Read Keyagana 1 Yoni 4 Bible Online

1 Yoni 4 - Keyagana bible

1 Yoni 4

¹Nahauꞌniya vayaꞌnimogitapae, Asole aigofe vayaꞌmogi gemo aeꞌa hakalo huꞌa hapa nepaiya vayaꞌmo muki ma mopafiꞌmo umenitata nehae. Umenitata nehayanagi lama gemo nehae, hutapa oꞌafitapa alagepa huta alita fako hutapa afitetapaeꞌmo, Gotitegatiꞌmo eꞌnafi oꞌmeꞌnafi, hutapa afiyo.

²Muki vayaꞌmogimo, Yesuꞌa Kalaisi vekamo maiꞌneno ma mopafi vayaꞌai apakufagana agufamo aliteno vemo hamaleꞌniye, huꞌa nehaya vayaꞌmo Goti Aunemeꞌamo aliꞌnae. Lapakaemo ani kavatetiꞌmo ageꞌnayana Goti Aunemeꞌamo apaipafiꞌmo maiꞌniye, huta agetapa aeto huꞌnae.

³Muki vayaꞌmogimo, Yesuꞌa Kalaisi vekamo maiꞌneno ma mopafi vayaꞌai apakufagana agufamo aliteno vemo hamaleꞌniye, huꞌa nosaya vayaꞌmo Goti Aunemeꞌamo oꞌaliꞌnae. Apakaemo Yesu kameꞌamo aunemeꞌamo aliꞌnae. Lapakaemo, hogotetapa ani aunemeꞌamo egaiye, hutapa afiꞌnagenoꞌaeꞌmo ago eꞌniye.

⁴Aise mafaꞌneꞌnimogitapae, lapakaemo Goti mafaꞌneꞌamo maiꞌnetapaeꞌmo aigofe vayaꞌaina ago aeta apakaseꞌnae. Lapaipafiꞌmo maiꞌniya Aunemeꞌamoꞌa ma mopafi vayaꞌai apaipafiꞌmo maiꞌniya aunemeꞌamo ago aeno agaseno maiꞌniyaꞌmofeꞌmae.

⁵Apakaemo ma mopafi vayaꞌmo maiꞌnayaꞌmofeꞌmo ma mopafi kavafekeꞌmo ava gemo huꞌa hapa nepaigeꞌapaeꞌmo ma mopafi vayaꞌmogi neꞌafiye.

⁶Lagaemo Goti vayaꞌamo maiꞌnone. Gotiꞌa ageꞌa aeto huꞌnaya vayaꞌmogimo getimo neꞌafiye. Goti vayaꞌamo oꞌmaiꞌnaya vayaꞌmogimo getimo noꞌafiye. Ani kavatefeꞌmo lama ge aepa Aunemeꞌamo agege aigofe gemo aepa aunemeꞌamo agege huta agegaune. Gotiꞌa hau ayamopafiꞌmo hauꞌniya vekaeꞌmo ava gemo huꞌniya gemae

⁷Nahauꞌniya vayaꞌmogitapae, Hapau apayamopafiꞌmo nehapaiya kavaꞌmo aepa vekamo Gotiꞌa maiꞌniyaꞌmofeꞌmo konagatimogifeꞌmo lahau layamopafiꞌmo lahaino. Muki vayaꞌmo hapau apayamopafiꞌmo nehapaiya vayaꞌmo Gotiꞌa alino apateꞌnigeꞌa mafaꞌneꞌamo maiꞌneꞌa Gotiꞌa ago ageꞌa aeto huꞌnae.

⁸Gotiꞌa hau ayamopafiꞌmo nehaiya vekamo maiꞌniyaꞌmofeꞌmo hapau apayamopafiꞌmo nohapausiya vayaꞌmogimo Gotiꞌa ageꞌa aeto osuꞌnae.

⁹Gotiꞌa Yesutetiꞌmo afaꞌa maisuna yaꞌmo alisunafeꞌmo aiya magoke mafaꞌneꞌamo alino ateꞌnigeno ma mopafiꞌmo emineꞌniye. Gotiꞌa ani kavatetiꞌmo lagaefeꞌmo hau ayamopafiꞌmo hauꞌniya kavaꞌamo alino lave liꞌniye.

¹⁰Ala alagepa kavaꞌmoꞌa haneꞌniyana lagaemo Gotifeꞌmo lahau layamopafiꞌmo olahauꞌniyaꞌmonanafa Gotiꞌa lagaefeꞌmo hau ayamopafiꞌmo hauꞌniye. Agaemo lagaefeꞌmo hau ayamopafiꞌmo hauꞌnisigeno aipamoꞌmo falu huno latesiyafeꞌmo Mafaꞌneꞌamo alino ateꞌnigeno emineno hosu kavatilefeꞌmo falino miya faino lateꞌniye.

