Read Keyagana Himulu 1 Bible Online

Himulu 1 - Keyagana bible

Himulu 1

¹Akeyaꞌvilaga Gotiꞌa agaiꞌalegati gemo alini eꞌa aeꞌa hakalo huꞌa hapa nepaiya vayaꞌai apavayaletiꞌmo laginago vayaꞌaifeꞌmo hapa paiꞌniye. Alu afinaꞌae alu afinaꞌaeꞌmo aise gemo hapa paite hapa paite huge alu kavatetiꞌe alu kavatetiꞌeꞌmo hapa paige huno hapa paiꞌniye.

²Hemenimo henaga afinaꞌmo Mafaꞌneꞌaletiꞌmo laha paiꞌniye. Mafaꞌneꞌapimogimo afoꞌapimogi muki yaꞌapimo neꞌaliya kava huno Mafaꞌneꞌamoꞌmo muki yaꞌamo alisiyafeꞌmo ago lekana paino ateꞌniye. Gotiꞌa agaetetikeꞌmo muki yaꞌmo alo huꞌniye.

³Agaemo Gotiꞌa ha le konali yaꞌamo aeno ha legekana huno neꞌmaiye. Agaemo Goti lama ge auneꞌamo maiꞌniye. Ayamufaꞌage geꞌaletiꞌmo muki yaꞌmo afaꞌa hanesiyafeꞌmo yagaino neꞌatenoꞌaeꞌmo agaiꞌamo hosu kavatimo aeno kalo paeno ataletenoꞌaeꞌmo haino kokuꞌnapi Gotiꞌa anaga hogote vekamo yagaino neꞌapateya vekamo lamaga haopaleꞌmo fai maiꞌniye. Goti Mafaꞌneꞌamoꞌmo enisole vayaꞌaina ago aeno apakaseꞌniya gemae

⁴Ani kava huno enisole vayaꞌmo ago aeno apakaseno ala agiꞌamo Gotiꞌa alino amiꞌniya agiꞌamoꞌmo apakiꞌapimo ago aeno agaseꞌniya kava huno aeno apakaseno maiꞌniye.

⁵Gotiꞌa agaefeꞌmo,Mafaꞌneꞌnimo maiꞌnane. Hemenimo ago aliꞌna kateꞌnove, huno huteno magoꞌe gemo hunoꞌaeꞌmo,Afoꞌamoꞌnamo maiꞌnovanageꞌna agaetegamo ani kavaꞌmo hisugeno Mafaꞌneꞌnimo maiꞌniyanageno nagaetegamo ani kavaꞌmo hugiye, huno ha paiꞌniyaꞌmonanafa mago enisole vayaꞌaifeꞌmo ani agufa gemo huno hapa opaiꞌniye.

⁶Hapa opaiꞌniyaꞌmonanafa yege Mafaꞌneꞌamo ma mopafiꞌmo alino atesigeno eminesiyafeꞌmo mani gemo hunoꞌaeꞌmo,Muki enisole vayaꞌmogitapamo agiꞌaleꞌmo alita asaga nehutapa agaefekeꞌmo mono hiyo, huno hapa paiꞌniye.

⁷Enisole vayaꞌaifeꞌmo apava gemo hunoꞌaeꞌmo, Enisole vayaꞌmo yasigana huno alo huno apateꞌniye. Aliꞌyaꞌamo neꞌaliya enisole vayaꞌmo ata vaikana huno alo huno apateꞌniye, huno huꞌniye.

⁸Huno huꞌniyaꞌmonanafa Mafaꞌneꞌaeꞌmo,O Gotiyo, muki afinaꞌmo alagi ofalika afaꞌa maige maige huka maiꞌneka yagaika apategane. Alagepa huka alika fako huka apateteka yagaika neꞌapatane.

⁹Kagaemo alagepa kavafekeꞌmo kahauꞌnigekaeꞌmo gemo amagiꞌa neꞌatalaya kavafeꞌmo alagi okahauꞌnigeno Gotikamoꞌmo uvelimo faleno kateꞌnigekaeꞌmo lusi kava huka kamogaga aiteka kafalukamogimo ago aeka apakaseka maiꞌnane, huno huꞌniye.

¹⁰Magoꞌe gemo hunoꞌaeꞌmo,Ala kava neyo, aepa faiꞌniya afinaꞌmo ma mopamo alo huꞌnane. Kayatetiꞌmo kokuꞌnaꞌmo alo huꞌnane.

¹¹Ma mopaꞌe kokuꞌnaꞌeꞌmo alagi hano hugiyaꞌmonanafa kagaemo afaꞌa maigane. Ma mopaꞌe kokuꞌnaꞌeꞌmo kukenagana huno atafa hegaiye.

¹²Vayaꞌmogimo kukenamo asagiꞌa lo aeꞌa maleꞌneꞌa saufa kukenamo aliꞌa neꞌvaiya kava huka ma mopaꞌe kokuꞌnaꞌeꞌmo alika ataleteka saufa kokuꞌnaꞌe mopaꞌeꞌmo malegane. Maleganaꞌmonanafa kagaemo mago alu kava huka oꞌmaige ofalige huteka maige maige huka alagi maigane, huno hu maleꞌniye.

¹³Gotiꞌa agaefeꞌmo,lamaga nahaopaleꞌmo faika maime maime neꞌugeꞌnao kame vayakamo aliꞌna kaiya afeꞌalumelaga apategauve, huno ha paiꞌniyaꞌmonanafa mago enisole vayaꞌaifeꞌmo ani agufa gemo hapa opaiꞌniye.

¹⁴Enisole vayaꞌmo apauneꞌapameꞌe vayaꞌmo maiꞌneꞌa Goti aliꞌyaꞌamo neꞌaliya vayaꞌmo maiꞌnae. Gotiꞌa fiku hapa maeno apakufamo alino katino apatesiya vayaꞌmo hapa maesayafeꞌmo alino apategeꞌa neꞌvae.