Read Khiamniungan Naga Apung 15 Bible Online

Apung 15 - Khiamniungan Naga bible

Apung 15

¹Nungthanko, Abramüh atsangshei tsak ep, naiuso APAOU nou apa tü ngiotsün lula, “Lahat Abram, Ngo ni angja ainou sojei-e naiuso ni hao paopei asong tsak kiu-e.”

²Lüko Abramüh thalan, “Oh APAOU Goa, ngo thso tsühakün ta ni ti paopei amei noi-ela? Jü tengkamao Damaska hai nou Eliezer lu noin.

³Ni ngo hao methso tsükiuphe, jü sua so ongko tsaküh jü teng kamao noin.”

⁴Nai loüh APAOU nou apa tü ngiotsün lulan, “Nung sua Eliezerüh ateng tsükame; lüko nitü chetsinyimtsün melothso noulu ateng kame.”

⁵APAOU nou apa kengchiai nialükhun küta ngiom, “Maou nai athaplu, küta kianthso nouso lüvelu; athsaosithsoso nung chiai piakü noi-e.”

⁶Abramüh APAOU da amonglam niolut, küta nung shioko APAOU nou monglingkü noiküla, küta Goa nou apa asio ta welut.

⁷Nai APAOU nou Abram tü ngiom, “Ngo APAOU, sauüh ni hao nung goum tengkam kiuao thaiutha ni Babilon goumchi Ur ainou niakü shin.”

⁸Lüko Abramüh sangshin, “Oh APAOU Goa, ngo nung tengkam kame ta ngo ti tsangkü nge-e?”

⁹APAOU nou thalakü ngiom, “Ngü hao jangtso tsak, won tsak, onnemok tsak, nungso apem pon sümeme nyanlokü noitsün, naiuso mükham tsak, naiuso waiothe tsak, ta kankü ashi.”

¹⁰Naiuso Abramüh Goa dongai kankü shikü wemwemko hethatkü haoson pungkü momo ethsathsa tha-e tha-e kü athung nime shan, lüko apaüh waio nouso to tsühethat.

¹¹Mea hetsün letche nouso nung mea nouso chiai saom, lüko Abramüh ngüso koman.

¹²Tilai aje saokü noiküla, Abram niongaokü sailaan, naiuso ahat ao lümeikü anyakhem apa khütha ai shin.

¹³APAOU nou apa tü ngiom, “Athsaosithsoso gohmao goumchi tsak nai mesanao iula-e, ngüso nungai sua noi-e, naiuso ngüso tü pon 400 ngoikü thsüokü angjakü kankei-e.

¹⁴Lüko ngo ngüso asam sua ao kankeitsün mele angja kiu-e, naiuso tilai ngüsoüh nung gohmao goumchi nou wan-e, ngüsoüh ngüsoko memei jengtsaiu piakü sunkü khuwane.

¹⁵Ni apim we sümkü kih-e, aalu nai ni eane küta khanane.

¹⁶Athsaosithsoso nungai laokü moshikün khako vetao püle nungai noi-e, tiautenai ngüso akausai ta angja kiuao lümeikü mo-iulakün lektso ngo Amor hai tsükomane.”

¹⁷Tilai aje napan küta ah nyakhemkü iula, inkhao khaotsün in pulak naiuso in outsün tsonje alekta sung küta thainian hepekkü taiutsün ajet nai yanlükhun.

¹⁸Nung ko APAOU nou Athalu-e tsak Abram ko shan. Apaüh ngiom, “Athsaosithsoso hao ngo nung goumchi apem Ijip elung ainou Eufrates haiumong asong saokü,

¹⁹Ken hai, Keniz hai, Kadnon hai,

²⁰Het hai, Periz hai, Refaim hai,

²¹Amor hai, Kanan hai, Girgas hai, Jebus hai, ngüso goumchi hakü apem kiuwanao thalou-iu.”