Read Keyagana 2 Timoti 2 Bible Online

2 Timoti 2 - Keyagana bible

2 Timoti 2

¹Ani kavaꞌmo huꞌniyaꞌmofeꞌmo kagaemo mafaꞌneꞌnimogamo Kalaisi Yesuꞌa fiku kaha maeno kamiꞌniya kavatetiꞌmo lokiya vaika maiyo.

²Nagaemo muki vayaꞌaifeꞌmo aeꞌna hakalo huꞌna hapa paiꞌnogekaeꞌmo apakaeꞌeꞌmo magokepi lokaeka maiꞌnekaeꞌmo kagaemo ago afiꞌnane. Kagaemo ani afiꞌnana gemo muki afinaꞌmo alagepa huꞌa aliꞌyaꞌmo neꞌaliya vayaꞌmogi ani geleꞌmo yagaiꞌa atesayafeꞌmo alika apamigeꞌapao aliꞌneꞌa magoꞌe huꞌa alu vayaꞌaina aliꞌa apaya maleyo.

³Ani kavatefeꞌmo kagaemo Yesu Kalaisi alagepa ati vekaꞌagana huka maiꞌneka kanamo alige alige huka maiyo.

⁴Ati vayaꞌmogimo kame hisayafeꞌmo ma mopafi yaꞌmoꞌa apatafauno apatesiya agufa aliꞌyaꞌmo noꞌaliye. Ati aliꞌyateꞌmo apavaleno alino apateꞌniya vekamoꞌa amuse huno apatesiyafeꞌmae.

⁵Nagu nagu huꞌa yokalo nelaya vayaꞌmogimo nagu nagu hisaya keꞌaepa gemo akame osisayana hu maleꞌnaya yaꞌmo afaꞌa oꞌaligae.

⁶Hoyamo ayamufa valeno alino neꞌvaiya vekamoꞌa hogoteno hoyaꞌafatiꞌmo lesiya neꞌyaꞌmo aligiye.

⁷Mani nehuva geeꞌmo kagesa afifi huka maiꞌnegenoꞌao Ala kava neꞌmoꞌa alino kamisigekaeꞌmo muki geꞌamo afika aeto hugane.

⁸Yesu Kalaisiꞌa Nevini aginagoꞌamoꞌmo alagepa faigoko geꞌnilefeꞌmo faliꞌniyatetiꞌmo ago alino he tino ateꞌniya kavafeꞌmo kage okanika kagesa afifi huka maiyo.

⁹Mani Goti gelefeꞌmo huꞌapaeꞌmo, hosu kavaꞌmo nehiya vekamo maiꞌniye, huꞌa huteꞌa nofi kiꞌa nateꞌnayaꞌmonanafa Goti geꞌamo aino atagu ofaesiyafeꞌmo nofi kiꞌa oꞌateꞌnae.

¹⁰Nagaemo lekana paino apateꞌniya vayaꞌmo Kalaisi Yesupiꞌmo maiꞌnisageno Gotiꞌa apakufamo alino katino apatesigeꞌapaeꞌmo ha le konali yaꞌamo aliteꞌa maige maige huꞌa maisayafeꞌmo Goti aliꞌyaꞌamo oꞌataleꞌna neꞌaliꞌnaeꞌmo muki alu kana ya alu kana yaꞌmo neꞌaluve.

¹¹Lama geeꞌmo lagesa afita fatago nehuna gemo haneꞌniyana, Agaeꞌeꞌmo faliꞌnisunana agaeꞌeꞌmo afaꞌa maigune.

¹²Alagi oꞌataleta kanamo alime alime neꞌvisunana kini vayakana huta agaeꞌeꞌmo magokepi lokaeta maiꞌneta yagaita apategaune. Lagaemo agaefeꞌmo oꞌageꞌnona vekae, huta nehisunana lagaefeꞌmo oꞌapakeꞌnova vayane, huno hugiye.

¹³Lagaemo, akame hugune, huta hutetaeꞌmo akame nosisunana agaemo huguve, huno hu maleꞌnisiya gemo akame hugiye. Huguve, huno nehiya gemo alagi oꞌataleno afaꞌa akame nehiya vekamo maiꞌniyaꞌmofeꞌmae. Alagepa huka aliꞌyaꞌmo aliyo, huno ha paiꞌniya gemae

¹⁴Ani geeꞌmo muki afinaꞌmo apakesamo afisayafeꞌmo ina ge huka hapa paiyo. Ala kava neꞌmo aulagaleꞌmo maiꞌneꞌnaeꞌmo, alu ge alu geletiꞌmo ge vaitapa kaveta osiyo, huka hapa paiyo. Ani agufa gemoꞌa afisaya vayaꞌaina hapa oꞌmaegaifa alino hosu hunoꞌageꞌmo apategaiye.

¹⁵Gotiꞌa kagaefeꞌmo, Naulagaleꞌmo alagepa aliꞌyaꞌmo neꞌaline, huno husiyafeꞌmo kayamukiki huvo. Avagage osisiya agufa aliꞌyaꞌmo neꞌaliya vekagana huka lama gelefeꞌmo alagepa huka aliꞌyaꞌmo aliyo.

