Read Keyagana Kolosi 1 Bible Online

Kolosi 1 - Keyagana bible

Kolosi 1

¹Nagaemo Poloꞌnaeꞌmo Gotiꞌa agesamo afiteno hauꞌnigenoꞌaeꞌmo Yesu Kalaisi apa vekaꞌamo lekana paino nateꞌniya vekamoꞌnaꞌe konagatimo Timotiꞌeꞌmo mani avoꞌmo nekaoꞌae.

²Laꞌagaemo Kolosi taonifiꞌmo maiꞌnaya lapaote vayaꞌmo Kalaisipiꞌmo maiꞌnetapaeꞌmo oꞌataleta alagepa huta maiꞌnaya konagatiꞌaeꞌmo mani avoꞌmo nekaoꞌae. Afotimo Gotiꞌe Ala kava neꞌmo Yesu Kalaisiꞌeꞌmo fiku lapa maeꞌana lapamiꞌanageno lapaipamoꞌmo falu hino. Poloꞌa hao ke hetenoꞌaeꞌmo nunumu huno apateꞌniya gemae

³Hogotetapa alagepa faigoko gemo afitetapaeꞌmo Gotiꞌa kokuꞌnapiꞌmo maleꞌneno yagaino nelapateya yafeꞌmo ava gemo afitetapa lapavayagunagu hutapa agava neꞌmaiye. Agava maiꞌnetapaeꞌmo Kalaisi Yesufeꞌmo lapakesa afita fatago huꞌnetapaeꞌmo muki apaote vayaꞌaifeꞌmo lapau lapayamopafiꞌmo lapauꞌniya kavafeꞌmo lapava gemo afiꞌnone. Afiꞌnona afinatetiꞌmo muki afinaꞌaeꞌmo nunumu huta nelapatone. Ala kava netimo Yesu Kalaisi afoꞌamo Gotifeꞌmo hao ke heta nelapatone.

⁶Alagepa faigoko geꞌamo lapakaetegamo eno afole aiꞌniya gemoꞌa ma mopafi muki haopalegaꞌeꞌmo eno afole aiteno neꞌyaꞌamo alino neꞌate. Mani gemo Gotiꞌa fiku hapa maeno neꞌapamiya gemo afitetapaeꞌmo lama gemo haneꞌniye, hutapa afiꞌnaya afinatetiꞌmo lapakaepatiꞌeꞌmo neꞌyaꞌmo alino neꞌate.

⁷Epafalasifeꞌmo lahau layamopafiꞌmo lahauꞌniya vekamoꞌa lagaeꞌeꞌmo lokaeno aliꞌyaꞌmo neꞌaliya vekamoꞌa lapakaetefeꞌmo Kalaisi aliꞌyaꞌamo oꞌataleno alagepa huno neꞌaliya vekamoꞌa mani gemo ago lapa paiꞌnigetapa afiꞌnae.

⁸Agaemo lapava gemo hunoꞌaeꞌmo, Goti Aunemeꞌamoꞌmo apaipafiꞌmo aliꞌyaꞌmo aliꞌnigeꞌapaeꞌmo hapau apayamopafiꞌmo nehapaiye, huno laha paiꞌniye.

⁹Ani kava hutapa maiꞌnayaꞌmofeꞌmo afiꞌnona afinatetiꞌmo oꞌataleta nunumu huta lapateme lapateme eta maiꞌnone. Lagaemo, Apakaemo kahauꞌnisiya kavaꞌmo hisayafeꞌmo kaunekameꞌmoꞌa alino apaya malenageꞌa alagepa huꞌa apakesamo afiteꞌa ageꞌa aeto nehaya kavaꞌmo apaipafiꞌmo havai teno, huta nunumu nehune.

¹⁰Gotiꞌa ani kavaꞌmo hisigeta ala agiꞌamo amisaya agufa kavaꞌmo hutapa maisageno alagepa kavaꞌmoꞌa lapaipafatiꞌmo alagagana huno afole aisigetapa Gotiꞌmo magoꞌe magoꞌe hutapa agesayafeꞌmo nunumu nehune.

