Read Keyagana Yoni 19 Bible Online

Yoni 19 - Keyagana bible

Yoni 19

¹Inagi Pailatiꞌa ati vekaeꞌmo, nofi kayotetiꞌmo amagiyo, huno ha paiꞌnigeno amagiꞌniye.

²Ati vayaꞌmogimo uꞌa aufe nofiꞌmo aliꞌa kalagiꞌa kakolitamo alo huteꞌa agenopaleꞌmo maleꞌa ateꞌneꞌa haesa lavolavo alonokuꞌmo aliꞌa maleꞌa ateteꞌapaeꞌmo,

³Yu vayaꞌaiteꞌmo yagaika neꞌapatana kini vekamo maiꞌnananagi alagepa huka maiyo, huꞌa huteꞌa apayaꞌmo aliꞌa ataleli eꞌa amagite amagite huꞌa amagiꞌnae.

⁴Pailatiꞌa halate kumatega lamino, afiyo, amagisuva kavaꞌmo aepaꞌamo oꞌageꞌnovaꞌmofeꞌmo lapakaemo, amagisiya kavaꞌmo aepaꞌamo oꞌageꞌniye, hutapa lapakaemo agesayafeꞌmo lapakaetegamo avaleliꞌna emiꞌnegauve, huno hapa paiꞌniye.

⁵Yesuꞌa aufe nofi kakolitamo agenopaleꞌmo maleꞌa ateteꞌa haesa lavolavo alonokuꞌmo maleꞌa ateꞌnaya yaꞌmo alinino kumatega emineꞌnigeno Pailatiꞌa, ani vekamo maiꞌnigi ageyo, huno hapa paiꞌniye.

⁶Mono huꞌa neꞌapataya vayaꞌaiteꞌmo yagaiꞌa neꞌapataya vayaꞌe alopa mono noteꞌmo neꞌyagaiya ati vayaꞌmogiꞌeꞌmo ageteꞌapaeꞌmo, malipu yosaleꞌmo nili aiteka alika he tika ato. Malipu yosaleꞌmo nili aiteka alika he tika ato, huꞌa alopa gefatiꞌmo ge huꞌnagenoꞌaeꞌmo Pailatiꞌa, amagisuva kavaꞌmo aepaꞌamo oꞌageꞌnogi lapakaitapigeꞌmo avalelita utapa malipu yosaleꞌmo nili aitetapa alita he titapa ateyo, huno hapa paiꞌniye.

⁷Yu vayaꞌmogi, agaemo Goti mafaꞌneꞌamo maiꞌnove, huno huꞌniyaꞌmofeꞌmo keꞌaepa getimoꞌmo hunoꞌaeꞌmo, ago faligiye, huno huꞌniye, huꞌa ha paiꞌnae.

⁸Pailatiꞌa ani gemo afitenoꞌaeꞌmo magoꞌe huno koli huꞌniye.

⁹Halate Pailatiꞌa agoti nopiꞌmo haino Yesufeꞌmo, haiyategatiꞌmo eꞌnane, huno afi geꞌnigenoꞌaeꞌmo Yesuꞌa ge osuno afaꞌa maiꞌniye.

¹⁰Pailatiꞌa, nagaefeꞌmo naha opaigapiye. Nagaefeꞌmo yagaika apatesana vekamo maigane, huꞌa lekana paiꞌa nateꞌnayaꞌmofeꞌmo afaꞌa ateyo, huꞌna hisugeꞌa katesageka afaꞌa ugane. Amagiyo, huꞌna hisuvana malipu yosaleꞌmo nili aiteꞌa aliꞌa he tiꞌa kategae, huno ha paiꞌnigeno

¹¹Yesuꞌa, Gotiꞌmo namagisana agufa himamukamo okamiꞌniyesinana nagaetegamo mago kavaꞌmo afaꞌa osanesine. Huꞌniyaꞌmofeꞌmo navalelineno kamiꞌniya vekamo hosu kavaꞌamoꞌmo kagae hosu kavaꞌmo ago aeno agaseꞌniye, huno ha paiꞌniye.

