Read Keyagana Leveleseni 1 Bible Online

Leveleseni 1 - Keyagana bible

Leveleseni 1

¹Gotiꞌa alino fala ki maleꞌniya gemo Goti aliꞌyaꞌamo neꞌaliya vayaꞌmo malage huno afole aisiya kavaꞌmo alino apave lisiyafeꞌmo Yesu Kalaisiꞌmo alino amiꞌniye. Kalaisiꞌa agaiꞌa enisole vekamo alino ateꞌnigeno aliꞌyaꞌamo neꞌaliya vekamo Yonitegamo emineꞌniye.

²Yoniꞌa muki ageꞌniya kavafeꞌmo avoꞌmo kae maleꞌniye. Mani gemo Yesu Kalaisiꞌa Gotitegati alagi lama geꞌamo alino ave liꞌniya gemo haneꞌniye.

³Mani aune gemo lekana paiteꞌa siosi vayaꞌaifeꞌmo aeꞌa hakalo huꞌa hapa nepaiya vayaꞌe afiteꞌa akame nehaya vayaꞌeꞌmo Goti aulagaleꞌmo alagepa huꞌa maiꞌnayanageꞌa afaꞌa apamogaga aigae. Afole aisiya afinaꞌmo ago hogo nehiyaꞌmofeꞌmae. Yoniꞌmo seveniꞌa siosifiꞌmo maiꞌnaya vayaꞌaifeꞌmo avoꞌmo kae maleꞌniya gemae

⁴Nagaemo Yoniꞌnamo Esiya kotega haneꞌniya seveniꞌa siosifiꞌmo maiꞌnaya vayaꞌmogitapaeꞌmo mani avoꞌmo kaeꞌnove. Gotiꞌa hogoteno maiꞌniyanageno hemeniꞌeꞌmo neꞌmaiyanageno henagaꞌamo maisiya vekamoꞌa fiku lapa maeno lapaminageno lapaipamoꞌmo falu hino. Goti Aunemeꞌamoꞌmo muki lokiya himamuꞌamo seveniꞌa himamuꞌamo aliꞌniya vekamo Gotiꞌa yagaino neꞌapateya sia aulagaleꞌmo maiꞌniya vekamoꞌa fiku lapa maeno lapaminageno lapaipamoꞌmo falu hino.

⁵Yesu Kalaisiꞌa Gotifeꞌmo lama ge ava gemo nehiya vekamoꞌa faliꞌnaya vayapatiꞌmo hogoteno alino he tino ateꞌniya yege mafaꞌneꞌamo maiꞌniye. Agaemo ma mopafi ala kini vayaꞌaiteꞌmo yagaino neꞌapateya neꞌapimoꞌa fiku lapa maeno lapaminageno lapaipamoꞌmo falu hino. Agaemo lagaefeꞌmo hau ayamopafiꞌmo hauꞌnigenoꞌaeꞌmo hosu kavatimo kolaꞌaletiꞌmo aeno kalo paeno ataleꞌniye.

⁶Agaemo afoꞌamo Goti aliꞌyaꞌamo alisunafeꞌmo yagaita apatesuna ala kini vayaꞌe mono huta neꞌapatona vayaꞌeꞌmo alino hamaleno lateꞌniye. Yesu Kalaisiꞌa ha le konali yaꞌaꞌe himamuꞌaꞌeꞌmo aliteno muki afinaꞌmo maige maige huno maino. He, lama ge.

⁷Afiyo, Hiyapiꞌmo eminesigeꞌa muki vayaꞌamogimo neꞌagesageꞌapaeꞌmo agufafiꞌmo nili aige faiteꞌa atege huꞌnaya vayaꞌmogiꞌeꞌmo agegae. Muki ma mopafi nofi vayaꞌmogimo neꞌageꞌapaeꞌmo yulagefa aigae. He, alagi lama ge, huno ani kavaꞌmo afole aigiye.

⁸Ala kava neꞌmoꞌa, Nagaemo aliꞌna aepa fai maleꞌnovanageꞌna aliꞌna hano huꞌna atesuva vekamo maiꞌnove. Hogoteꞌna maiꞌneꞌna hemeniꞌeꞌmo maiꞌnovanageꞌna henagaꞌaꞌeꞌmo maiguve. Muki lokiyaꞌage vekamo nagaemo maiꞌnove, huno huꞌniye. Yoniꞌa Kalaisiꞌmo ageꞌniya gemae

⁹Nagaemo Yoniꞌnamo konagatapimoꞌnamo maiꞌnove. Yesupiꞌmo maiꞌnetaeꞌmo magokepi lagafu kige Yesuꞌa yagaino nelateyategamo maige oꞌataleta atafauta alagi huta maige huta neꞌmaune. Nagaemo Goti alagi lama geꞌaꞌe Yesufeꞌmo ava geꞌeꞌmo aeꞌna hakalo huꞌna hapa paiꞌnovaꞌmofeꞌmo aliꞌa nahafaitalageꞌna eꞌna Patamosi ani agoꞌnanenafiꞌmo maiꞌnove.

