Read Khiamniungan Naga Apung 18 Bible Online

Apung 18 - Khiamniungan Naga bible

Apung 18

¹APAOU Goa Abraham dongai Mamre tsamei asio pai nouso dongko sungh. Ahlamting ajekhaiu taoko nai Abraham apa nejenkhio koukhan dongko moknoikü,

²apaüh koiai ngukü thapsan nai apaüh khaiunia süme tsakü ep. Apaüh ngüso eptsün ko aikü, apa ngüso pheteao jingkü khu. Apa khakheng nou goh nai thankü kauthio,

³küta apaüh ngiom, “Jü APAOU nouso, tsüojinyangkü jütsamko tsülaokü yanküto lakhuwan; Ngo nungko asam tü yathsüoau noin.

⁴Ngo asam hok tsawanao thaiutha asam hau khiam intso kankü shiko, nungüh asam süme tsülaokü khuau asam hau oukong kiu-e.

⁵Asam jü tsamai shitsün tsangkü asamüh ngo loksankiu-iu, nungtiphe ngo asam yathsüo-e.” Ngüsoüh thalakü ngiom, “Thaiumei, samüh louji.”

⁶Abraham nejenkhio nai liuliukü napküta Sara tü ngiom, “Liukü, wonne ameiteng nekong tsak alou, küta themtsai ajantso atsaisan.”

⁷Nai apa janghoi dongai jingkü khuküta jangtso thso tsak sübao shethopkü tsahkü noiküla nung thalou, küta tsamki tsak hau liukü heao akhemsanao kiu.

⁸Apaüh ünge ajantso, anyao ajantso, naiuso anyi ajantso losanküta nung eheshiu khaiunia nouso khako taiukiu. Nungaih paikhem nai apaüh meshen chija ngüso yathsüokü ngüsoüh heshiu.

⁹Nai ngüsoüh apa tü sangkü ngiom, “Atsammongnyiu Sara tiai noin?” Apaüh thalakü ngiom, “Apa nungai nejenkhio nai noin.”

¹⁰Ngüso ongko tsaküh ngiom, “Lo ko yaloukü alei lükao noiküta ngo laokü shi-e, naiuso atsammongnyiu Sarüh melothso tsak chette.” Saraüh nejenkhio koukhan phiko angkü noiküla.

¹¹Abraham si Sara ne thatü sonanphe, Sara da alei pungkü she achinyan khutsün laowankü noiküla.

¹²Nungtiphe Sara mongai chija nyaikü ngiom, “Lo ngo jihai noin naiuso sonaniu ngo melo menyiu tsüojinetsün lo saokü noiau shio-e süne? Naiuso nungko hakü, jü tsammongpo lüko sonankü noin.”

¹³Nai APAOU nou Abraham tü sangkü ngiom, “Tiauta Saraüh nyaiküta, ‘Ngo sonanküta atsüoting ngü methso tsak epao shio-e süne ta ngioji?’

¹⁴APAOU khako tso thatü achek noin süne? Ngo ngio-iu, lo ko yakü alei lükao noiküta ngo laokü shi-e, naiuso Saraüh melothso tsak chette.”

¹⁵Sara ahat nou nung ngio tü phi. Apaüh ngiom, “Ngo tsünyai.” Apaüh thalakü ngiom, “Tsüde, ni nyai-aniu” “Ni nyaikü noiküla.”

¹⁶Küta khaiunia nouso tsalokü Sodom ta thapao shiotsün athang tsakai ngüso khu, naiuso Abraham ngüso yananao thaiutha ngüso ko aikü khuha.

¹⁷APAOU nou apa meshen chija ngiom, “Ngo ti chhiau noin nung Abraham khako to ngo tsütsange.

¹⁸Apa thsaosithsoso sungkü iula-e naiuso akongting mele noi-e, naiuso apa tsangkü ngo mele apem ouk kiuau noin,

¹⁹ngo apa thsaosithsoso naiuso thsoso ngü tü angio angkü, atha nou naiuso ngiotsüo nou chhiau apa thsoso tü thoiluttao thaiutha ko chosan. Ngüsoüh chhi naito, Ngo thaloukü taiutsün apa thaiutha Ngo alum chhi-e.”

²⁰Küta APAOU nou Abraham tü ngiom, “Nungai Sodom naiuso Gomora thako angioau tsüshiokü alochi noin, naiuso ngüso angei thatü songkü noin.

²¹Alochi nouso ngo sübao luji nung atsüo süne tsüde ta tsangsheiau ngo titilünou saoau noin.”

²²Nai khaiunia nime nou apa wankü khukü Sodom dongai khuwan, lüko APAOU to Abraham ko noi.

²³Abrahamüh APAOU shimkü shiküta sang, “Ni atsüoting asiohoi nouso aphio hoi nousoko aikü mowani-e süne?

²⁴Nung noknio nouko asio khaiunia nouso aopungo lüko noi nai, ni noknio thumkü lomowane süne? Aopungo nouso kipsanau nou shioko, ni nung noknio poitaiu-e mo?

²⁵Atsüoting ni asio nouso angei hoi nousoko aikü tsülomo-e. Nung ashio au tsüde! Ni nung chhiau tsüshio-e. Ni chhi naito asiohoi nou angei hoiko aikü angja eppe. Nung ashioau tsüde. Goumchi apem tü mikhemtsün nouto asio chhi chhi-ela.”

²⁶APAOU nou thalan, “Ngo Sodom nai asiohoi aopungo ep naito, ngo noknio thumkü ngüso koko poikiu-e.”

²⁷Abrahamüh thalakü ngiom, “Ngo ni tü jümongyang nai tsülaotingkü chitetsün thaiutha atsüojin nou ngü hau awankiu. Ngo khaiunia tsaklu noin naiuso angioau ti thakü tsünoi.

²⁸Lüko tsüngean, nungai aopungo liko asiohoi aopülekü pungo lüko noi naito, pungoüh tsüthapungkün shioko ni noknio thumkü lomowane süne?” APAOU nou thalakü ngiom, “Ngo asiohoi aopülekü pungo epsan naito ngo noknio nou tsülomo-e.”

²⁹Abrahamüh loüh müjam ngiom, “Tsüngean nungai aopülelu lüko noi-e.” Apaüh thalakü ngiom, “Nungai aopüle lüko noi naito, ngo tsülomo-e.”

³⁰Abrahamüh ngiom, “APAOU, tsüojinyangkü lamongmat, lüko ngo loüh ngio shiau noin, Nungai aosamlu lüko noi naito titi?” Apaüh ngiom, “Ngo aosam lüko epsan naito tsülomo-e.”

³¹Abrahamüh ngiom, “APAOU, atsüojinyangko ngo ni tü mong- songkü tsülaokü chitetsün thaiutha awankiu. Athatlu nai, asio hoi khei lüko epsan naito titi?” Apaüh ngiom, “Khei lüko epsan naito ngo noknio nou tsülomowan-e.”

³²Abrahamüh ngiom, “APAOU, tsüojinyangko lamongmat, küta ngo loüh jamlu ngioshi-e. Che lu lüko epsan naito titi?” Apaüh ngiom, “Nungai che lüko noi naito ngo tsülomowan-e.”

³³Apaüh Abraham ko chitekhem kütün phiai APAOU khuwan, naiuso Abraham tsamai laokü shin.