¹²Pailatiꞌa ani gemo afitenoꞌaeꞌmo Yesuꞌmo afaꞌa atesigeno visiya kafeꞌmo kahauya huꞌniyaꞌmonanafa Yu vayaꞌmogimo, atesanageno visiyana Sisaꞌa hogote vekamo alaꞌapimo yagaino neꞌapateya vekamo ao vekamo oꞌmaiꞌnane. Alaꞌapimo yagaiꞌna neꞌapatova kini vekamo maiꞌnove, huꞌa nehaya vayaꞌmo Sisa kameꞌamo maiꞌnae, huꞌa alopa gefatiꞌmo ge huꞌnae.

¹³Pailatiꞌa ani gemo afitenoꞌaeꞌmo Yesuꞌmo kumatega avalelino lamino fai maiꞌneno agoti huno neꞌapateya siateꞌmo fai maiꞌniye. Asole latapa yafaꞌmo mopafi maleꞌnaya yafateꞌmo siamo maleteno fai maiꞌniya yatefeꞌmo Himulu gefatiꞌmo agiꞌamo Gamatagayagae, huꞌa agi aeꞌnae.

¹⁴Ani afinaꞌmo Pasova neꞌyaꞌmo alo nehaya afinaꞌmo haneꞌniye. Yegemo haineno makasa haeyategamo Pailatiꞌa, ageyo, yagaino nelapateya kini vekatapimo maiꞌniye, huno hapa paiꞌnigeꞌapaeꞌmo,

¹⁵malipu yosaleꞌmo nili aiyo, nili aiyo, nili aiteka alika he tika ato, huꞌa alopa gefatiꞌmo ge huꞌnae. Pailatiꞌa, yagaino nelapateya kini vekatapimo malipu yosaleꞌmo nili aiteꞌna aliꞌna he tiꞌna atesufiye, huno apafi geꞌnigeꞌapaeꞌmo mono huꞌa neꞌapataya vayaꞌaiteꞌmo yagaiꞌa neꞌapataya vayaꞌmogimo, Sisakeꞌmo yagaino nelateya kini netimo maiꞌniye, huꞌa ha paiꞌnae.

¹⁶Inagi Pailatiꞌa Yesuꞌmo avalelino uno malipu yosaleꞌmo nili aiteꞌa aliꞌa he tiꞌa atesayafeꞌmo avaleno apamiꞌnigeꞌa avaleliꞌa uꞌnae. Yesuꞌmo malipu yosaleꞌmo nili aiteꞌa aliꞌa he tiꞌa ateꞌnaya gemae

¹⁷Avaleli uꞌnagenoꞌaeꞌmo malipu yosaꞌamo agaiꞌamo alino kofilino uno taonimo alino ataleno malaga mago aupilaga agiꞌamo Anuꞌayamufagayagamo uno avaꞌyi huꞌniye. Himulu gefatiꞌmo agiꞌamo Gogatagayagae.

¹⁸Ani aupilagamo malipu yosaleꞌmo nili aiteꞌa aliꞌa he tiꞌa ateꞌnae. Lole vekalaꞌeꞌmo malipu yosaleꞌmo nili aiteꞌa aluga aluga haopalateꞌmo aliꞌa he tiꞌa anateꞌnageno Yesuꞌa folagapiꞌmo maiꞌniye.

¹⁹Pailatiꞌa mago gemo avo kaeteno mago vekamo amiꞌnigeno agenopalegamo malipu yosaleꞌmo nili ai maleꞌniye. Ani gemoꞌa hunoꞌaeꞌmo, Yesuꞌa Nasalasa vekamo Yu vayaꞌaiteꞌmo alaꞌapimo yagaino neꞌapateya kini vekamae, huno avoꞌmo kae maleꞌniye.

²⁰Yesuꞌa malipu yosaleꞌmo nili aiteꞌa aliꞌa he tiꞌa ateꞌnaya aupilagamo taoni haopaleꞌmo haneꞌniyaꞌmofeꞌmo muki Yu vayaꞌmogimo ani kae maleꞌniya avopiꞌmo lekana paiꞌa ageꞌnae. Ani gemo Himulu gefatiꞌmo kaege Galiki gefatiꞌmo kaege Lomu gefatiꞌmo kaege huno avoꞌmo kae maleꞌniye.

