌmo aeka hayo huvo, huno huꞌnigeno ayaꞌmo aeno hayo nehigenoꞌaeꞌmo aeno api aiꞌnigeno afaꞌa haneꞌniya ayakana huno haneꞌniye.

⁶Falasi mono vayaꞌmogi ani kavaꞌmo ageteꞌapaeꞌmo mono nopatiꞌmo emi eꞌa malage huꞌa Helotiꞌa akame huꞌnaya vayaꞌeꞌmo aliꞌa anupa huꞌa maiꞌneꞌa Yesuꞌa haesayafeꞌmo ge huge afige huꞌa maiꞌnae. Muki vayaꞌmo ani kotuteꞌmo aliꞌa anupa huꞌa maiꞌnaya gemae.

⁷Yesuꞌe geꞌamo neꞌafiya vayaꞌeꞌmo apataleꞌa Galeliya kotega ani kotutegamo neꞌvageꞌapaeꞌmo Galeliya kotegatiꞌmo asole vayaꞌmo apakame huꞌa uꞌnae. Asole vayaꞌmogimo huꞌniya kavafeꞌmo ava gemo afiteꞌapaeꞌmo Yutiya kotegati ege Yulusalemu taonifatiꞌmo ege Itomiya haopaletiꞌmo ege Yoneni ani faliga kotegatiꞌmo ege Taiya taoni haopalegatiꞌmo ege Saitoni taoni haopalegatiꞌmo ege huꞌa Yesutegamo eꞌnae.

⁸Hogoteno asole vayaꞌmo ago alino alagepa huno apateꞌniyaꞌmofeꞌmo kaita hapauꞌniya vayaꞌmo eꞌa agufaleꞌmo ame alisayafeꞌmo eꞌa faiꞌa kili paeteꞌa maleꞌa apaliꞌnae. Maleꞌa apaliꞌnayaꞌmofeꞌmo geꞌamo neꞌafiya vayaꞌaifeꞌmo, maleꞌa oꞌnapalisayafeꞌmo mago aise sipimo alitapa alo hutapa nateyo, huno hapa paiꞌniye.

¹¹Hosu apaune vayaꞌmogimo ageteꞌapaeꞌmo asagauꞌa aiteꞌa alopa gefatiꞌmo ge huꞌapaeꞌmo, Goti mafaꞌneꞌamo maiꞌnane, huꞌa ha paiꞌnae.

¹²Yesuꞌa hosu apaune vayaꞌaifeꞌmo lokiya gemo huno hapa paiꞌniye. Ina laꞌnamo maiꞌnofi hutapa hapa opaiyo. Yesuꞌa apa vayaꞌamo lekana paino apateꞌniya gemae.

¹³Yesuꞌa aise aveleꞌmo haino maiꞌnenoꞌaeꞌmo hauꞌniya vayaꞌaifeꞌmo ge huꞌnigeꞌa agaetegamo eꞌnae.

¹⁴Agaemo tuolofuꞌa vayaꞌmo agaeꞌeꞌmo magokepi lokaeꞌa maige alino apatesigeꞌa uꞌa Goti geꞌamo aeꞌa hakalo huꞌa hapa paige kaita hapauꞌnisiya vayaꞌaina aliꞌa hapageꞌa apatege himamuꞌaletiꞌmo hosu apaune vayaꞌaina aliꞌa hapa faiꞌa apatalege hisayafeꞌmo lekana paino apateꞌniye.

¹⁶Lekana paino apateꞌniya vayaꞌai apakiꞌapimo haneꞌniye. Yesuꞌa Saimonifeꞌmo Pitaꞌae huno agi ateꞌniya vekagi

¹⁷Sepeti mafaꞌnelaꞌmo Yemisiꞌe aganaꞌamoꞌmo Yoniꞌefeꞌmo Yesuꞌa Moꞌanasisi vekalane huno anaki anateꞌniya anakimo aepaꞌamo hakalu nehiya agufa kavaꞌmo huno lokiya vekalanagi

¹⁸Eꞌnaluꞌagi Filipiꞌagi Matolomiyuꞌagi Matiyuꞌagi Tomasiꞌagi Afiyasi mafaꞌnemo Yemisiꞌagi Taꞌniyasiꞌagi Saimoni Selotiꞌagi Yutasi Isakaliyotiꞌa Yesu kutulu yaꞌmo aliꞌniya vekagi huꞌa maiꞌnae. Sataniꞌmo Yesu aipafiꞌmo maiꞌniye huꞌa huꞌnaya gemae.