¹¹Gotiꞌa ha le konali ayamufaꞌage vekamoꞌa ayamufaꞌaletiꞌmo lokiya vaino lapateno. Lokiya vaino lapatesigetapa hosu afinaꞌmo oꞌataleta hosu lapaipamo okalita lapamogaga aiꞌnetapa muki yaꞌmo Afoꞌamofekeꞌmo hao ke hegae.

¹²Agaemo yagaino neꞌapateya ha le koteꞌmo haiꞌa neꞌmaiya vayaꞌeꞌmo hetama maleno lateꞌniya hetamatimo afaꞌa alisunafeꞌmo alo huno lateꞌniye.

¹³Agaemo hani yaꞌmo lokiyaꞌalegatiꞌmo lagufamo alino katino lateteno lavalelineno hauꞌniya Mafaꞌneꞌamoꞌa yagaino neꞌapateya kegiꞌyafiꞌmo lateꞌniye.

¹⁴Mafaꞌneꞌamoꞌmo kolaꞌaletiꞌmo miya faino hatu maeno latetenoꞌaeꞌmo hosu kavatimo alino ataleꞌniye. Kalaisiꞌmo hogote vekamo maiꞌniya gemae

¹⁵Kalaisiꞌa noꞌagaya Goti auneꞌamo maiꞌniye. Yege Mafaꞌneꞌamo maiꞌnenoꞌaeꞌmo muki alo huꞌniya yaꞌe vayaꞌeꞌmo aeno apakaseno maiꞌniye.

¹⁶Gotiꞌa Kalaisipiꞌmo muki yaꞌe vayaꞌeꞌmo alo huno apateꞌniye. Kokuꞌnapiꞌmo haneꞌniya yaꞌe vayaꞌenagi ma mopafiꞌmo haneꞌniya yaꞌe vayaꞌenagi neꞌagaya yaꞌe vayaꞌenagi noꞌagaya yaꞌe vayaꞌenagi huno alo huno apateꞌniye. Agaetetikeꞌmo yagaiꞌa neꞌapataya vayanagi ala vayanagi kava vayanagi ala apaki vayanagi huno agaetefeꞌmo alo huno apateꞌniye.

¹⁷Agaemo muki yateꞌe vayaꞌaiteꞌeꞌmo hogote vekamo maiꞌneno yagaino neꞌapategeꞌapaeꞌmo hanege maige huꞌa maiꞌnae.

¹⁸Siosi vayaꞌmo Kalaisi agufaꞌagana huꞌa maiꞌnagenoꞌaeꞌmo apakenopaꞌagana huno maiꞌneno yagaino neꞌapate. Agaemo aepa faiꞌniya vekamo maiꞌniyanageno alagi hogote vekamo maisiyafeꞌmo kanolufatiꞌmo hogoteno he tiꞌniye.

¹⁹Gotiꞌa muki agaiꞌa aipa agesamo Kalaisi aipafiꞌmo alagi hanesiyafeꞌmo hauꞌniye.

²⁰Hauꞌniyanageno kokuꞌnapi vayaꞌe ma mopafi vayaꞌeꞌmo agaetetiꞌmo alino nanu aeno apatesigeꞌa magokepi lokaeꞌa maisayafeꞌmo hauꞌniye. Gotiꞌa hauꞌnigenoꞌaeꞌmo Mafaꞌneꞌamoꞌmo malipu yosaleꞌmo aino lakiꞌniya kolaꞌaletiꞌmo alino nanu aeno lateꞌniye.

²¹Lapakaemo mago afinaꞌmo Gotiꞌeꞌmo lokaeta oꞌmaitapa lapaote aote hutapa maiꞌnetapaeꞌmo hosu kavaꞌmo huge hosu lapakesamo afige hutapa maiꞌnetapaeꞌmo kame vayaꞌamo maiꞌnayaꞌmonanafa hemenimo agaiꞌaꞌeꞌmo alino nanu aeno lapateꞌniye.