²¹Inagi mono huꞌa neꞌapataya vayaꞌaiteꞌmo yagaiꞌa neꞌapataya vayaꞌmogimo Pailatifeꞌmo, Yu vayaꞌaiteꞌmo alaꞌapimo yagaino neꞌapateya kini vekamae, huka avoꞌmo okaeka Yu vayaꞌaiteꞌmo yagaiꞌna neꞌapatova kini vekaꞌapimo maiꞌnove, huno huꞌniye, huka avoꞌmo kao, huꞌa ha paiꞌnageno

²²Pailatiꞌa, haꞌao, ago avoꞌmo kae maleꞌnovaꞌmofeꞌmo ani gemo alagikeꞌmo hanegaiye, huno hapa paiꞌniye.

²³Ati vayaꞌmogimo Yesuꞌmo malipu yosaleꞌmo nili aiteꞌa aliꞌa he tiꞌa ateꞌneꞌapaeꞌmo kukenaꞌamo aliꞌa fako huꞌa loleꞌe loleꞌe hetamamo maleteꞌa apamete apamete huꞌa aliꞌnae. Yesuꞌa agufaleꞌmo vaino neꞌaliya siotiꞌamo ofakaniꞌniya siotiꞌamo asagiꞌa maleꞌneꞌapaeꞌmo,

²⁴alita apake oꞌaigetao yokalo letetaekeꞌmo aeno lagasesiya vekamoꞌa ani siotimo aligiye, huꞌa huꞌnae. Goti mukufiꞌmo hu maleꞌniya gemo afole aisiyafeꞌmo ani kavaꞌmo huꞌnae. Ani gemoꞌa hunoꞌaeꞌmo,Kukenaꞌnimo aliꞌa fako huꞌa magoke magoke huꞌa aliꞌnae. Yokalo leteꞌa mago aeno apakaseꞌniya vekamoꞌa yatala kukenaꞌnimo aliꞌniye, huno huꞌniye.

²⁵Yesu itaꞌamoꞌagi itaꞌamo aganaꞌamoꞌagi Maliyaꞌa Lopasi anagi Maliyaꞌa Maganala kotega anagi huꞌa eꞌa Yesu malipu yosa aepaleꞌmo he tiꞌa maiꞌnae.

²⁶Yesuꞌa anakeyana itaꞌamoꞌe hauꞌniya vekamo geꞌamo neꞌafiya vekaꞌeꞌmo eꞌana maiꞌnaꞌageno anaketenoꞌaeꞌmo itaꞌamofeꞌmo, Ane, huno, agaemo mafaꞌnekamae, huno ha paiteno

²⁷geꞌamo neꞌafiya vekaeꞌmo, agaemo itakamoꞌmae, huno ha paiꞌnigeno ani vekamoꞌmo ani afinaꞌmo noꞌalegamo avalelino uno alagepa huno yagaino ateno maiꞌniye. Yesuꞌmo ago faliꞌniya gemae

²⁸Yesuꞌmo agesa afinoꞌaeꞌmo, muki aliꞌyaꞌnimo ago aliꞌna hano hu maleꞌnove, huno ago agetenoꞌaeꞌmo Goti mukufiꞌmo huꞌniya gemo alino afole aino atesiyafeꞌmo ina gemo hunoꞌaeꞌmo, anifeꞌmo neꞌnahaiye, huno huꞌniye.

²⁹Mago yuvapafiꞌmo nofi alagafati aniꞌmo atu neheya aniꞌmo haneꞌnigeꞌa kanipa kayoteꞌmo faiꞌa lanu paiteꞌa ani anipiꞌmo kakiꞌnofagana yaꞌmo aliꞌa aeteꞌa alini uꞌa Yesuꞌa nesiyafeꞌmo amiꞌnae.

³⁰Ani aniꞌmo netenoꞌaeꞌmo, aliꞌyaꞌnimo ago aliꞌna hano huꞌnove, huno huteno ape huno maiꞌnenoꞌaeꞌmo aunemeꞌamo ataleteno faliꞌniye. Ati vekamoꞌa Yesu haopafiꞌmo hayoletiꞌmo aeꞌniya gemae

³¹Ani afinaꞌmo Pasova neꞌyaꞌmo alo huꞌa neꞌmalaya afinaꞌmo haneꞌniyaꞌmofeꞌmo egamo hogote Sapati hopa afinaꞌmo malipu yosaleꞌmo nili aiꞌnaya vayaꞌmo malipu yosaleꞌmo apakufaꞌamo hanesiyafeꞌmo Yu vayaꞌmogi ohapauꞌniyaꞌmofeꞌmo ati vayaꞌmogi Pailatifeꞌmo uꞌa apaiyamo aiꞌa lo aeteꞌa apakufaꞌamo aiꞌa akaiꞌa ataleyo, huꞌa ha paiꞌnae.

