Read Keyagana Yoni 14 Bible Online

Yoni 14 - Keyagana bible

Yoni 14

¹Yesuꞌa, Lapausoli osuge lapaipamoꞌmo atete osuge hutapa maiyo. Gotifeꞌmo lapakesa afitapa fatago huge nagaefeꞌmo lapakesa afitapa fatago huge nehayaꞌmofeꞌmo oꞌataletapa magoꞌe hutapa lapakesa afitapa fatago hiyo.

²Afoꞌnimoꞌmo maiꞌniya kotegamo maisaya noꞌmo asole noꞌmo haneꞌniye. Ohaneꞌniyesinana haneꞌniye, huꞌna lapa opauvesine. Lapakaemo haitapa maisaya notapimo nagaemo alo hisuvafeꞌmo haiguve.

³Haiꞌna notapimo alo huꞌna lapateteꞌnaeꞌmo nagaegiꞌeꞌmo magokepi haita lokaeta maisunafeꞌmo emiꞌneꞌna lapavalesugeta uta haigune.

⁴Visuva kotegamo ago agege visuva kaꞌmo ago agege huꞌnae, huno hapa paiꞌnigeno

⁵Tomasiꞌa, Ala kava nene, visana kotegamo lagaemo oꞌageꞌnonaꞌmofeꞌmo haiya kava huta visana kaꞌmo agegaune, huno afi geꞌnigenoꞌaeꞌmo,

⁶Nagaemo kaꞌmo maiꞌneꞌna lama gemo aepa vekamo maiꞌneꞌnaeꞌmo vayaꞌmo afaꞌa maisaya yaꞌmo aepa vekamo maiꞌnove. Muki vayaꞌmogimo muki yaꞌmo Afoꞌamotegamo apakaiꞌapimo afaꞌa oꞌugafa nagaetegamo eteꞌapaekeꞌmo muki yaꞌmo Afoꞌamotegamo afaꞌa ugae.

⁷Ago nagetapa aeto huꞌnaesinana ani kava hutapa Afoꞌnimoꞌmo ago agetapa aeto huꞌnaesine. Hemenimo mani afinatetiꞌmo aepa faitapa Afoꞌnimoꞌmo alagi agetapa aeto nehae, ago ageꞌnayaꞌmofeꞌmae, huno hapa paiꞌnigeno

⁸Filipiꞌa, Ala kava nene, Muki yaꞌmo Afoꞌamoꞌmo lave ligeta agetetaeꞌmo alagine huteta maino, huno ha paiꞌnigeno

⁹Yesuꞌa, Filipigamo lapakaeꞌeꞌmo yatala afinaꞌmo magokepi lokaeꞌna maiꞌnovana nageka aeto osuꞌnapiye. Nageꞌniya vekamoꞌa muki yaꞌmo Afoꞌamoꞌmo ago ageꞌniyaꞌmofeꞌmo na kava higekaeꞌmo muki yaꞌmo Afoꞌamoꞌmo lave liyo, huka nehane.

¹⁰Nagaemo muki yaꞌmo Afoꞌamopiꞌmo maiꞌnogeno muki yaꞌmo Afoꞌamoꞌmo nagaepiꞌmo maiꞌniye, huka kagesa afika fatago osuꞌnapiye. Lapa nepauva gemo nagaiꞌni nagesafatiꞌmo nagesa afiꞌna lapa nopauvaꞌmonanafa agaemo muki yaꞌmo Afoꞌamoꞌmo nagaepiꞌmo maiꞌnenoꞌaeꞌmo aliꞌyaꞌamo neꞌaliye.

¹¹Muki yaꞌmo Afoꞌamopiꞌmo maiꞌnogeno muki yaꞌmo Afoꞌamoꞌmo nagaepiꞌmo maiꞌniye, huꞌna nehuvanagi lapakesa afitapa fatago hiyo. Nehuva geeꞌmo lapakesa afitapa fatago nosisayana lokiya kavaꞌmo nehuva kavaꞌmo agetetapaeꞌmo lapakesa afitapa fatago hiyo.

¹²Lama ge lapa nepauve, nagaefeꞌmo apakesa afiꞌa fatago nehaya vayaꞌmogimo nagaemo nehuva agufa kavaꞌmo afaꞌa hugae. Afoꞌnimotegamo haiguvaꞌmofeꞌmo nagaemo nehuva kavaꞌmo ago aeꞌa nagaseꞌa magoꞌe kavaꞌmo hugae.

¹³Lapakaemo nagiꞌniletiꞌmo na agufa kavafeꞌmo nunumuꞌmo hutapa afi gesafi Afoꞌnimo ha le konali yaꞌamo aliꞌna lapave lisuvafeꞌmo ani kavaꞌmo afaꞌa huguve.

¹⁴Nagiꞌniletiꞌmo muki kavafeꞌmo nafi gesayana ani kavaꞌmo afaꞌa huguve. Yesuꞌa Goti Aunemeꞌamo aliꞌna atesugeno emiꞌnegaiye, huno hapa paiꞌniya gemae

¹⁵Nagaefeꞌmo lapau lapayamopafiꞌmo lapauꞌnisiyaꞌmoꞌmo ma kavaꞌmo hiyo, huꞌna nehuva gemo akame hiyo.

¹⁶Nagaemo muki yaꞌmo Afoꞌamofeꞌmo nunumuꞌmo hisugeno mago alu vekamo emineno lapakaeꞌeꞌmo muki afinaꞌmo alagi magokepi lokaeno maiꞌneno lapa maesiyafeꞌmo alino lapamigiye.