¹⁰Ala kava neꞌmo afinaꞌmo afole aiꞌnigeꞌna Goti Aunemeꞌafiꞌmo maiꞌneꞌnaeꞌmo naune kavaꞌmo huꞌna maiꞌnogenoꞌaeꞌmo nakamelegatiꞌmo alopa gefatiꞌmo pikuli hugekana huno huꞌnigeꞌna afiꞌnove.

¹¹Ani gemoꞌmo, Nagaemo aliꞌna aepa faiꞌna ateꞌnovanageꞌna aliꞌna hano huꞌna atesuva vekamo maiꞌnove. Agesana kavafeꞌmo avoꞌmo kaetekaeꞌmo seveniꞌa siosimo Efasasi siosifinagi Simena siosifinagi Pegamamu siosifinagi Taiyataila siosifinagi Satisi siosifinagi Filatefiya siosifinagi Leyotisiya siosifiꞌmogi huꞌa maiꞌnaya vayaꞌaitegamo ani avoꞌmo atalegeno vino, huno naha paiꞌniye.

¹²Naha paiꞌnigeꞌna nakamelegamo agesuvafeꞌmo aiꞌna afe leꞌna agovana seveniꞌa aise hiꞌyalamuteꞌmo magoke magoke lamumo maleꞌnaya hiꞌyalamuꞌmo goli yafatetiꞌmo alo hu maleꞌnaya hiꞌyalamuꞌmo haneꞌnigeꞌna ageꞌnove.

¹³Mago vekamo vemo mafaꞌnegana vekamo hiꞌyalamuꞌmo folagapiꞌmo maiꞌneno yatala kukenamo vaitalegeno aiyalega lamiꞌnigeno goli yafatetiꞌmo alo hu maleꞌnaya lavolavomo haifiꞌyaleꞌmo vaino aliteno maiꞌniye.

¹⁴Agenopamoꞌe ayokaꞌmoꞌeꞌmo yaveyave sipisipi ayokakana huno yaveyaveꞌage huꞌniye. Aulagalaꞌmoꞌa ata vaikana huno leꞌniye.

¹⁵Aiyalaꞌmoꞌa haesa yafaꞌmo sitopufi kaeꞌnageno aeno ha neleya kava huno aeno ha leꞌniye. Nagaemo ageꞌamo afuvana alopa ani haꞌyamoꞌmo age aigekana huno age aiꞌniye.

¹⁶Agaemo lamaga ayapiꞌmo seveniꞌa kanefiꞌmo aliꞌnigeno avayafatiꞌmo aluga alugaꞌamo ave neꞌneya naipemo emineꞌniye. Augosafatiꞌmo yegemoꞌmo haineno lamotuleꞌmo aeꞌniya afinaꞌmo neleya kava huno leꞌnigeꞌna ageꞌnove.

¹⁷Ageteꞌnaeꞌmo faliꞌnova vekagana huꞌna aiyafiꞌmo nagoꞌya faiꞌna asagauꞌna aiꞌna maiꞌnogenoꞌaeꞌmo lamaga ayatetiꞌmo nagufaleꞌmo maleꞌnenoꞌaeꞌmo, Koli osuvo. Hogote vekamo maiꞌneꞌnaeꞌmo henaga vekamo maiꞌnove.

¹⁸Afaꞌa neꞌmauva vekamo maiꞌnove. Afiyo, huno, faliꞌnovanageꞌna maige maige huꞌna maiꞌna hano osuꞌna afaꞌa maiguve. He, lama ge. Nagaemo kitamo yakiꞌna apatesuva kiꞌmo aliꞌnovaꞌmofeꞌmo falisayafeꞌmofi afaꞌa maisayafeꞌmofi huꞌna muki vayaꞌaiteꞌmo yagaiꞌna neꞌapatove.

¹⁹Kagaemo ageꞌnana kavafenagi hemenimo haneꞌniya kavafenagi henagaꞌamo afole aisiya kavafeꞌmogi huka avoꞌmo kao.

²⁰Seveniꞌa kanefiꞌmo lamaga nayapiꞌmo haneꞌnigeka ageꞌnana kanefiꞌe seveniꞌa goli yafatetiꞌmo alo huꞌnaya hiꞌyalamuꞌefeꞌmo aepaꞌamo haneꞌniyana alino fala ki maleꞌniya kavafeꞌmo aepaꞌamo kaha paiguve. Seveniꞌa kanefiꞌmo haneꞌniya kava huꞌa seveniꞌa siosifiꞌmo apa vayaꞌamo maiꞌnae. Seveniꞌa aise hiꞌyalamuteꞌmo magoke magoke lamumo maleꞌnaya hiꞌyalamuꞌmo haneꞌniya kava huno seveniꞌa siosiꞌamo haneꞌniye.