²⁰Yesuꞌa halate noꞌalega uno maiꞌnigeꞌapaeꞌmo asole vayaꞌmo eꞌa aliꞌa anupa huꞌa maiꞌnagenoꞌaeꞌmo Yesuꞌe geꞌamo neꞌafiya vayaꞌeꞌmo neꞌyaꞌmo nesaya kanaꞌapimo ohaneꞌniye.

²¹Yesu vayaꞌamogimo ani kavafeꞌmo ava gemo afiteꞌapaeꞌmo, negi kavaꞌmo nehiye, huꞌa huteꞌa avalesayafeꞌmo uꞌnae.

²²Keꞌaepa gemo aliꞌa apaya neꞌmalaya vayaꞌmo Yulusalemu taonifatiꞌmo eꞌapaeꞌmo, Mielisemuliꞌa aipafiꞌmo maiꞌniye. Hosu apaune vayaꞌaiteꞌmo yagaino neꞌapateya vekamo himamuꞌaletiꞌmo hosu apaune vayaꞌmo vayaꞌai apaipafatiꞌmo alino hapafaino neꞌapatale, huꞌa huꞌnae.

²³Yesuꞌa, eyo, huno ge huꞌnigeꞌa eꞌnagenoꞌaeꞌmo aeno kalafefa gemo huno hapa painoꞌaeꞌmo, haiya kava huno Sataniꞌa agaiꞌamo afaꞌa alino ha faino atalegaiye.

²⁴Magoke vayapatiꞌmo aliꞌa fako huteꞌa apakaiꞌapimo hapaeꞌa hano huꞌa apatalegae.

²⁵Ani kavaꞌmo huꞌa magoke afamo anagaꞌmogimo aliꞌa fako huꞌa kaveta hisayana magokepi alagepa huꞌa lokaeꞌa oꞌmaigae.

²⁶Ani kava huno Sataniꞌa yagaino neꞌapateya vayaꞌalegamo kame huno apatesiyana muki vayaꞌaiteꞌmo yagaino neꞌapateya himamuꞌamo hano hugiye.

²⁷No aepa vekamo lokiya vekamo maiꞌnisiyana mago vekamoꞌa eno atafauno nofi kino oꞌateꞌnisiyana noꞌafatiꞌmo muki kagemi yaꞌamo afaꞌa haino oꞌaligiye. Hogoteno no aepa vekamo atafauno nofi kino ateꞌnisiyaꞌmoꞌmo afaꞌa haino noꞌafatiꞌmo muki yaꞌamo aligiye.

²⁸Lama gemo lapa nepauve, huno, Gotiꞌa muki hosu kavaꞌapigi agaefeꞌmo huꞌa faipa huꞌa neꞌataya geꞌapimogi huno afaꞌa alino atalegaiye.

²⁹Alino atalegaiyaꞌmonanafa aote Aunemeꞌaeꞌmo huꞌa faipa huꞌa neꞌatesaya vayaꞌai hosu kavaꞌapimo alagi alino oꞌatalesigeno huꞌa faipa huꞌa neꞌataya gemo anonaꞌapimo afaꞌa hanege hanege huno hanegaiye, huno hapa paiꞌniye.

³⁰Apakaemo Yesufeꞌmo hosu aune vekamo aipafiꞌmo maiꞌniye, huꞌa huꞌnayaꞌmofeꞌmo ani gemo hapa paiꞌniye. Yesu itaꞌamoꞌe aganaꞌamogiꞌefeꞌmo apava gemae.

³¹Ani afinaꞌmo Yesu itaꞌamoꞌe aganaꞌamogiꞌeꞌmo eꞌa kumategamo he tiꞌa maiꞌneꞌapaeꞌmo mago vekamo aliꞌa ateꞌnageno nopiꞌmo haiꞌniye.

³²Asole vayaꞌmogimo faiꞌa ku aiꞌa ateꞌa maiꞌneꞌapaeꞌmo, itakamoꞌe kaganakamogiꞌeꞌmo kagaemo kagesayafeꞌmo eꞌa kumatega maiꞌnae, huꞌa ha paiꞌnagenoꞌaeꞌmo,

³³itaꞌnimoꞌe naganaꞌnimogiꞌeꞌmo haiyate eꞌa maiꞌnae, huno huteno aulu hapaelinuneno huno neꞌapakenoꞌaeꞌmo, itaꞌnimogiꞌe naganaꞌnimogiꞌeꞌmo manifiꞌmo maiꞌnae.

³⁵Gotiꞌa hauꞌniya kavaꞌageꞌmo nehaya vayaꞌmo naganaꞌnimogi maige nasaꞌnimogi maige itaꞌnimogimo maige huꞌa maiꞌnae, huno hapa paiꞌniye.