Read Khiamniungan Naga Apung 13 Bible Online

Apung 13 - Khiamniungan Naga bible

Apung 13

¹Abram, ajepeki goumchi ainou ajenapki Kanan goumchi nai apa ko tsammongnyiu naiuso apaüh taiutsün chikü naiuso Lot hakü sungh.

²Abram onnemok si Won, naiuso amao thainian nouso ko naiuso loüh chaiou lakkeng naiuso tangkason nai thatü memei noiküla.

³Apaüh nungso wanküta athang tsak ainou tsak ai ta tsakeikü Bethel dongai khu. Apaüh Bethel naiuso Ai jetko nung thaiuko tsamlahtsün athang tsak nai shisaom,

⁴küta amkham thang tsak shan, nungko apaüh APAOU tü amkham.

⁵Lotüh lüko apa tsammongso naiuso tsamkihoi nouko thainian: onnemok hoi, naiuso won hoi taiuküla.

⁶Naiuso ngüso aikü kamkiao thsanyan noitsün goh nou tsüsaiu, tiautenai ngüsoüh thainian piakü taiuküla.

⁷Nungtiphe Abram ün thainian jimtsünso si Lot ün thainian jimtsünso jetko ali-e nou sungh. (Nungtaoko nai Kanan hai naiuso Perez hai nung goh nouko kihküla.)

⁸Nai Abramüh Lot tü ngiom, “Je nemtso tsammong noin, akhaiuniaso si jü khaiuniaso jetko ali-e tsünoi-ela.

⁹Nungtiphe sam pungekü noiko; ni aiutsün gohthang tsak lücholo. Ni yam tsak ai lükhu, naiuso ngo yam tsak ai khu-e.”

¹⁰Lotüh Yordan tsamei tü Zoar saokü lemkü thap, küta APAOU aimong khekkü, tsüdekünai Ijip goumchi khekkü, khiam saiukü noitsün apaüh epm. (Nung APAOU nou Sodom naiuso Gomora noknio nouso molomowankün khako noiküla.)

¹¹Nungtiphe Lotüh Yordan tsamei apem apa thaiutha hao cholo, küta ajepek dongai apa soikü khu, ngüso tsaküh tsak ainou punge.

¹²Abram Kanan goumchi ai noi, naiuso Lot tsamei goh nai noknio nouso ongko Sodom shimkü apa nejenkhio shankü kih,

¹³nungko kihtsün khaiunia nousoüh akausai naiuso APAOU thako angei sunhetsün chhisiyakü noiküla.

¹⁴Lot pungekü khukütünai, APAOU nou Abram tü ngiom, “Ni tiai noin, nungko yalokü thatü thsüokü goh lemkü aniokün püle nai lüthaplu.

¹⁵Tiautenai ti goumchi ni epji, nung chikü ni hao, naiuso athsaosithsoso hao, ngo athon tsüyangkü hao kiu-e;

¹⁶ngüso tü wetsünko to goumchi nai singtso nou tü ve naibao siutso-e!

¹⁷Atsalo, khukü goumchi apem tü lüthaplu, tiautenai ngo nung apem ni hao kiuao noin.”

¹⁸Nungtiphe Abramüh apa nejenkhio kankü shikü, Hebron nai noitsün, Mamre tsamei nai paiso nai noi, küta apaüh nungai APAOU tü amkham ao asio amthang tsak shan.