Read Khiamniungan Naga Apung 1 Bible Online

Apung 1 - Khiamniungan Naga bible

Apung 1

¹Aya chongting nai Goa nou goum naiuso aün nouso sai;

²nungko goum nou püloikü naiuso asun tsüyangkü anyakhem nou loijeikü noiküla, naiuso Goa Onthso nou khiamnok chinai haiukeikü noiküla.

³Nungaih Goa nou ngiom, “awon nou asungi” naiuso nungko awon sungh;

⁴Goa nou nungh awon meikü ep, naiuso apaüh awon nou anyakhem ainou janthat.

⁵Nungaih Goa nou nung awon nou tü “Anyi”, naiuso anyakhem nou tü “Asoh” ta jon. Naiuso nungko Asham nou yankü khu, naiuso Ahom nou shin, nung aya chongting nyi nou noiküla.

⁶Nungaih Goa nou ngiom, “Khiam athang nimeko noiau ajanthat nungko a-eme lünoi, naiuso nungh angiotsünli noiküla.” Naiuso Goa nou ajanthat a-eme shanküta a-chi khiam ainou akhei khiam janthat, naiuso nungh nungti iulakü noiküla.

⁸Nungaih Goa nou ajanthat a-chi nou tü “Maou” ta jon. Nungko Asham nou yankü khu, küta Ahom nou shin, nungh nenyi nou noiküla.

⁹Naiuso Goa nou ngiom, “Maou nouso khemai noitsün khiam nouso athang tsak ko akamshi, küta gohwai nou asungi,” naiuso nungh sungkü noiküla.

¹⁰Goa nou nungh gohwai tü “Goh” ta, naiuso kamshikü noitsün khiam nou tü “Khiamnok” ta jon. Nungaih Goa nou nungh meikü epsan.

¹¹Naiuso Goa nou ngiom, “Goh nou thsanyan, paisam aosam, lelu eiusantsün chihle khiamle in pungkü naiuso pai eiu ao eiu nung goh nai asungi,” naiuso nungh sungkü noiküla.

¹²Nungtiphe goh nou paisam aosam in pungkü nyimsani, loto nungh epnai Goa mong lengkü noiküla.

¹³Nungko Asham nou yankü khu, naiuso ahom nou shin, nungh samnyi nou noiküla.

¹⁴Naiuso Goa nou ngiom, “Asoh naiuso anyi janthat ao naiuso ajekhaiu nouso, pon nouso, naiuso donyam sümai yaloutsün ah-tao that hanau, maou nai awon nou asungi;

¹⁵küta goh tü awon kiuau ngüso maou nai jeekü awon lünoi,” naiuso nungh chhikü noiküla.

¹⁶Nungtiphe Goa nou awon asongthso nime- aje, naiuso alei shan, nung aje nou anyi tü awoniau naiuso alei nou asoh tü awoniau shan loüh apaüh kianthsüo nouso lüko shan.

¹⁷Naiuso Goa nou goh nai awoniau thaiutha,

¹⁸naiuso anyi si asoh khako awon kiuau anyakhem ainou awon janthattao, maou nouso ai awon kiuau lingtha, naiuso Goa nou nungh mei ta epsan.

¹⁹Nungaih asham nou yankü khu naiuso ahom nou shin- nungh pülenyi nou noiküla.

²⁰Naiuso Goa nou ngiom, “Khiam nou aa noitsün in diodio nou miankü lünoi-i, naiuso aün wem nou ajeikeitsün waio nousoüh miankü lünoi-i.”

²¹Naiuso Goa nou khiamnok thainian asong nouso, naiuso khiam nai aa thainian apem, in amomo naiuso akoi potsün waio in amomo shan. Naiuso Goa nou nungh mei ta epsan.

²²Naiuso Goa nou ngüso oukkiu küta ngioji, “Piakü shingkü lükhu küta khiamnok nou amian-i, naiuso goh nai waio nouso shingkü lükhu-i.

²³Nungaih asham nou yankü khu naiuso ahom nou shin-nungh pungonyi nou noiküla.”

²⁴Naiuso Goa nou ngiom, “Goh nai aa thainian in amomo, tsam thainian, liu thainian asong si ehen asungi,” naiuso nungh sungikü noiküla.

²⁵Naiuso Goa nou goh thainian, tsam thainian, naiuso goh nai chinkeitsün aathso tilüsong lünou in amomo shan, naiuso Goa nou nungh mei ta epsan, nungko apa mong lengkü noiküla.

²⁶Naiuso Goa nou ngiom, “Samüh khaiunia nou sam khekkü shanko, ngüso sam khekkü sam sotsomli noi-e, naiuso khiamnok nai ngou nouso chiai, maou nai waio nouso chiai, tsam thainian nouso chiai, naiuso goh apem chiai, goh ko chinkeitsün apem chiai, ngüso APAOU lüthe-i.”

²⁷Küta Goa nou khaiunia nou meshen sotsom khekkü shansan, Goa khekkü nai apaüh khaiunia nou shan, apaüh ngüso melo naiuso menyiu shan.

²⁸Naiuso Goa nou ngüso oukkiukü ngiom, “Chetsinyimkü lükhu naiuso piakü shingkü lükhu, naiuso goh mianküta nungh lüthatsamlou. Ngo ni khiamnok ngou nouso chiai, maou nai jeikeitsün waio nouso chiai, naiuso goh chiai chinkeitsün aa thainian in amomo chiai APAOU theau taiukiuji.”

²⁹Naiuso Goa nou ngiom, “Athaplu, goh apemai eiu eiutsün paisi auo, nouso chikü Ngü nung asam hau kiuji, nung asam thaiutha eheshiu ao noi-e.

³⁰Naiuso goh thainian chikü, ajeikeitsün waio nouso chikü, naiuso goh nai chinkeitsün aa thainian chikü hau, ngo eheau kiu-iu;” naiuso nungh angiotsünli chhikü noiküla.

³¹Naiuso Goa nou apaüh shantaiutsün alum epnai, apa thatü mong lengkü noiküla. Nungko asham nou yankü khu küta ahom nou shin- nungh luoknyi nou noiküla.