Read Keyagana 1 Timoti 5 Bible Online

1 Timoti 5 - Keyagana bible

1 Timoti 5

¹Kagaemo alopa vayaꞌaifeꞌmo lokiya kagemo oꞌaika afokamofeꞌmo ha nepaina agufa kagemo aika hapa nepaika alika api aika apato. Konagakamogifeꞌmo hapa nepaina agufa gemo huka neya vayaꞌaifeꞌmo hapa nepaika alika api aika apato.

²Itakamofeꞌmo ha nepaina agufa gemo huka alopa aꞌneꞌaifeꞌmo hapa paiyo. Kasakamogifeꞌmo hapa nepaina agufa gemo huka venemo aꞌneꞌaifeꞌmo alagepa kaipamo kaliꞌneka hapa paiyo. Kogu aꞌneꞌaitegamo hisaya kavafeꞌmo huꞌniya gemae

³Kogu aꞌnemo yagaiꞌa apatesaya vayaꞌmo oꞌmaiꞌnisayana siosi vayaꞌmogimo alagepa huꞌa yagaiꞌa apategae.

⁴Ani kogu aꞌnemogi mafaꞌneꞌapimo maige apakioꞌapimogi maige huꞌa maiꞌnisayana afaꞌa yagaiꞌa apategae. Kogu aꞌne itaꞌapi afoꞌapimogimo anonaꞌapilefeꞌmo Gotifeꞌmo mono kava huꞌa yagaiꞌa apategae. Gotiꞌa ani kavafeꞌmo hauꞌnigenoꞌaeꞌmo, alagepa kavaꞌmo haneꞌniye, huno nehiye.

⁵Apakaiꞌapigeꞌmo maiꞌnisaya kogu aꞌnemogimo Gotifekeꞌmo apakesamo afiꞌapaeꞌmo, afaꞌa laha maegaiye, huꞌa huteꞌa nunumuꞌmo huꞌa apatege felugaꞌe haniꞌilagaꞌeꞌmo nunumuꞌmo huge huꞌa neꞌmaiye.

⁶Neꞌmaiyaꞌmonanafa apakufamoꞌmo hauꞌniya kavaꞌmo nehaya kogu aꞌnemogimo afaꞌa maiꞌneꞌapaeꞌmo fali kavategamo neꞌmaiye.

⁷Vaiꞌmo oꞌalisayafeꞌmo ani kavaꞌmo hiyo, huka hapa paiyo.

⁸Mago vayaꞌmogi konagaꞌapimogiteꞌmo alagepa huꞌa noꞌyagaisayana hosu kavaꞌmo nehayaꞌmonanafa afamo anagaꞌapileꞌmo yagaiꞌa noꞌapatesayana magoꞌe huꞌa hosu kavaꞌmo nehae. Ani kavaꞌmo nehisaya vayaꞌmo mono gemo ataleꞌa apakesa afiꞌa fatago nosaya vayaꞌaina magoꞌe huꞌa aeꞌa apakaseꞌa alagi hosu vayaꞌmo maiꞌnae.

⁹Magoke vekaleꞌmo maiꞌneꞌapaeꞌmo sigisitiꞌa kafugamo aeꞌa agaseꞌa maiꞌnisaya kogu aꞌneꞌai apakiꞌapimo avoꞌmo kae maleyo.

¹⁰Apakaefeꞌmo, alagepa kavaꞌmo nehae, huꞌa nehisageꞌa maiꞌneꞌa mafaꞌneꞌapileꞌmo yagaiꞌa apatege nata vayaꞌaiteꞌmo yagaiꞌa apatege apaote vayaꞌai apaiyamo sese huꞌa apatege kana aliꞌnisaya vayaꞌaina hapa maege muki alagepa kavatefeꞌmo apayamukiki huge huꞌa maiꞌnisaya kogu aꞌneꞌai apakiꞌapimo avoꞌmo kaeyo.

¹¹Saufa kogu aꞌneꞌai apakiꞌapimo avoꞌmo okaeyo. Apakaemo veleꞌmo maisaya kavafeꞌmo apakesamo afisayaꞌmoꞌmo Kalaisiꞌmo apakameꞌya amigae.

¹²Kalaisifeꞌmo, ina kavaꞌmo hugune, huꞌa ha paiꞌnaya gemo amagiꞌa atalesagenoꞌaeꞌmo vaiꞌmo apamigiye.

¹³Magoꞌe huꞌa hosu kavaꞌmo huꞌa aliꞌyaꞌmo oꞌaliꞌa alu nopi alu nopiꞌmo uꞌeꞌa nehuꞌapaeꞌmo hosu faigoko gemo hulitata nehuꞌapaeꞌmo himuꞌnamu kavaꞌmo huteꞌa, nagaekeꞌmo ageteꞌna afiꞌnove, huꞌa huteꞌa osisaya agufa gemo afaꞌa nehae.