²²Goti aulagaleꞌmo lapaote vayaꞌamo maisageno hosu kavatapimo alagi ohanesigetapa vaiꞌmo oꞌalisayafeꞌmo Mafaꞌneꞌamoꞌmo agufamo aliteno faliꞌniya kavatetiꞌmo alino nanu aeno lapateꞌniye.

²³He, oꞌataleta lapakesa afita fatago hume hume neꞌutapaeꞌmo noꞌmo yafateꞌmo faiꞌa ategekana hutapa maiꞌneta oꞌataletapa alagepa faigoko geꞌamo afitetapa lapavayagunagu hutapa agava maiꞌneta oꞌataleꞌnisayana Goti aulagaleꞌmo alagepa huta he titapa maigae. Mani alagepa faigoko geꞌamo muki ma mopafi vayaꞌaifeꞌmo aeꞌa hakalo huꞌa hapa paiꞌnageꞌa afiꞌnae. Nagaemo Poloꞌna ani gelefeꞌmo Goti aliꞌyaꞌamo neꞌaluva vekamo hamaleꞌnove. Poloꞌa siosi vayaꞌaiteꞌmo aliꞌyaꞌmo aliꞌniya gemae

²⁴Nagaemo lapakaetefeꞌmo kanamo neꞌaluvaꞌmofeꞌmo namogaga neꞌauve. Kalaisiꞌa kanamo aliꞌniya kava huꞌna agufalefeꞌmo kanamo neꞌaluve. Kalaisi agufaꞌamo agaiꞌa siosi vayaꞌamae. Goti mafaꞌneꞌamogi kanamo neꞌaliya aliꞌyaꞌapimo hano osuꞌniye. Nagaemo kanamo neꞌaluva hetamaꞌnimo aliꞌna hapa maegauve.

²⁵Gotiꞌa lapakaetefeꞌmo geꞌamo aeꞌna hakalo huꞌna hano hisuvafeꞌmo siosi aliꞌyateꞌmo navaleno alino nateꞌniye.

²⁶Gotiꞌa mago kavaꞌamo alino fala ki maleꞌnigeꞌa muki vayaꞌmogimo muki afinaꞌmo oꞌageꞌnayaꞌmonanafa hemenimo apaote vayaꞌamo alino apave liꞌniye.

²⁷Gotiꞌa muki nofi vayaꞌaitegamo asole ha le konali kavaꞌamo fala kiꞌniyanageno alino apave lisiyafeꞌmo hauꞌnigenoꞌaeꞌmo agesamo afiꞌniye. Mani fala kiꞌniya gemo Kalaisiꞌa lapaipafiꞌmo maiꞌniya nefeꞌmo ava gemo haneꞌniye. Agaetefeꞌmo ha le konali yaꞌamo alisayafeꞌmo lapavayagunagu hutapa agava neꞌmaiye.

²⁸Lagaemo muki vayaꞌamo apavalelita uta apatesunageꞌa Goti aulagaleꞌmo Kalaisipiꞌmo maiꞌneꞌa haiꞌa hapaisayafeꞌmo muki vayaꞌaifeꞌmo Kalaisife ava gemo aeta hakalo huta hapa nepaune. Lagaemo alagepa lagesamo neꞌafitaeꞌmo muki vayaꞌaifeꞌmo, ehetapiye, huta huge muki vayaꞌaina alita apaya malege huta neꞌmaune.

²⁹Nagaeꞌeꞌmo mani kavaꞌmo afole aisiyafeꞌmo Kalaisi ayamufaꞌaletiꞌmo naipafiꞌmo lusi kava huno aliꞌyaꞌmo neꞌaligeꞌnaeꞌmo ayamufaꞌaletiꞌmo naya mukiki huꞌna aliꞌyaꞌamo neꞌaluve.