³²Ati vayaꞌmogi uꞌa lole vekalaꞌani anaiyalaꞌmo aiꞌa lo aeteꞌapaeꞌmo

³³uꞌa Yesuꞌmo agayana ago faliꞌnigeꞌa ageteꞌa aiyamo aiꞌa lo oꞌaeꞌnayaꞌmonanafa

³⁴mago ati vekamoꞌa haopafiꞌmo hayoletiꞌmo neꞌaegenoꞌaeꞌmo malage huno kolaꞌe aniꞌeꞌmo emineꞌniye.

³⁵Apakesa afiꞌa fatago hisayafeꞌmo ani kavaꞌmo ageꞌniya vekamoꞌa faigoko gemo huno hapa paiꞌniye. Agaemo, lama ge nehuve, huno, ago ageꞌnove, huno hapa paiꞌniye.

³⁶Goti mukufiꞌmo hu maleꞌniya gemo aliꞌa afole aiꞌa atesayafeꞌmo ani kavaꞌmo huꞌnae. Mago gemoꞌmo hunoꞌaeꞌmo, magoke ayamufamo aiꞌa lo oꞌaegae, huno huꞌniye.

³⁷Magoꞌe huno Goti mukufi gemoꞌa hunoꞌaeꞌmo, agufafiꞌmo aeꞌnaya vayaꞌmogimo agegae, huno huꞌniye. Lole vekalaꞌmoganimo yafa kapiꞌmo alini uꞌana kiꞌana ateꞌnaꞌa gemae

³⁸Ani kavaꞌmo hutageno Yosefeꞌa Alamatiya taonifi vekamoꞌa uno Pailatifeꞌmo, Yesu kefaꞌamo alininuꞌna kiꞌna ategesuve, huno afi geꞌnigenoꞌaeꞌmo, he, huno ha paiꞌniye. Yosefeꞌa Yesu geꞌamo neꞌafiya vekamo maiꞌniyaꞌmonanafa Yu vayaꞌaifeꞌmo koli huꞌniyaꞌmofeꞌmo aeno hakalo huno hapa opaiꞌniye.

³⁹Nikonimasiꞌa hogoteno mago haniꞌilagamo Yesutegamo eꞌniya vekamoꞌmo lole yosalapati aniꞌmoꞌa alagepa atumo neꞌaiya malasini aniꞌmoꞌa kefaꞌamo okasalino afaꞌa hanesiya anitalani anakiꞌanimo meyaꞌe atosiꞌeꞌmo lusi kava huno kana huꞌniya kuꞌmo alinino eꞌniye. Kana huꞌniya yaꞌamoꞌmo 34 kilo agufa kana huꞌniya yaꞌmo haneꞌniye.

⁴⁰Lole vekalaꞌmogani Yesu kefaꞌamo aliꞌana alagepa yaveyave lavolavofiꞌmo hayaeteꞌana alagepa atumo neꞌaiya malasinimo aliꞌana folagapiꞌmo maleteꞌana hayaeꞌnaꞌae. Ani kavaꞌmo Yu vayaꞌmogi nehaya agufa kavaꞌmo huꞌnaꞌae.

⁴¹Malipu yosaleꞌmo nili aiteꞌa aliꞌa he tiꞌa ateꞌnaya haopaleꞌmo mago yosa hoyamo haneꞌnigeno mago saufa yafa kaꞌmo haneꞌnigeꞌa mago vekamo kiꞌa oꞌateꞌnaya yafa kaꞌmo haneꞌniye.

⁴²Yu vayaꞌmogi Pasova neꞌyaꞌmo alo huꞌa neꞌmalaya hopa afinaꞌmo ago eno hogo huꞌnigeno ani yafa kaꞌmo haopaleꞌmo haneꞌniyaꞌmofeꞌmo alini eꞌana yafa kapiꞌmo kiꞌana ateꞌnaꞌae.