Read Khiamniungan Naga Apung 11 Bible Online

Apung 11 - Khiamniungan Naga bible

Apung 11

¹Aya naito goumchi apemai ngio tsak naiuso ngioyak tsaklu kankeikü noiküla.

²Naiuso ngüso ajepekai tsakeikü khunai, ngüso Babilon goumchi ai tsamei tsak shisao küta nungko kihlo.

³Ngüso si ngüso chitekü ngiom, “Ashikam! samüh pujah nou sai küta in nai thasiakü juokü jekko.” Nungtiphe ngüsoüh pujahlung nou tsamlaao lo, nung jei-ekü noiao thaiutha tsanlep nou aikü lepshi.

⁴Ngüsoüh ngiom, “Lo samüh noknio tsak tsamthong tsak hakü maou sungyapkü lashanko, sam goumchi apemai tsüpeng lükhunao naiuso sam thaiutha nian tsak shantaiuko.”

⁵Nungaih APAOU nou nung khaiunia nousoüh noknio nouko hakü tsamthong lashantsün tü thapluao saom,

⁶küta apaüh ngiom, “Loto, nungso khaiunia tsaklu naiuso ngüsoüh ngio tsaklu chiteji; ngüsoüh ti chhilükhunao noin nung thaiutha nungto ayachulu noin. Loto shakta ngüsoüh aiutsün alum ngüsoüh chhilükhunao shiowan-e!

⁷Sam saoko, küta ngüso ngio lao-ekü pülai-iko nungaito ngüso tsaksitsak tsüngela- ekü noi-e.”

⁸Nungtiphe APAOU nou ngüso apem goumchi apemai pengkü khu-i, naiuso ngüsoüh noknio shantsün chhisiya laowan.

⁹Nung noknio Babilon noin, tiautenai APAOU nou khaiunia apem ngio lao-ekü püloi-i, küta nungko ainou apaüh goumchi apemai pengpuni.

¹⁰Shem thsaosithsoso nungso noin: Shelei phiai nepon noiküta, tilai Shem aakihlaiu pon 100 noiküla, apa tü Arpakshad ta niankü melothso tsak chetlut.

¹¹Nungphiai apa pon 500 kih; loüh apa tü amao melothsohoi naiuso menyiuthsohoi chetlut.

¹²Naiuso Arpakshad pon 35 noikü taoko apa tü melothso Shalak chetlut;

¹³nungphiai apa loüh pon 403 kihshi, naiuso amao methsoso chetlutshi.

¹⁴Shalak pon 30 nai apa tü Eber chetlut;

¹⁵nungphiai apa pon 403 kihshi, naiuso loüh amao melothsohoi naiuso menyiuthso hoi lüko chetlut.

¹⁶Tilai Eber pon 34 noiküla, apa tü melothso Pelek chetlut;

¹⁷nungphiai apa pon 430 kihshi, naiuso loüh amao methsoso lüko chetlut.

¹⁸Tilai Pelek pon 30 noiküla, apa tü melothso Reu chetlut;

¹⁹nungphiai apa pon 209 kihshi, naiuso loüh amao methsoso lüko chetlut.

²⁰Tilai Reu pon 32 noiküla, apa tü melothso Seruk chetlut;

²¹nungphiai apa pon 207 kihshi, naiuso loüh amao methsoso lüko chetlut.

²²Tilai Seruk pon 30 noiküla, apa tü melothso Nahor chetlut;

²³nungphiai apa pon 200 kihshi, naiuso loüh amao methsoso lüko chetlut.

²⁴Tilai Nahor pon 29 noiküla, apa tü melothso Tera chetlut;

²⁵nung- phiai apa pon 119 kihshi, naiuso loüh amao methsoso lüko chetlut.

²⁶Tera pon 70 phiai, apa Abram, Nahor, naiuso Haranso po iulakü noiküla.

²⁷Abram, Nahor, naiuso Haran nungso po Tera, apa thsaosithsoso nungso noiküla. Haran nung Lot po noiküla,

²⁸Haran nung Babilon nai Ur noknio ko apa po aa noi taoko ean.

²⁹Abramüh Sarai tsamsigoh yang, naiuso Nahorüh Haran menyiuthso Milka tsamsigoh yang, Haran nung Milka si Iska ne po noiküla.

³⁰Naiuso Sarai nung methso tsüchetkü lon noiküla.

³¹Teraüh apa thso Abram, naiuso apa thsao Haran thso Lot, naiuso apa le Abram tsammongnyiu Sarai apa ko nialokü Kanan goumchi ai khuau thaiutha Babilon nai Ur noknio wankü tsalokü khu. Ngüso Haran saokü khuküta nungai noi.

³²Nungaih Tera aakihlaiu pon 205 kihkü Haran nai ean.