¹⁶Aliganaꞌmonanafa ma mopafi geꞌe afa geꞌeꞌmo nehisagekaeꞌmo maika halove huka apato. Ani agufa gemoꞌa hapa oꞌmaesigeꞌa Gotifeꞌmo mono osuꞌa magoꞌe huꞌa hosu kavaꞌmo hugae.

¹⁷Ani agufa hosu gemoꞌa apamuꞌmo apaleteno ko nesiya agufa kavakana huno aleme aleme uno ko sino alopa hegaiye. Ani agufa gemo aliꞌana apaya maleꞌnaꞌa vekalaꞌmo Haimeniyasiꞌe Failitasiꞌeꞌmo maiꞌnaꞌae.

¹⁸Anakaemo alagepa kaꞌmo atale uꞌanaeꞌmo, agaegiꞌeꞌmo ago he tiꞌnonanageta falisunatetiꞌmo halate he otigune, huꞌana hapa paiꞌnaꞌageꞌapaeꞌmo mago vayaꞌamogi apakesa afiꞌa fatago huꞌnaya kavaꞌapimoꞌmo heleve hugekana huno asagauno aiꞌniye.

¹⁹Asagauno aiꞌniyaꞌmonanafa Goti noꞌamo lokiya yafateꞌmo faino ateꞌniya yafaꞌmo afaꞌa haneꞌniye. Gotiꞌa faino ateꞌniya yafateꞌmo alagena yaꞌmo hu maleꞌniya yateꞌmo haneꞌniya gemoꞌa hunoꞌaeꞌmo, Ala kava neꞌmoꞌa vayaꞌamo apakeꞌniye, huno huteno magoꞌe gemoꞌa hunoꞌaeꞌmo, Muki vayaꞌamogimo Kalaisi agiꞌamo neꞌaya vayaꞌmogi hosu kavategatiꞌmo ataleꞌa viyo, huno hu maleꞌniye.

²⁰Goti vayaꞌamo afaꞌa maigayaꞌmonanafa alopa nopiꞌmo lusi moniletiꞌmo miya nefaiya yuvapamo goli yafatetiꞌmo alo huꞌnaya yuvapaꞌe siluva yafatetiꞌmo alo huꞌnaya yuvapaꞌageꞌmo ohaneꞌnifa yosaletiꞌmo alo huꞌnaya yuvapagi mopaletiꞌmo alo huꞌnaya yuvapaꞌenagi huno haneꞌniye. Mago yuvapaꞌamo alagepa aliꞌyaꞌmo alisiya yuvapamo haneꞌnigeno mago yuvapamoꞌamo hosu aliꞌyaꞌmo alisiya yuvapamo haneꞌniye.

²¹Mago vekamoꞌa ani hosu yatefeꞌmo aeno kalo paeno atesigenoꞌaeꞌmo alagepa yuvapagana huno maiꞌnisigeno kava vekaꞌamoꞌa muki alagepa aliꞌyaꞌaleꞌmo avaleno ategaiye.

²²Neya vayaꞌmogimo apakufamoꞌmo hauꞌniya kavaꞌmo nehaya kavategatiꞌmo ataleka kaune hetaleka eka yaveyave apaipafatiꞌmo Ala kava nefeꞌmo ge nehaya vayaꞌeꞌmo magokepiꞌmo lokaetapa maiꞌnetapaeꞌmo fatago kavanagi lapau lapayamopafiꞌmo nelapaiya kavanagi yuna lapaipa nekaliya kavanagi hutapa atafausayafeꞌmo vegala aeyo.

²³Negi maleteꞌa fiku gemo huge afige huꞌa neꞌmaisayaꞌmoꞌmo ago afiꞌnanana gegeꞌmo vaige vaige huꞌa maigayanagi maika halove huka apato.

²⁴Ala kava neꞌmo aliꞌyaꞌamo neꞌalisiya vekamoꞌa geletiꞌmo kaveta osuno muki vayaꞌaitegamo yagu yaga kavakeꞌmo huge alagepa huno alino apaya malege oꞌafiꞌnisaya vayaꞌaifeꞌmo aipamo leno oꞌapateno yuna aipamo kalino apatege huno maisiya vekageꞌmo maino.

²⁵Agaemo gemo amagiꞌa neꞌatagaya vayaꞌaifeꞌmo himuꞌnamu gefatiꞌmo osuno vase vase gemo huno alino api aino apategaiye. Gotiꞌa apaipamo alino afe leno apatesigeꞌapaeꞌmo lama geꞌamo afisafi oꞌafisafi, huno vase vase gefatiꞌmo hugiye.

²⁶Sataniꞌmo geꞌamo akame hisayafeꞌmo aneꞌaifiꞌmo hegekana huno apatafauꞌniye. Alagepa aliꞌyaꞌmo neꞌaliya vekamoꞌa apakaetegamo ge hugefeꞌmo hunoꞌaeꞌmo vase vase huno ge hisigeꞌapaeꞌmo aneꞌaifatiꞌmo aeꞌa kasalo paegae.