Read Khiamniungan Naga Apung 17 Bible Online

Apung 17 - Khiamniungan Naga bible

Apung 17

¹Tilai Abram achetpon 99 noiküla, APAOU apa dongai sungh küta chitekü ngiom, “Ngo Akongting Goa, ngü tü angio angkü asaichi ti ayam atha noin nung lüchhi.

²Ngo jü Athalou-e niko shane naiuso nihau thsaosithso piakü kiu-e.”

³Abram apa khakhengüh goh tü saothankü kauthio, nai Goa nou ngiom,

⁴“Ngo nung Athalou-etsün niko shanji: ni mele piakü paosipo iulaau ngo thalouji.

⁵Anian loto Abram ta tsüjon shi-e, lüko anian Abraham ta jone, tiautenai ngo ni mele piakü paosipo shankiuwaniu.

⁶Ni hau thsaosithso piakü kiu-e, naiuso nungko ajantso to nokpao sunge. Ni thsaosithso piakü noi-e naiuso, ngüso mele piakü iula-e.”

⁷Athontsüyang Athalu-etsün tsakli ashiau nou vetao nai athsao- sithsoso tü naiuso ni tü thaloutsün ngo taiu-e.

⁸Ngo a Goa naiuso athsaosithsoso Goa noi-e.

⁹“Tisübao goh nai ni lo gohmao khaiunia tsak noin, nung goumchi ngo ni naiuso athsaosithsoso hau kiu-e. Kanan goumchi apem athsaosithsoso hau athon tsüyangkü thaiutha noi-e, naiuso ngo ngüso Goa noi-e.”

¹⁰Goa nou Abraham tü ngiom, “Ni naiuso athsaosithsoso ashiau nou vetao chikü nouko nung athalouetsün ngüko taiuau ni lüko mongchioau noin.

¹¹Lo nai yakü, melothso chet pungkü ajekhaiu petjeinyi ngoi nai atsamkhaiu ko sua hai thso lüko naiuso sua hai gohmao khaiunia ainou tuhtsün hoiko nou lüko hakü tippanau noin,

¹³naiuso nungnyi nai jü athalu-etsün niko athon tsüyangkü taim ta han-e.

¹⁴Melo sauüh nung atippantsün tsülou-e loto apa jü khaiunia tsak ta tsüwesanha-e, tiautenai apaüh ngoko athalou-etsün tsütaiu.”

¹⁵Goa nou Abraham tü ngiom, “Ni loto atsammongnyiu tü Sarai ta tsüjonshi-e; loyakü apa nian Sara ta noi-e.

¹⁶Ngo apa ouk kiu-e, naiuso ngo apa ainou nihau melothso tsak kiu-e. Ngo apa ouk kiu-e, naiuso apa mele nouso nyiuteng iula-e, naiuso apa tü chetsinyimtsün ongko nokpaohoi sungi-e.”

¹⁷Abraham apa khakheng goh tü thankü kaukü nap, lüko tilai apaüh yanglu, apa mongai nyaiao yachu küta ngiom, “khaiunia tsak achetpon tsom tsak ngoianküta methso tsak epao shio süne? Achetpon aolükao nai Saraüh methso tsak chetao shio-e süne?”

¹⁸Abrahamüh Goa tü ngiom, “Ismael bao jü tengkamao tiauta tsüthe-i?”

¹⁹Lüko Goa nou ngiom, “Tsüde. Atsammongnyiu Saraüh ni hau melothso tsak chetkiuau noin küta ni apa nian Isak ta nian-e. Ngo jü athalou-etsün apa naiuso apa thsaosithsoso ko athon tsüyangkü taiu-e. Nung asaichi athon tsüyangkün athalou-etsün noi-e.

²⁰Ni Ismael thaiutha sangtsün ngo lula-iu, nungtiphe ngo apa ouk kiu-e naiuso thsaosithsoso piakü kiu-e. Apa nokpao chekü nime po iula-e, küta ngo apa thsaosithsoso mele asong tsak shan-e.

²¹Lüko Isak, sau Saraüh nungthan ponko nungtao tongtü nai chettao noin, apako jü athalou-etsün taiu-e.”

²²Tilai Goa nou Abraham ko chitetsün khem, apaüh Abraham letaiukü khu.

²³Nung ajekhaiu ko lu Abrahamüh Goa ngio angkü apa thso Ismael naiuso apa tsamko noitsün amao melothso apem, naiuso apa tsamkhaiu ko sua nousoüh chetkiutsün sauhai apaüh atuhtukü taiutsün thsoso noin ngüso hakü tippankiu.

²⁴Abraham tippantsün taoko apa achetpon 99 noiküla;

²⁵naiuso apa thso Ismael pon chekü süme noiküla.

²⁶Ngüne nemtso ajekhaiu tsak kolu tippan,

²⁷Abraham ün sua nouso apemko aikü tippan.