¹⁴Ani agufa kavaꞌmo hugayaꞌmofeꞌmo saufa kogu aꞌnemogimo halate uꞌa veleꞌmo maiꞌneꞌa mafaꞌnemo aliꞌa neꞌapateꞌa noꞌapifi yateꞌmo yagaisayafeꞌmo nahauꞌniye. Ani kavaꞌmo hisageꞌapaeꞌmo kame vayatimogimo huꞌa faipa huꞌa latesaya kaꞌmo oꞌagegae.

¹⁵Mani avoꞌmo okaeꞌnogeꞌapaeꞌmo hogoteꞌa mago kogu aꞌne anagaꞌmogi malage huꞌa alagepa kaꞌmo ago atale uꞌa Satani akame huꞌnae.

¹⁶Mago apakesa afiꞌa fatago nehaya vayapatiꞌmo mago kogu aꞌnemo maiꞌnisayana ani vayapatiꞌmo mago vekamomofi a kanomomofi huno afaꞌa yagaino atesiya kavaꞌmo haneꞌniye. Siosi vayaꞌmogimo agaiꞌageꞌmo maiꞌnisiya kogu a kanoleꞌmo yagaiꞌa atege mago alu kogu aꞌne anagaꞌaiteꞌmo yagaiꞌa apatege huꞌnisayana ani kogu aꞌnemogimo kanamo afaꞌa oꞌaligae. Vayatama vayaꞌaitegamo hisaya kavafeꞌmo huꞌniya gemae

¹⁷Yagaiꞌa neꞌapataya vayatama vayaꞌmogi alagepa aliꞌyaꞌmo alisayana siosi vayaꞌmogi hapao ke heꞌa alagepa miyaꞌapimo apamigae. Goti geꞌamo aeꞌa hakalo huꞌa aliꞌa apaya neꞌmalaya vayatama vayaꞌaina hogoteꞌa miyaꞌapimo afaꞌa apamigae.

¹⁸Goti mukufiꞌmo avoꞌmo kae maleꞌniya gemoꞌa hunoꞌaeꞌmo, pulumakamogimo viti alaga neꞌyaꞌmo haletiꞌyaꞌamo apaiyaletiꞌmo aeꞌa nehaleꞌapaeꞌmo ani neꞌyapatiꞌmo oꞌnesayafeꞌmo apavayaleꞌmo nofitetiꞌmo kitapa oꞌapateyo, huno huteno magoꞌe gemo hunoꞌaeꞌmo, aliꞌyaꞌmo neꞌaliya vayaꞌmo miyaꞌapimo alisaya vayaꞌmo maiꞌnae, huno huꞌniye.

¹⁹Magoke vekamoꞌa yagaino neꞌapateya vayatama vekaeꞌmo, hosu kavaꞌmo nehiye, huno hisiya gemo oꞌafiyo. Lole vekalaꞌmoganimofi loleꞌe magoꞌe vayaꞌmogimofi huꞌa eꞌa hisaya gegeꞌmo afiyo.

²⁰Kagaemo muki vayaꞌai apaulagaleꞌmo hosu kavaꞌmo hisaya vayatama vekaeꞌmo, hosu kavaꞌmo huꞌnane, huka ha paigeꞌapao muki vayatama vayaꞌmogimo afiteꞌa koli hiyo.

²¹Nagaemo Goti aulagalenagi Ala kava netimo Yesu Kalaisi aulagalenagi Gotiꞌa lekana paino apateꞌniya enisole vayaꞌai apaulagalenagi huꞌna kaha paiꞌnaeꞌmo, mani kavaꞌmo huka alika fako huka apategefe hukaeꞌmo fiku alika fako huka oꞌapateka hogoteka ani gemo aepaꞌamo afitekaeꞌmo mago vayaꞌaitegaꞌe alu vayaꞌaitegaꞌeꞌmo lole agufa kavaꞌmo osuka magoke aiyaya kavakeꞌmo huka alika fako huka apato, huꞌna kaha nepauve.

²²Siosi vayaꞌaiteꞌmo yagaiꞌa apatesaya vayaꞌmo lekana paika apateteka apakaeteꞌmo malage huka kayaꞌmo maleka oꞌapato. Fiku yanageno lekana paika ateꞌnisana vekamo hosu kavaꞌamoꞌmo kagaeteꞌmo aino kamaesigeka kagaemo vaiꞌmo aligane. Kaotekeꞌmo maiteka alagepa huka maiyo.

²³Kagaemo kaipa kagafuꞌmo kige kaitaꞌmo kahauge nehigekaeꞌmo anilafaꞌageꞌmo oꞌneka nofi alagafati aniꞌmo aiseꞌamo lakiteka no.

²⁴Mago vayaꞌai hosu kavaꞌapimo hogoteno afole neꞌaigeꞌa ageteꞌapaeꞌmo aliꞌa fako huꞌa neꞌapatayaꞌmonanafa mago vayaꞌai hosu kavaꞌapimo aliꞌa fako huꞌa neꞌapataya afinaꞌmo akamelegatiꞌmo afole neꞌaiye.

²⁵Ani kava huno mago vayaꞌai alagepa kavaꞌapimo vayaꞌai apaulagaleꞌmo haneꞌniyaꞌmonanafa oꞌageꞌnaya alagepa kavaꞌapimo alagi fala kino ohaneno afole aisigeꞌa agegae.