Read Keyagana 1 Timoti 3 Bible Online

1 Timoti 3 - Keyagana bible

1 Timoti 3

¹Mani gemo lama gemo haneꞌniyana mago vekamoꞌa siosi vayaꞌaiteꞌmo yagaisuva vayatama vekamo maigesuve, huno hisiyaꞌmoꞌmo alagepa aliꞌyafeꞌmo hauꞌniye.

²Ani vayatama vekamo vaiꞌmo noꞌamisageno afaꞌa neꞌmaisiya vekamoꞌa magoke aꞌmo aliꞌnisiya vekamokeꞌmo maigiye. Agufaleꞌmo alagepa huno yagaino atege aipa agesaleꞌmo alagepa huno yagaino atege alagepa kavaꞌmo huge nata vayaꞌaitegamo alagepa huno yagaino apatege afaꞌa alino apaya malege huno neꞌmaiya vekamokeꞌmo maigiye.

³Lusi aniꞌmo neꞌneno negi nagi osuge kaveta osuge monieꞌmo haꞌye osuge huteno yagu yaga huno maige ge neꞌvaiya kavafeꞌmo ohauge ma mopafi yafeꞌmo lusi kava huno ohauge huno neꞌmaisiya vekamoꞌmo maigiye.

⁴Agaemo afamo anagaꞌaleꞌmo alagepa huno yagaino apateꞌneno mafaꞌneꞌamo muki kavatefeꞌmo alagepa kavatetiꞌmo alino aiyafiꞌmo apatesiya kavaꞌmo haneꞌniye.

⁵Mago vekamoꞌa afamo anagaꞌaleꞌmo alagepa huno yagaino apatesiyafeꞌmo oꞌageꞌnisiyana haiya kava huno Goti siosi vayaꞌaleꞌmo yagaino apategaiye.

⁶Saufa Goti mafaꞌnemo hamaleꞌnisiya vekamoꞌmo vayatama vekamo oꞌmaigiye. Sataniꞌa himuꞌnamu agesamo neꞌafigenoꞌaeꞌmo Gotiꞌa, hosu kagesamo afiꞌnane, huno huꞌniya agufa gemo huno saufamo agesa afino fatago huꞌnisiya Goti mafaꞌnemoꞌa agufamo avalelino nehaisigenoꞌaeꞌmo Gotiꞌa, hosu kavaꞌmo huꞌnane, huno hugiye.

⁷Malaga vayaꞌmogiꞌeꞌmo, alagepa vekamo maiꞌniye, huꞌa nehisageno neꞌmaisiya vekamokeꞌmo maigiye. Fiku yanageno hosu agiꞌamo amisageno Satani aneꞌaifiꞌmo hegekana huno atafaugiye. Nikeni vayaꞌaifeꞌmo apava gemo huꞌniya gemae

⁸Ani kavaꞌmo huꞌa mono aliꞌyateꞌmo maiꞌnaya vayaꞌmogimo alagepa huꞌa neꞌyagaiya yahauve vayaꞌmo maigae. Lole gemo osuno magoke gemo huteno lusi aniꞌmo neꞌneno negi nagi osuno monieꞌmo haꞌye nosisiya vekamokeꞌmo maigiye.

⁹Alagepa agupi mafaꞌnemo aliteno lagesa afita fatago nehuna gemo hogoteno alino fala ki maleꞌneno henagaꞌamo ago alino lave liꞌnigeta ageꞌnona geleꞌmo atafauno alagi huꞌneno akame nehisiya vekamo maigiye.

¹⁰Ani kavaꞌmo huꞌa hogoteꞌa amalageka huꞌa agesagenoꞌaeꞌmo alagepa kavaꞌmo nehisaya vekamo nikeni aliꞌyateꞌmo maino.

¹¹Ani kavaꞌmo huno aꞌamoꞌmo alagepa huno yagaisiya agufa a kanogeꞌmo maigiye. Hosu faigoko gemo osuno agufaleꞌmo alagepa huno yagaino atege muki kavatefeꞌmo alagepa kavaꞌmo huge nehisiya a kanomokeꞌmo maigiye.

¹²Nikeni aliꞌyaꞌmo aligefe hisiya vekamo magoke a kanomo aliꞌnisiya vekamokeꞌmo maigiye. Agaemo aꞌne mafaꞌneꞌaleꞌmo alagepa huno yagaino neꞌapatesiya vekamokeꞌmo maigiye.

¹³Alagepa nikeni aliꞌyaꞌmo alisiyana ala agiꞌamo aliteno agesa afino fatago nehuno lokiya vaino maigiye. Mono gemo aepaꞌaeꞌmo huꞌniya gemae

¹⁴Aise afinaꞌmo maiteꞌna kagaetegamo visuvafeꞌmo nahauꞌniye.

¹⁵Aise afinaꞌmo maigeꞌna oꞌvisugekaeꞌmo Goti nopiꞌmo maiꞌnekaeꞌmo hisana agufa kavaꞌmo agesanafeꞌmo mani avoꞌmo nekaove. Ani noꞌmo afaꞌa neꞌmaiya Goti siosiꞌamo haneꞌnigeno lama geꞌamoꞌmo hanege hanege huno hanesiyafeꞌmo noꞌmo posilekeꞌmo nehaneya kava huno lama geꞌamo siosiꞌaleꞌmo haneꞌniye.

¹⁶Mono kavatimo hogote kavaꞌmo alopa kavaꞌmo haneꞌnigeno alino fala ki maleꞌneno alino lave liꞌnigeta ani mono kavaꞌmo nehune. Mani geeꞌmo hutaeꞌmo, Gotiꞌa agufamo aliteno vayaꞌai apaulagaleꞌmo afole aiꞌniye. Goti Aunemeꞌamoꞌmo, fatago vekae, huno huꞌniye. Enisole vayaꞌmogi ageꞌnae. Alu nofi alu nofi vayaꞌaifeꞌmo agaefeꞌmo alagepa faigoko geꞌamo aeꞌa hakalo huꞌa hapa paiꞌnae. Ma mopafi vayaꞌmogimo agaefeꞌmo apakesa afiꞌa fatago huꞌnae. Gotiꞌa avalelino haino kokuꞌnapi ateꞌnigeno maiꞌniye, huta nehune.