Read Keyagana 1 Yoni 1 Bible Online

1 Yoni 1 - Keyagana bible

1 Yoni 1

¹Lagaemo mago vekamo agiꞌamo Goti Geꞌamo maige maige huꞌa neꞌmaiya yaꞌmo aepa vekaeꞌmo ava gemo huta mani avoꞌmo nekaone. Ani vekamo aliꞌyaꞌamo aepa faiꞌniya afinatetiꞌmo maime maime eno maiꞌnigetaeꞌmo geꞌamo afiteta laulagafatiꞌmo ageꞌnone. He, aulu haeta ageteta agufaleꞌmo layatetiꞌmo ame aliꞌnone.

²Mani vekamo afaꞌa neꞌmaiya yaꞌmo aepa vekamo afole aiꞌnigeta agetetaeꞌmo agaefeꞌmo faigoko geꞌamo aeta hakalo huta lapa nepaune. Agaemo maige maige huꞌa neꞌmaiya yaꞌmo aepa vekamoꞌa Goti muki yaꞌmo Afoꞌamoꞌeꞌmo magokepi lokaeno maiꞌneno lagaetegamo afole aiꞌniya vekaekeꞌmo ava gemo lapa nepaune.

³Lagaemo afiteta ageꞌnona kavafeꞌmo ava gemo hutaeꞌmo lapakaemo lagaeꞌeꞌmo afalu afalugana huta maisunafeꞌmo aeta hakalo huta lapa nepaune. Lagaemo Afotimoꞌe mafaꞌneꞌamo Yesu Kalaisiꞌeꞌmo afalu afalugana huta neꞌmaune.

⁴Lagaemo lapaipafiꞌmo lapamogaga aisaya kavaꞌmo havai tesiyafeꞌmo mani avoꞌmo nekaone.

⁵Goti Mafaꞌneꞌamoꞌmo ina ge huno laha paiꞌnigeta afitetaeꞌmo aeta hakalo huta lapa nepaune. Lapa paitaeꞌmo Gotiꞌa ha le yaꞌaꞌe vekamo maiꞌnigeno aipafiꞌmo hani yaꞌamo alagi ohaneꞌniye, huta lapa nepaune.

⁶Lagaemo hanipiꞌmo umenitata nehutaeꞌmo, Gotiꞌeꞌmo afalu afalugana huta lokaeta neꞌmaune, huta nehisunana aigofe gemo huteta lama gemo alagi akame nosune.

⁷Lagaemo hanipiꞌmo umenitata osuta Gotiꞌa aeno ha neleya yateꞌmo neꞌmaiya kava huta aeno ha neleya yategamo umenitata nehisunana agaeꞌeꞌmo afalu afalugana huta maiꞌnonagenoꞌaeꞌmo agaemo lagaeꞌeꞌmo ani kava huno afalu afalugana huno neꞌmaigeno Mafaꞌneꞌamo Yesu Kalaisi kolaꞌamoꞌa muki hosu kavatimo aeno kalo paeno neꞌatale.

⁸Lagaemo, hosu kavatimo ohaneꞌniye, huta nehisunana lagaitieꞌmo humi nelatonagenoꞌaeꞌmo lama gemo laipafiꞌmo alagi nohane.

⁹Lagaemo Gotifeꞌmo, magufa hosu kava huꞌnove, inagufa hosu kava huꞌnove, huta aeta hakalo huta ha paisunagenoꞌaeꞌmo alagi alino ataleteno, afaꞌa ateyo, nehunoꞌaeꞌmo muki hosu kavatimo aeno kalo paeno atalesiyafeꞌmo agaemo huguve, huno hu maleꞌniya geꞌamo alagi akame huno fatago kavaꞌamo hugiye.

¹⁰Lagaemo, hosu kavaꞌmo osuꞌnone, huta nehisunana ina ge huta Gotifeꞌmo hutaeꞌmo, aigofe gemo nehiya vekae, huta nehunagenoꞌaeꞌmo lama gemo laipafiꞌmo alagi nohane.