¹⁷Gotiꞌa Aunemeꞌamo alagi lama geꞌage aepa Aunemeꞌamo alino lapamigiye. Ma mopafi vayaꞌmogimo agaemo oꞌageꞌa ageꞌa aeto osuꞌnayaꞌmofeꞌmo afaꞌa oꞌaligayaꞌmonanafa lapakaeꞌeꞌmo maiꞌniyaꞌmofeꞌmo ago ageꞌnae. Agaemo lapakaeꞌeꞌmo ago maiꞌniyanageno lapakaepiꞌmo maigiye.

¹⁸Megusa mafaꞌnegana hutapa oꞌmaisayafeꞌmo lapakaetegamo emiꞌnegauve.

¹⁹Aise afinaꞌmo utesigeꞌapaeꞌmo ma mopafi vayaꞌmogimo halate oꞌnagegayaꞌmonanafa lapakaemo halate ago nagegae. Maige maige huꞌna neꞌmauva vekamo maiꞌnovaꞌmofeꞌmo lapakaemo ani kava hutapa afaꞌa maigae.

²⁰Ani afinaꞌmo afole aisigetapaeꞌmo agetapaeꞌmo Afoꞌamopiꞌmo maiꞌnigeta agaepiꞌmo maiꞌnonageno lagaepiꞌmo maiꞌniye, hutapa nagegae.

²¹Vayaꞌmogi keꞌaepa geꞌnimo ma kava hiyo, ina kava osiyo, huꞌna hapa nepauva gemo aliteꞌa akame nehaya vayaꞌmogi nagaefeꞌmo hapau apayamopafiꞌmo nehapaiya vayaꞌmo maiꞌnae. Afoꞌnimoꞌmo nagaefeꞌmo hapau apayamopafiꞌmo nehapaiya vayaꞌaifeꞌmo ani kavakeꞌmo huno hau ayamopafiꞌmo hauꞌnisigeꞌna nagaeꞌeꞌmo ani kavakeꞌmo huꞌna nahau nayamopafiꞌmo nahauꞌnisigeꞌna nagaiꞌnimo aliꞌna apave lisugeꞌapa nagegae, huno hapa paiꞌnigeno

²²Yutasiꞌa Isakaliyoti kotega vekamo hamoꞌamoꞌmo, Ala kava nene, na kava higekaeꞌmo kagaikamo kagesunafeꞌmo lagaekeꞌmo alika lave liganaꞌmonanafa ma mopafi vayaꞌmo alika apave oligane, huno afi geꞌnigenoꞌaeꞌmo

²³Yesuꞌa geꞌaleꞌmo aeno atagaina huno ha painoꞌaeꞌmo, nagaefeꞌmo hapau apayamopafiꞌmo nehapaiya vayaꞌmogimo geꞌnimo akame hugae. Akame hisageno Afoꞌnimoꞌa apakaefeꞌmo hau ayamopafiꞌmo hauꞌnisigetaꞌa agaeꞌe nagaeꞌeꞌmo apakaemo maisayategamo etaꞌa magokepi lokaetaꞌa maige maige huta maigune.

²⁴Nagaefeꞌmo hapau apayamopafiꞌmo nohapaiya vayaꞌmogimo geꞌnimo alagi akame nosae. Nagesafatiꞌmo nagesa afiꞌna mani gemo lapa nopaufa muki yaꞌmo Afoꞌamoꞌmo alino nateꞌnigeꞌna emiꞌneꞌnova vekalegatiꞌmo mani gemo aliteꞌna lapa nepauve.

²⁵Lapakaeꞌeꞌmo magokepi lokaeꞌna maiꞌneꞌnaeꞌmo mani gemo lapa nepauve.

²⁶Hemenimo lapa nepauvaꞌmonanafa muki yaꞌmo Afoꞌamoꞌmo aote Aunemeꞌamoꞌmo lapa maesiya vekamo nagiꞌniletiꞌmo alino atesigeno lapakaetegamo emineno muki geꞌamo alino lapaya maleteno lapaipa lapakesa alino he tino lapatesigetapa lapa nepauva geeꞌmo lapakesa afitapa ho hugae.

²⁷Naipamoꞌmo falu huꞌnigeꞌna neꞌmauva kava hutapa lapaipamoꞌmo falu huꞌnisigetapa maisayafeꞌmo aliꞌna nelapamuve. Ma mopafi vayaꞌmogi aliꞌa neꞌapamiya kava huꞌna aliꞌna nolapamuve. Lapausoli hutetapa lapaipamoꞌmo atete huꞌnisigetapa koli osiyo.

²⁸Nagaemo, lapataleꞌna haiteꞌnaeꞌmo halate emiꞌnegauve, huꞌna lapa paiꞌnogetapa ago afiꞌnae. Nagaefeꞌmo lapau lapayamopafiꞌmo lapauꞌniyesinana Afoꞌnimoꞌmo ago aeno nagaseꞌniya vekalegamo haisuvafeꞌmo lapamogaga neꞌaiyesine.

²⁹Ani kavaꞌmo afole aisigetapaeꞌmo lapakesa afitapa fatago hisayafeꞌmo hemenimo lapa nepauve.

³⁰Ma mopafi vayaꞌaiteꞌmo yagaino neꞌapateya vekamo ago neꞌeyaꞌmofeꞌmo yatala gemo lapa opaiguve. Ago neꞌeyaꞌmonanafa agae yaꞌmo naipafiꞌmo ohaneꞌniyaꞌmofeꞌmo afaꞌa yagaino oꞌnategaiye.

³¹Ma mopafi vayaꞌmogi muki yaꞌmo Afoꞌamofeꞌmo nagaemo nahau nayamopafiꞌmo nahauꞌniya kavaꞌmo agesayafeꞌmo muki yaꞌmo Afoꞌamoꞌmo, ma kava huvo, huno naha paiꞌniya kavaꞌmo akame huꞌna nehuve. Mani nopatiꞌmo ataleta he tita vigetao.