¹¹Nahauꞌniya vayaꞌmogitapae, Gotiꞌa lagaefeꞌmo hau ayamopafiꞌmo hauꞌniyaꞌmofeꞌmo konagatimogifeꞌmo lahau layamopafiꞌmo lahaino.

¹²Mago vekamoꞌa Gotiꞌmo mago afinaꞌmo oꞌageꞌniye. Lagaemo konagatimogifeꞌmo lahau layamopafiꞌmo nelahaisiyana Gotiꞌa lagaepiꞌmo alagi maiꞌnigeno hau ayamopafiꞌmo hauꞌniya kavaꞌamo laipafiꞌmo kosino afu leꞌniye.

¹³Goti Aunemeꞌamo ago alino lamiꞌniyaꞌmofeꞌmo ani kavatetiꞌmo ago ageꞌnonana agaepiꞌmo alagi maiꞌnonageno lagaepiꞌmo alagi maiꞌniye.

¹⁴Lagaemo Afotimoꞌmo Mafaꞌneꞌamoꞌmo muki ma mopafi vayaꞌai apakufamo alino katino apatesiyafeꞌmo alino ateꞌnigeno emineꞌniye, huta agetetaeꞌmo aeta hakalo huta hapa nepaune.

¹⁵Gotiꞌa muki vayaꞌmogi, Yesuꞌa Goti mafaꞌneꞌamo maiꞌniye, huꞌa aeꞌa hakalo huꞌa hapa nepaiya vayapiꞌmo alagi maiꞌnigeꞌa apakaemo agaepiꞌmo alagi maiꞌnae.

¹⁶Gotiꞌa lagaefeꞌmo hau ayamopafiꞌmo hauꞌniye, huta afitetaeꞌmo ani kavafeꞌmo lagesa afita fatago nehune. Gotiꞌa hau ayamopafiꞌmo nehaiya vekamo maiꞌniye. Hau ayamopafiꞌmo hauꞌniya kavapiꞌmo alagi maiꞌnisaya vayaꞌmo Gotipiꞌmo alagi neꞌmaigeno Gotiꞌa apakaepiꞌmo alagi neꞌmaiye.

¹⁷Gotiꞌa agoti huno apatesiya afinaꞌmo lagaemo koli osisunafeꞌmo Gotiꞌa lagaefeꞌmo hau ayamopafiꞌmo hauꞌniya kavaꞌamoꞌmo laipafiꞌmo kosino ago afu leꞌniye. Hemenimo Kalaisiꞌa maiꞌniya kava huta ma mopafiꞌmo maiꞌnonaꞌmofeꞌmo agoti huno apatesiya afinafeꞌmo koli osugune.

¹⁸Gotiꞌa lagaefeꞌmo hau ayamopafiꞌmo hauꞌniye, huta huteta agaefeꞌmo lahau layamopafiꞌmo lahauꞌnisiyana koli nosune. Haino hapaiꞌniya hau ayamopafiꞌmo hauꞌniya kavaꞌaletiꞌmo koli nehuna kavatimo laipafatiꞌmo alino neꞌatale. Koli nehaya kavaꞌmo aepaꞌamo haneꞌniyana hosu kavaꞌmo nehunaꞌmofeꞌmo hosu miyatimo aligune, huꞌa apakesamo neꞌafiye. Gotiꞌa hau ayamopafiꞌmo hauꞌniya kavaꞌamoꞌmo koli nehaya vayaꞌai apaipafiꞌmo kosino afu nole.

¹⁹Gotiꞌa hogoteno lagaefeꞌmo hau ayamopafiꞌmo hauꞌniyaꞌmofeꞌmo lagaemo Gotifeꞌmo lahau layamopafiꞌmo nelahaiye.

²⁰Mago vekamoꞌa, Nagaemo Gotifeꞌmo nahau nayamopafiꞌmo neꞌnahaiye, huno nehunoꞌaeꞌmo konagaꞌamogifeꞌmo alagi nohaisiyana aigofe vekamo maiꞌniye. Agaemo ageꞌniya konagaꞌamofeꞌmo nohaisiyana haiya kava huno oꞌageꞌniya Gotifeꞌmo hau ayamopafiꞌmo haugiye.

²¹Gotiꞌa mani keꞌaepa geꞌaeꞌmo, Lapakaemo Gotifeꞌmo lapau lapayamopafiꞌmo nelapaisigeno konagatapimogiꞌefeꞌmo lapau lapayamopafiꞌmo lapaino, huno laha paiꞌniye.